Indawgyi hte Gwihka lapran, Nawnglut ginwang, Hwi Lung Mare kaw Shanglawt hpyenla lahkawng Beer lu nang nna, Mung shawa langai lai wa ai hpe mara hkap tam ga law hkat ai kaw na, sinat gap dumbre ai majaw, mung shawa 2 si nna, 2 hkala hkrum wa nna, Sinat gap dumbre bun ai Hpyenla wa mung shi na shi bai gap si mat ai lam chye lu ai re.
July praw 6 ya shana hkying 10 ten daram kaw, Nawnglut Ginra, Hwi Lung Mare, Dung (6) Lagat Madi Shagyit na, Army Kung (4) kaw nga ai Gyi Jangma Awng San hte Latgyi Myitung La Tawng yan gaw Hwi Lung mare na, Slg Tseing Win a ဘရဏီ shat seng kaw Beer lu nga ai ten Myen La kasha, Shd Awng Thu Hpyu ngu ai wa Sengke hte lai wa ai hpe hkap jahkring la nna, Aung Thu Hpyu a hkum hta Yama bat manam ai ngu tsun mara shagun na, htawng bye ai kaw na, shada ga law hkat wa ai lam ginra mung shawa nit sun dan ai re.
Dai zawn ga law hkat nga ai hpe Hwi Lung mare Salang Aik Nawng gaw, aten lai lusha nna, hkum ga law hkat mu ngu sa je ai kaw na, Lat Gyi Myitung La gaw shi hpai lang ai sinat shachyen la nna, Auto gap dumbre dat ai kaw, Seng madu dinggai jan hte mare Salang wa asak si hkrum nna, kaga marai 2 gaw hkala hkrum wa ai lam ginra mung shawa langai KNG de n dai zawn tsun ai re.
“Tsa lu nang nna, sengke hte lai wa ai Myen la kasha hpe Yama manam ai ngu mara tam nna ga law hkat bang wa ma ai, dai hpe mare salang wa gaw, aten lai lusha nang nna, hkum ga law hkat mu ngu sa je yang she Lat Gyi Myitung La gaw shi hpai lang ai sinat shachyen nna, Auto hpaw gap dumbre dat ai kaw si hkala ai mabyin byin wa ai ga rai nga ai,” nga tsun ai.
Mare Salang na Kanu, Seng madu Jan Cho Cho Oo asak (55) ning gaw dai shara hta nan si mat nna, Mare Salang Aik Nawng asak (33) ning gaw, sai htaw lai mat ai majaw, Gwihka tsi rung du ai hpang si mat ai hpe chye lu ai.
Mare Salang hte Seng madu yan hpe gap sat kau ai hpang, Lat Gyi Myitung La Tawng mung dai shara kaw nan, shi na shi bai gap si mat ai lam matut chye lu ai re.
Hkala hkrum ai lahkawng gaw, Slg Nyut Mg the Slg Sut Gring Naw yan hkala hkrum nna, ya ten Gwihka Tsirung kaw tsi tsi hkam la nga ai hpe chye lu ai.
Ndai lam the seng nna, lit nga ai KIA ni hpang de matut mahkai rai n lu shi ai re.
Lai wa sai shata hta Hpakant kaw Salang kaba a hpang hkan nang ai Ma hte Shi manang ni Salang Kaba wa hpe kahtam sat nna, dai kahtam sat ai wa shi hkum shi bai gyit noi si mat ai mabyin lam mung byin lai wa sai re.
