Sagaing Indaw Muklum Aung Mingalar lawk na Jawng Saranum langai hpe Myen Hpyenla marai (5) hkumshan mazut roi rip kau da ai lam ginra mung shawa ni kaw na chye lu ai.
July praw 4 ya shana hkying 9 aten daram hta, dai jawng Saranum the Madu wa yan nga taw ai nta de Myen hpyenla marai (5) sa wa ai majaw, madu wa gaw hprawng mat nna, madu jan Jawng Saranum hkrai n ta kaw ngam da ai kaw hkumshan roi rip hkrum wa ai re lam ginra masha ni n dai zawn tsun ai re.
“Madu wa gaw hprawng mat ai, madu jan hpe hkrai ngam kau da ai, madu jan mung asuya jawng sarama re nga yang gaw hpa n ra na re ngu myit hte ngam kau da ai she n rai i? Dai Myen Hpyen la ni du ai hpang gaw Jawng Saranum hpe kam ai hku roi kau da ma ai,” nga tsun ai re.
Dai zawn byin ai ten, Jawng Saranum a Madu wa gaw Indaw kaw nga ai Tsit chyaung mu ( စစ်ကြောင်းမှူး) na kawa Slg Win Aung hpang de garum hpyi na matu sa yu ai rai tim, dai Salang wa n nga taw ai majaw hpa mung n lu galaw kau dat ai lam matut chye lu ai.
Ya ten dai Indaw muklum makau grup yin ni de woi awn htim gasat taw nga ai Tsit chyaung mu ( စစ်ကြောင်းမှူး) gaw Indaw ginra masha wa nan re hpe chye lu ai.
Indaw gaw du nga ai Tsit chyaung mu ( စစ်ကြောင်းမှူး) na kawa hpe sa tsun tim mung hpa garum ningtum mung n lu wa ai sha n ga, shana nsin re majaw hpa n lu galaw ya ai lam sha bai n htang tsun dat ai lam chye lu ai.
Hkum shan roirip hkrum ai wa gaw, hkying hkum mi jan na ai hpang, Myen hpyen la ni a lata na lawt wa lu nna, makau grup yin na ni hpe garum hpyi nna, lai di lu ai re lam ginra mash langai wa matut tsun dan ai re.
Ya ten Indaw makau Mawlu, Naba lam bumbraw the Meza ginra ni hta Myen hpyen dap shara la da nna, hkawm sa hkawm wa mung mare masha ni hpe ladu lai san jep ai lam ni galaw nga ai hpe chye lu ai.
Dai ginra hta lai wa sai laning mi jan daram NUG asuya uphkang lai wa ai rai tim, dai ning 2026 April shata kaw na Myen hpyen ni bai gasat zing madu kau ai mung rai nga ai.
Myen hpyen ni bai wa dung ai hpang, ya na zawn mung mare masha ni hpe dai zawn galaw wa ai majaw, mare masha ni hkrit tsang let nga taw ai lam ginra masha ni matut tsun ai re.
