Indaw Majan hta Pawng Hpawm dap maga dap shara n kau hpe bai Kalut tat Sum nga
Sagaing hte Jinghpaw Mung jarit Indaw mare hta, Myen hpyen dap ni maga de na nbungli Lagaw dap hpyen n’gun kaba hte bai htu shadut wa ai majaw, zing da lu sai shara n kau ni hpe bai hting nut ya kau ai nga, dai ginra na PDF lit nga ai ni kaw na chye lu ai.
Indaw mare hta naw ngam nga ai Myen hpye Byuha dap hpe pawng hpawm dap ni htim gasat taw nga ai ten, Myen hpyen dap maga na mung, Hpyen n’gun kaba bai jahting mahkawng la nna, pawng hpawm dap ni zing da ai shara ni de nbungli Laknak kaba, Drone bawm ni hte laja lana gap sharu bun ngut ai hpang, Lagaw dap hpung ni bai htu shadut htim gasat wa ai majaw, February 14 ya shani တုံးပွမ် mare hte shawng lam dap shara nkau hpe bai kalut kau da ra mat ai nga, Shawng lam magam gun langai KNG shiga dap de ndai zawn tsun dan wa ai re.
“Hpyen ni maga de na gaw shan hte tat sum kau ai shara ni hpe lu hkra bai la na ngu ai masa hte, nbungli laknak kaba hpan hkum, Drone ni hte shawng agying sa gap sharu bun na lagaw lam hku na bai htu lung wa ma ai, laknak n-gun nbung ai majaw anhte maga na mung bai kalut kau da ai rai nga ai,” nga tsun dan wa ai re.
Myen hpyen Telegram shiga ni hta gaw, Tung Pung Mare shawng lam dap shara ni hpe bai htim gasat ai hta, KIA PDF dap maga na marai 3 si nna, Myen hpyen dap maga na 1 si nna, PDF dap ni zing da ai shara hpe bai lu la sai nga nna, tsun da ai re.
Ndai majan hta rawt malan dap maga na mung Si hkala lam ni law wa ai rai tim, masa lam a tsawm tup hkrak hpe KNG maga n lu shateng ai re.
“Lagaw Lata hkra hkala ai lam ni gaw law ai, grai wa n tsang ra ai kaji kajaw hkra hkala ai ni mung gaw law ai, marai gade gara hku re ai ngu hpe gaw n chye ai, hkala ai law ai dai ram sha lu tsun ai,” nga na shawng lam magam gun wa matut tsun ai re.
Tung Pung mare na shawng lam dap shara hpe lai wa sai January 28 ya shani pawng hpawm dap maga na htim gasat zing madu la lu wa ai rai nna, January 31 ya shani hta mung Myen hpyen dap maga na n-gun kaba hte naw htim gasat wa ai re.
Indaw muklum hpe lai wa sai 2024 ning August 16 ya shani kaw na htim gasat shagrawt nga ai gaw, gasat dat hkring dat rai na majan laja nga ai gaw dai ni ten du hkra rai nga ai.
Indaw majan a majaw, Myitkyina Mandalay lam kaba hpe PDF dap maga na pat da ai rai tim, Mawdaw la ni gaw, Nam lam hku na ding yang matut lai taw ai re.
Indaw majan hta Wunpawng Mungdan Shanglawt Hpyendap KIA woi awn ai hte NUG npu na PDF, Dingdung Jawng Ma dap ABSDF ni pawng hpawm nna htim gasat taw nga ai re.
