Hpakant Ginwang, Uru Sengmaw ginwang daw, Uphkang Du Salang Kaba Nshaw Seng Awng Nan hpe sat ai Shd Mung Ja Naw gaw, dai ni shani ka-ang ram kaw shi hkum shi gyit noi si mat ai lam chye lu ai.
Shd Mung Ja Awng gaw, asak (24) Ning re ai shabrang la kasha rai nna, Gwihtu mare kaw na Hpakant de nga ai, Gahkau a hpang hkan nna, ra ai bungli galaw ya taw ai Ramma la kasha re lam chye lu ai.
Lai wa sai June 28 ya shana Salang Kaba hpe Kahtam sat kau ai hpang dai ni June 30 ya shani Sengra Mare Nnan kaw shi hkum shi gyit noi si mat ai re.
Sat hkrum ai Salang Kaba a madu Jan hte, Sat ai Mung Ja Awng a Kanu gaw, shan nau re lam chye lu ai Salang kaba a manang ni tsun ai re.
Dai Salang kaba wa hpe kahtam sat ai shana hta, Mung Ja Awng hpaida wang kaw na wa nna, yup taw sai Salang kaba hpe chyinghka wa htawng hpaw nna, kahtam sat kau ai re lam chye lu ai.
Kahtam sat kau ngut ai hpang, dai Salang kaba a moi mang hpe Sengtawng ninghtawn, Hpapyin lupwa Lungseng nhkun hka nawng kaw sa kabai makoi kau ai re lam ginra masha langai KNG shiga de n dai zawn tsun dan ai re.
“Dai ya Salang kaba hpe sat ai wa a Kanu Kawa yan gaw, Gwihtu mare kaw nga ai rai reng ai. Salang kaba Na Madu jan hte Mung Ja Awng a Kanu gaw, hkan nau ni ang ma ai, Mung Ja Awng gaw nau myit n su ai ai ri ai, hpaida grai da ai wa re nga, dai sat ai shana mung pyi yup taw sai Salang Kaba hpe chyinghka wa htawng hpaw na kahtam sat kau ai rai ri ai.” nga ai.
Salang Kaba Nshaw Seng Awng Nan hpe kahtam sat ai Shd Mung Ja Awng gaw, jinghku kasha mung daw ang ai majaw, Salang Kaba shi makau kaw shaga da nna, ra ai bungli shangun ai shangun ma re lam chye lu ai.
Salang Kaba Nshaw Awng Nan gaw, mung shawa ni hpe up hkang ai lam hta loi Mazut ai Salang kaba langai re lam Hpakant ginra masha langai n dai zawn matut tsun ai re.
“Salang kaba dai gaw tsawmra gumshem zai mazut ai Salang kaba langai re. Shi ma ni hpe gara hku jai lang ai kun? Shi jai lang ai Ma mung rai, Jinghku mung daw re ai shabrang la kasha re, shan hte kata kaw kaning mi byin ai kun ram ram shuk ai masa gaw re” nga matut tsun ai.
June 28 ya shana Salang Kaba na shangun ma Mung Ja Awng Hpaida ginsup na wa ai ten, dai shana jang kahtam sat na Hpa Pyin Lupwa makau na lungseng n hkun hka nawng kaw sa kabai bang kau ai lam chye lu ai.
Dai Salang kaba a moi mang hpe dai hpawt maga a tsawm sha mu tam la nna, dai ni shani ka-ang hkying 1 kaw, Gwihka mare kaw a tsawm sha lup makoi ngut ai hpang, dai shi hpe sat ai wa mung shi na shi hkrai gyit si ai lam byin wa ai re hpe chye lu ai.
Dai ramma wa gaw, Salang kaba kaw na kashun mat wa ai gumhpraw hte Mawdaw ni yawng hpe mung dai shi gyit noi si ai shara kaw sha tawn da nna, gyit noi si mat ai masa lam re hpe chye lu ai.
Salang Kaba hpe sat ai Mung Ja Awng gaw, Sengra Mare nnan na dum n ta langai kaw shi hkrai shi gyit si mat ai lam chye lu ai re.
Du gyit si ai lam hpe bai sa raw yu yang lagaw de mung chyang mang ai lam ni byin ai lam matut tsun ai re.
Ya Sat hkrum ai Salang kaba Nshaw Seng Awng Nan gaw, asak 35 ning re ai, dinghku shang sai salang kaba langai rai nna, Hpakant Ginwang, Uru Sengmaw ginwang daw Uphkang Du langai re lam chye lu ai.
