Nawnglut Ginwang Dung (26) Ginra hta KIA Pawng hpawm maga htim gasat majan hpaw ai lam n nga tim, Myen Hpyen Dap hte SNA maga htim gasat taw ai majaw majan byin taw ai lam re nga ginra mung shawa ni KNG shiga dap de tsun dan wa ai re.
Lungtung mayan KIA dap jung tawn ai shara ni hpe Myen Hpyen dap hte Sam Hkyeng SNA ni lai wa sai June shata htum maga kaw na htim gasat taw ai rai nga ai.
June shata htum maga Myen Hpyen Dap hte SNA ni pawng nna KIA Dap de hpyen n-gun kaba hte htim gasat wa ai majaw, dap shara langai, lahkawng hpe yen kau ra ai lam hta lai nna, n dai laman gaw Myen hpyen maga matut bai htim gasat wa ai hpe KIA maga hkap shingla gasat ai majaw, SNA maga sum machyi law taw ai re lam ginra masha langai KNG shiga de ndai zawn tsun dan wa ai re.
“Anhte maga na gaw n dai laman htim gasat majan hpaw ai lam hpa n nga ai, Myen Hpyen hte SNA ni htim gasat ai hpe hkap shingla gasat ai kaw, SNA maga sum machyi law wa ai lam re,” nga tsun ai.
July 17 ya shani hta SNA maga Dung (26) de sa ai lam numbraw shara hpe htim gasat na matu Letpan lam numbraw shara shawng na dap shara hpe htim ai gaw, Umbush hkrup ai majaw sum machyi law wa ai lam re nga, hpyen magam gun hte ni nawn ai ni tsun ai re.
July 17 ya shani SNA hte Myen ni KIA PDF pawng hpawm maga shara la da ai de htu shadut sa wa ai majaw, sum machyi law wa ai hpe chye lu ai re.
Ya ten Nawnglut ginra, Lungtung mare kaw dung ai Myen hpyen dap hte Sam Hkyeng SNA dap ni gaw, KIA Dung (26) na shawng lam post ahkyak ai dap shara langai rai nga ai, Letpan lam numbraw(လက်ပံလမ်းခွဲ) hpe madu mayu ai majaw hpyen n-gun kaba jai lang nna, htim gasat taw nga ai re lam ginra masha ni tsun maram da ai re.
Sezin ginra de mung Myen hpyen dap hte SNA pawng nna KIA dap shara hpe htim gasat taw nga ai re.
Danai Hka lam hku Myen Hpyen Sanghpawli kaba 20 jan mung jinghpaw mung maga de man yawng na lung wa taw nga ai re.
