Bangshau Mare KIO Rung gawgap ai lam hpe UWSA “Wa” hte TNLA Ninghkap
Mare Masha ni kaw na UWSA “Wa” ni hpe dai mare kaw na pru mat na matu Ninghkap
Mungmyit Sinli Ga, Lashio Ginwang, Mung Yaw Ninghtawn, Bangshau Mare hta KIO Rung jahkrat wa ai lam hpe UWSA Wa hpung hte Balawng TNLA dap maga hkum pat wa ai majaw, mare masha ni hku na mung Bangshau mare hta UWSA Wa ni dap jung shara jahkrat ai lam hpe n ra sharawng ai lam ninghkap n gun madun wa ai re.
Wunpawng Mungdan Shanglawt Asuya uphkang hkrang hte nga taw ai, Bangshau mare hta Balawng TNLA dap sha n ga, UWSA Wa ni mung dap jung shara jahkrat wa nna, KIA,KIO a galaw sa wa ai magam bungli ni hpe je bat ai lam ni galaw wa ai re nga ginra masha ni tsun ai re.
Bangshau mare hta KIO Asuya hte seng ai rung ni gaw gap taw nga ai hpe lai wa sai February 10 ya shani kaw na UWSA Wa the Balawng TNLA dap ni sa hkum pat wa ai majaw, rung dum nta gaw gap ai lam hpe gan jahkring da ai nga, Bangshau mare na amyu shayi langai KNG shiga dap de tsun dan wa ai re.
“Ndai mare kaw KIO/KIA Rung gaw gap nga ai lam hpe Balawng hte Wa ni sa hkum pat ai majaw, bungli jahkring da ai lahkawng ya rai sai, anhte na masha kaba ni gaw shan hte hkum galaw mu nga sa hkum pat ai majaw gan jahkring da na matu matsun na jahkring da ai. Shan hte gaw Shanglawt hpe mare kaw n nga shangun mayu ai hku na masing jahkrat taw nga ai, mare masha ni gaw Anhte shanglawt Asuya gaw ndai mare kaw nga nan nga ra ai ngu hku na madi shadaw taw nga ai, Mare kaw nga taw ai Wa hte Balawng hpe n ra sharawng ai lam ninghkap n’gun madun taw nga ga ai,”nga tsun ai re.
Ya ten Bangshau Mare hta UWSA Wa ni Kyuhpyi bum hte Hpaji Jawng, Nawku jawng wang shara ni hta dap jung shara jahkrat nga na, KIO galaw nga ai magam bungli ni hpe hkan je bat taw nga ai majaw, mung shawa ni ninghkap n’gun madun wa ai re lam chye lu ai.
Mare kata hta mung shawa yawng hte seng ai shara ni hta Wa ni dap jung nga ai majaw, mung shawa ni maga yen ya na matu lang hte lang hpyi shawn wa ai rai tim, yen ya ai lam n nga ai majaw, mani February 11 ya shani mare masha the jawng ma ni jawm pawng nna, ninghkap n gun madun wa ai re.
Dai zawn mare masha ni maga na UWSA Wa ni dap jung shara jahkrat nga ai hpe nra sharawng n gun madun ai mare masha ni hpe, Balawng TNLA dap maga na ni sa hkum pat wa ai re.
Mung mare masha ni maga na ya na zawn n’gun madun hpyi shawn wa ai majaw, UWSA Wa dap maga na mung Hpaji jawng, Nawku Jawng, Kyuhpyi bum shara ni kaw na gan htawt sit yen da ya ai nga na matut tsun dan wa ai re.
Bangshau mare gaw, KIA Dapba (10) Dapdung (17) Gangming Loidau Ginwang kata na mare langai rai nna, UWSA WA maga lai wa sai 2024 shaning htum maga kaw na dai ginra de shang wa na wa du dap jung shara jahkrat wa ai mung rai nga ai.
“Bangshau mare gaw Jinghpaw ni hkrai san rai nga ai mare re. anhte mung shawa ni hku na gaw ndai mare kaw Wa ni nga ai hpe tsep kawp n ra sharawng ai, mare masha yawng wang lu wang lang nga na galaw lu galaw sha mayu ai. Shan the sa du dap jung shara jahkrat nga ai majaw hpun ni mung shan hte ra ai hku kran, Num ma ni hpe mung hkalem hkalau re lam ni nga ai, dai majaw tsep kawp n ra sharawng ai,” nga na ginra amyu shayi langai matut tsun ai re.
Bangshau mare gaw Lashio mare kaba a Sinpraw maga, Mung Yaw mare lahta na Jinghpaw mare kahtawng langai rai nna, dum nta htinggaw 200 jan nga ai Jinghpaw ni a labau shang mare kahtawng langai mung rai nga ai.
Bangshau Mare gaw Wunpawng Mungdan Shanglawt Hpung KIO hpe woi hpaw ai GOC Lahtaw Zau Seng a dai daw buga mung rai nna, KIO hpe dai mare kaw na hpaw hpang ai mare kahtawng re nga na mung tsun ai re.
Myen hpyen dap daru magam rai n zing shi ai ten, KDA Mahtu Naw woi awn ai Ja Yang Pyithutsit ni nga ai shara rai nna, 2023 ning ram kaw na, dai mare na Hpaji lam, Hkam Ja lam the laga Asuya the seng ai lam yawng hpe KIO Asuya a uphkang sai ru hkrang hte sa taw ai mare kahtawng re.
Lai wa sai 2024 ning February shata hta Ja Yang Pyithutsit hpung ni hpe Balawng TNLA dap ni sa htim gap gasat zing madu wa ai re.
