Mungmyit Sinli Kutkai Muklum kata KTV hte Hpaida dabang pyaw len ginra ni grau law jat wa ai majaw, ramma ni law malawng akyang lailen hten za ai lam ni grau law wa taw ai nga, ginra mung shawa nit sun ai re.
Miwa Kokang asuya a matu alu tam lamang ga baw the Miwa mung lauban ni hpe shara jahkrat ya nna, KTV hte kaga pyaw len shara sha n ga na, Hpaida dabang ni grau law hkra hpaw jat wa ai majaw, ginra madu ramma nkau akyang lailen myit masa hten za ai lam ni byin taw ai nga, Nam-Um mare na amyu shayi langai KNG shiga de n dai zawn tsun ai re.
“MNDAA ni ginra madu ni hpe hpa n shadu ma ai mi, shan hte galaw mayu ai lam hpe shan the kam ai hku na galaw taw nga ai, gadai na myit hkrum lam mung n la ai, ya gaw myo n tsa kaw sha n rai sai, mare hkan de du hkra hpaw wa ma ai, ndai ginra kaw shaning 30, 40 ning nga lai wa yu sai, n dai zawn re kalang mung n mu ga ai. Ya gaw mare lam makau hkan mung hpaida dabang hkrai Ma ni akyang lailen hten za ai lam grau law si wa sai, ngut nna Kani Nanghpam mung grai law wa ai,” nga tsun ai re.
Muse hte Kutkai mare lapran Nam-Um mare hta lai wa sai ten Game Seng, Pyaw len shara ni n nga ai rai tim, Kokang Miwa ni a 1027 Majan masing hpang dai ginra hpe up madu kau ai hpang, hpaida dabang hte pyaw len ginra ni grau law wa ai re lam matut tsun ai.
Dai hpaida wang ni hpe Kyahpyen dabang ni zawn sha, tsaw dik kum da nna, kata kaw hpaida hkum sum hpa hpaw da ai lam Nam-Um mare masha ni matut tsun ai re.
Dai sha n ga, Miwa Kokang ni gaw Mare gaw sharawt magam bungli masing ni galaw na rai tim, mung shawa ni hpe jahkrup bawngban ai lam hpa n nga ai sha shanhte kam ai hku na galaw taw ai lam chye lu ai.
Kutkai Ginwang kata na pyaw len ginra law malawng hpe Miwa Mung lauban ni hpaw da ai rai nna, dai KTV kata hta Nanghpam lusha hpan hkum mai lu jai lang ai taw ai lam chye lu ai.
Kokang asuya ni gaw, kalang marang mung shawa ni hte Zuphpawng ni galaw ai rai tim, KTV pyaw chyai shara ni hpe gara hku hpaw na, shang gumhpraw nga hkra gara hku galaw na ngu ai lam ni hpe hkrai woi hpawng ai lam chye lu ai.
Kutkai ginwang kata Kokang ni shang wa ai hpang, KTV shara 20 jan law jat wa ai lam chye lu ai.
Ya na zawn KTV Nanghpam malu masha law wa ai majaw, ginra madu ni galaw lu galaw sha yak wa ai sha n ga, lagu lagut lam ni mung jahkring hkring byin taw nga ai hpe chye lu ai.
Ya na zawn Kani nang hpam law wa ai majaw asak 12, 13 ning ram re ai ma ni du hkra, chye lu sha ai lam ni byin taw sai hpe chye lu ai re.
