Myitkyina Mandalay lam lapran majan byin ai majaw, n dai shata laman mung shawa marai 7 si hkrum sai
Myitkyina Madalay lam lapran, majan byin nna Drone bawm a majaw, mung shawa marai 7 si hkrum nna, marai 10 jan hkala hkrum lai wa sai lam Mawdaw la ni kaw na chye lu ai.
Indaw Naba grup yin ni hta majan byin taw nga ai majaw, gara maga na drone re n chye ai, drone laknak kaba si hkrat bun nna mung shawa si hkala hkrum ai lam the seng nna, ginra mung shawa langai KNG shiga de n dai zawn tsun dan ai re.
“Majan byin sai hte gaw drone pyen sai, drone pyen nna gaw gara kaw kaning re ai ngu hpe a tsawm n maram yu ai sha, masha shamu shamawt ai mu ai hte gaw jahkrat sai, dai majaw mung shawa ni si hkrum ai rai nga ai,” nga tsun ai re.
Lai wa sai June shata 30 ya shani hta, Naba lam numbraw hku na Katha de sa wa ai ten, lam lapran kaw pat hkrum mat ai majaw, laknak kaba si hkra nna, asak si hkrum lai was ai re.
Dai hpang, July 7 ya shani hta mung, Naba ninghtawn, Kan Ni (ကမ်းနီ) mare baw kaw hkauna galau taw ai yan wa hpe mung Drone bawm wa hkrat bun ai majaw, dai shara kaw nan si hkrum lai wa sai re.
Hkauna galau taw ai kaw si hkrum ai gaw, asak 40 ning re ai Slg Nay Awng hte Kawa Asak 70 ning re ai U Jar ngu ai yan wa re lam chye lu ai.
Dai Drone gaw gadai gara maga na jahkrat bun ai ngu hpe chyawm gaw a tsawm tup hkrak nchye lu ai re.
Dai zawn sha, July 12 ya shani hta mung, Indaw Si Ping (စီပိန်း) mare na shan nu wa re ai mung shawa marai 3 mung sinat gap sat hkrum lai wa sai re.
Dai hkan nu wa ni masum hpe gaw, Si Ping hpungkyi jawng kaw dap jung nga ai Myen hpyen ni gap ai majaw si hkrum wa ai lam, dai ginra na mung shawa ni tsun ai re.
July 10 ya shani hta mung, Meza Le Naung Hpungkyi jawng kaw dap jung ai Myen hpyen hpung ni Pintache mare hpe bawm jahkrat bun ai majaw, Pintachye hpungkyi jawng na hpungkyi 3 the mung hpyen yen mung shawa marai 10 daram hkala hkrum wa ai hpe chye lu ai.
Dai jahpawt hkying 7 aten daram hta, Mawlu maga de na laknak kaba bai gap bun ai majaw, Pung Ho(ပုံးဟို) mare na asak 7 ning re ai ma kaji langai hkala hkrum wa ai hpe chye lu ai.
Ya byin lai mat ai lam ni yawng gaw, Myitkyina Mandalay lam kaba grup yin kaw byin lai mat ai majan ni hta rai nna, ya matut nna dai ginra ni hta majan naw byin nga ai majaw, Mawdaw lam kaba hpe matut pat da ai re.
Mawdaw lam kaba hpe pat da ai majaw, namkoi lam ni yawng marang htu lam nya hkawm sa n mai na, lam lapran mung shawa mawdaw hkying hku pat hkrum taw ai hpe chye lu ai.
