Nawnglut Ginwang, Lungtung kaw dung ai Myen Hpyen hpung hte Sam Hkyeng SNA ni pawng nna, KIA gasat zing da ai maga de htim gasat wa ai majaw, KIA zing da ai Post shara lahkawng hpe tat sum kau ra mat ai lam ginra masha ni kaw na chye lu ai.
July praw 3 ya jahpawt hkying 5 daram kaw na, Lungtung Myen hpyen dap kaw na shawng laknak kaba gap bun nna, Drone the bawm jahkrat bun ngut ai hpang lagaw dap hte hpyen n-gun kaba hku htu lung wa na, wa gasat zing kau ai re lam, Nawnglut ginra na Mung shawa langai KNG Shiga de n dai zawn tsun dan ai re.
“Ya hte manga ya jahpawt kaw na byin ai re, Myen ni shawng laknak kaba gap nna, Drone bawm bai jahkrat bun na hpyen n-gun kaba hte wa gasat zing kau ai re nga tsun dan ai, Huhpa Kung hte Pattamya Kung dai shara lahkawng re nga tsun ma ai. Dai shara ni gaw, Lungtung mare grup yin kaw sha re majaw aloi the lu zing kau ai ga rai nga ai, anhte maga na Kung Up Du langai mung asak ap nawng mat ai” nga tsun ai.
Samhkyeng SNA hte Myen hpyen dap ni gasat zing ai dap shara gaw, lai wa sai shaning kaw KIA PDF ni gasat zing madu la lu ai dap shara re lam chye lu ai.
Mamung Kai hte Lungtung mare lapran na Huhpa Kung hte Pattamya Kung shara lahkawng hpe tat sum kau ai kaw, KIA Dung (26) na Kung Up Du Maji Doi Awng myu hte mungdan a matu asak ap nawng mat ai lam nga ai hpe chye lu ai re.
Myen Hpyen dap maga na gaw, Sam Hkyeng SNA dap hpe zinlum la nna, Nawnglut ginra yawng hpe bai htim gasat na matu hpyen n-gun kaba jat da ai rai nna, Mungdan Sutgan a matu, Mamung Kai Mare yawng hpe Ja htu kau lu na matu dai makau grup yin na KIA PDF shara ni hpe shawng jasan ai masa re lam ginra masha wa matut tsun ai re.
Ya Myen ni gasat zing ai shara gaw, Lungtung makau grup yin na dap shara ni rai nna, KIA Dung (26) shara de du lu na matu gaw grai naw tsan ai lam ndai zawn matut tsun ai re.
“ Hepan lam numshe kaw gaw anhte maga na ni kring mading naw re, Lungtung ngut jang she Huhpa Kung mare du ai, dai Huhpa kung hte Lungtung gaw Deng 5 daram sha tsan ai, dai ngut jang she Hepan lum numshe du na.” nga tsun ai re.
Samhkyeng SNA ni gaw, Indaw Nawng a Sinpraw the Sinna lahkawng maga de hpyen n-gun jahpring nna, dai ginra yawng hpe gasat zing na matu hpyen n-gun kaba jat da ai lam matut chye lu ai re.
KIA Dung (26) Tung Pin mare de shang ai Hepan lam numshe shara kaw gaw dai ni du hkra KIA maga kring mading naw dung da lu ai lam chye lu ai.
Myen Hpyen hte SNA ni gaw, Hepan Lam Numshe shara de gasat wa na matu shakut taw ai masa lam re nga ginra masha ni tsun maram da ai re.
Ya ten dai ginra ni hta daru magam nga ai ni hte lauban ni pawng nna, ladu lai Ja htu taw ai ginra langai re zawn, Jinghpaw mung kaw na Ja pru dik ai ginra langai mung re lam chye lu ai.
Nawnglut ginra kaw Majan byin taw nga ai, dai ni hte rai yang n htoi 4 ya bai du wa sai rai nga ai.
Hpakant maga de mung Min Zay Thant Pyithutsit dap ni hpyen shamu shamawt ai lam ding yang galaw nga ai hpe chye lu ai.
Ndai kalang na hpyen masa lam hpe maram yu yang, Min Zay Thant Pyithutsit hpung ni Hpakant maga de na htu gasat yu wa nna, Sam Hkyeng SNA hte Myen hpyen ni pawng nna, Lungtung mare kaw na, Hepan, Nyaung Pin, Tamahkan maga de htim gasat wa na masa nga ai lam, hpyen masa yu maram ai ni tsun da ai re.
