Myitkyina kaw na Tang Hpre kaw du nga ai Myen hpyen hpung ni, Tayang Zup maga de lagaw lam the bai matut lung wa taw nga ai majaw, Majan naw bai byin wa na re nga, shawng lam magam gun ni tsun ai re.
“Anhte maga na mung Myen ni n lu lung wa hkra shara shagu hkap da ai, lung wa yang gaw gap na sha rai nga ai,” nga tsun ai re.
February 12 ya shani hta mung Myen hpyen dap maga na hpyen n’gun kaba hte htu shadut wa ai hpe KIA dap maga hkap shingla gasat ai hta Myen hpyen dap maga sum machyi lam law ai hte bai hting nut mat ai re.
Dai shani Woi Shi hte Tang Hpre mare lapran Myen hpyen dap ni shamu shamawt lung wa ai hpe KIA dap maga numdaw 4 lang hkap shingla gasat ai hpang, Myen ni bai htingnut mat ai re.
Myen hpyen dap ni gaw, lai wa sai January Shata htum maga na, Tang Hpre mare maga de hpyen shamu shamawt wa ai hte rau, Woi Shi mare hta nbungli the wa gap gasat ai lam ni mung galaw wa ai re.
Woi Shi mare hpe ndai Shata praw laman hta sha nbungli hte 3,4 ya wa gap gasat ai hpang, ya na zawn lagaw lam hku na bai htu shadut lung wa ai mung rai nga ai.
KIA dap maga Myen hpyen hpung hpe hkap shingla gasat ai ten, Putao Tayang Zup de lung ai mawdaw ni hpe mung jahkring gan pat kau ya nna, shana maga de bai hpaw ya wa ai re.
Woi Shi Mare makau Myen hpyen hpung hpe hkap shingla gasat ai lam hte seng na, Tayang Zup lung ai Mawdaw La langai mung n dai zawn matut tsun ai re.
“Tanghpre kaw na lung wa yang Woi Shi rai n du shi kaw gap hkat ai majaw nga na mawdaw langai hpe mung n shalai ai, n kau hpe gaw bai n htang kau shangun ai, nkau gaw 42 mile n pu kaw yup ai, hpang jahpawt jang gaw bai hpaw ya ai,” nga na tsun dan wa ai re.
Ndai laman hta Myen hpyen hpung ni ding yang hpyen shamu shamawt taw ai rai tim, Myitkyina Tayang Zup, Putao Mawdaw ni gaw ding yang na bai lai taw nga sai re.
Tanghpre de hpyen shamu shamawt nga ai Myen hpyen hpung ni gaw, Tanghpre mare na Kahtawlik Ma Ma Nta hte Hkalup Nawku Jawng dingsa Zaw adup hpaw nna shara jahkrat ai lam ni galaw wa ai re.
