Jinghpaw Mung, Wanleng lam n tsa na, Sah Maw mare na Hpung Up Sara langai hte Ma kaji marai 3 hte hpawn nawku jawng wang kaw nga taw ai hpung masha marai 30 daram hpe Sam hkyeng Pyithtutsit ni rim woi mat ai lam ginra masha ni tsun ai re.
July 8 ya shana hkying 5 aten daram hta sam hkyeng Pyithutsit hpyen la marai 30 mawdaw lahkawng the sa wa nna, Sah Maw KBC Nawku jawng wang de shang nna, dai kaw nga taw ai ni Hpung masha ni hpe adup gayet nna, Ma marai 3, Hpung Up Sara langai the kaga kyuhpyi taw ai kanu num hte ma ni yawng pawng marai 30 daram hpe rim woi mat ai nga Sah Maw buga masha langai KNG de ndai zawn tsun dan wa ai re.
“Samhkyeng Pyithutsit palawng hpun ai ni lawm ai, nkau nhpun ai ni mung lawm ai, Nawku Jawng wang de mawdaw the shang wa nna, anhte buga na gawgap hpa-awn wa hpe shawng baw abyen ya ai, dai ten hpyenla nkau gaw sinat shading nna makau hkan shara la da ya ma ai, dai hku nawku jawng grup grup shara la ngut ai hpang, nawku jawng wang kaw nga manga yawng hpe rim woi mat ai rim woi ai mung sumri hte gyit dun nna, she rim woi mat ma ai,” nga tsun ai.
Nawku jawng wang kata kaw nga taw ai Gawgap lithkam wa hpe baw adup ya ai hpang, ngam ai hpung masha ni hpe gaw, sinat hte shading madi da nna, dai kaw lagaw leng jawn nga ai Ma ni hpe du rim woi mat ai lam re nga tsun ai.
Ya rim woi hkrum ai hta Sah Maw Buga hpung hpung Up sara langai, gawgap lithkam Salang wa, dai kaw ginsup taw ai asak 5, 6, 7 ning re ai ma kaji ni, Kadin ginsup nga ai ramma nkau hte lusha gam kyuhpyi lamang kaw shang lawm nga ai kanu ni re lam chye lu ai.
Sam hkyeng Pyithutsit ni ya na zawn Nawku jawng wang kata de kam ai hku hpung masha ni hpe shang rim ai lam galaw ai majaw, ginra mung shawa ni myit tsang taw nga ai re.
Ya Sa rim ai Sam Hkyeng Hpyen hpung ni gaw, hpa majaw rim woi ai ngu lawng lam hpa mung n chye ai sha, mara kata mung shawa ni hpe dai hku adup abyen gyit nna, rim woi mat ai lam chye lu ai.
Ya ten dai mung shawa ni hpe gara shara kaw rim da ai ngu lam hpe a tsawm tup hkrak n chye lu shi ai re.
Ndai lam the seng na, Sah Maw Buga hpung ni kaw na, KBC Ginjaw rung de tsun shana tang madun da ai lam chye lu ai.
Lai wa sai 2024 ning March 31 ya shani hta mung Sah Maw Hk.L.Y (105) dap na hpyenhpung ni Jinghpaw ni law malawng nga ai Hka Nan lawk kaw Shayi Sharawt Kyuhpyi poi lamang langai kaw bungli sa du garum nga ai mung shawa marai 60 daram hpe rim woi mat ai mabyin byin lai wa yu sai re.
Dai kalang byin mat ai manghkang lam hta PCG lapran salang tai ya nna, yawng hkra ni a tsawm bai lawt pru wa lu ai re.
Ya n dai kalang Sam Hkyeng ni kaw na Jinghpaw Nawku jawng hpe shading na sa rim ai lam gaw, Sam Hkyeng Htunghking hpung na marai 4 hpe KIA maga rim da ai majaw, matai htang ai hku na, ya na zawn bai galaw wa ai masa re lam, mung shawa n kau tsun maram nga ai re.
