Ndai laman Jinghpaw Mung de Marang laja lana htu ai majaw, Waimaw Kanpaiti lam lapran lam gyi ru nna, hkrun lam hkawm n mai taw ai lam chye lu ai.
Lam gyi ru taw ai shara gaw, Sadung hte Lajawng mare lapran gyi ru taw ai re lam chye lu ai.
Lam gyi ru ai majaw, Mawdaw Sengke lai n mai mat ai sha n ga, Masha hkawm lai na matu pyi grai sadi na lai ra ai nga, ginra masha langai KNG shiga de n dai zawn tsun ai re.
“Shawoi hkan gyi ai gaw, Sengke ram sha gaw naw mai lai ai, ya gyi ai shara gaw Masha lai na matu pyi grai sadi ra sai, yawng ga hkang hkang taw sai, Dai ni kaw na Mawdaw gaw tsep kawp lai n mai mat sai,” nga tsun dan ai re.
Dai hpawt manap kaw na Sadung mare baw shara kaw gyi ru taw ai majaw, Mawdaw lai n mai mat na, Miwa gunrai htaw mawdaw shi kaba lam lapran pat hkrum taw ai hpe chye lu ai re.
Ya lam gyi ru ai shara gaw, Sadung Pa mare baw kaw rai nna, Myen Miwa gunrai htaw ginlen ai Mawdaw lam kaba langai re mung rai nga ai re.
Ndai lam kaba hpe bai gram na matu, n htoi bat lapran mi ram la nna, lam nnan bai htu baw nna she bai mai lai na masa nga ai lam chye lu ai.
Ya na zawn lam gyi ru ai gaw, Mawdaw kaba ni masat da ai namnak hta jan nna, rai htaw ai majaw, lam gyi ru ai masa lam re nga ginra masha ni tsun maram da ai re.
Myen Hpyen daru magam zing kau ai hpang dai lam hku na Nhprang rai ni htaw shalai bang ai sha n ga, Gasau n hkun hkan lang ai Dat Namhpun ni mung htaw shalai taw ai lam chye lu ai.
