Putau Ginwang Makat Mung Mare na Mung Shawa ni a hkauna kaw ja htu nga ai lam hpe ginra mung shawa ni ja ja ninghkap taw nga ai rai tim, ja htu lauban hte Mare Salang ni pawng nna Ja matut htu na hkyen taw ai lam ginra masha ni tsun ai re.
Putau muklum a sinpraw maga Muklum the deng 5 jan tsan ai Makat Mung mare hpe Mare Uphkang Salang hte Jahtu lauban ni pawng nna, mung shawa ni a hkauhting hkauna lamu ga shara ni kaw Ja htu na matu hkyen taw ai hpe ginra masha ni ja ja ninghkap taw ai rai tim, lauban ni gaw htu na matu hkyen taw ai lam tsun ai re.
“Ya law law se gaw rai n htu shi ma ai, rai tim mung htu na matu rai ni yawng hkyen shajin da masai, Back Hold lahkawng ma shadu da masa, makau kaw gaw dai ning laman hkai da ai hkauna mam ni tu taw ai dai hkauna yep re shara kaw htu na matu hkyen nga ma ai,” nga tsun ai re.
Putau ginra masha law malawng gaw, Hkauhting hkauna galaw sha na hkrai, kan bau ai mung mare masha ni re majaw, ya na zawn hkauna lamu ga ni hpe ja htu wa ai majaw, mung shawa yawng jawm ninghkap taw ai rai nga ai.
Ginra mung shawa ni tsun dan ai gaw Makat Mung mare na Mare Salang wa hte Ja htu lauban, hkauna madu n kau pawng na, Makat Mung hte Putau lam kaba makau hkauna yawng Ja htu na lam hpe June shata kaw na hkyen shajin taw sai lam chye lu ai.
“Mawdaw lam makau yawng Hkauna lamu ga ni hkrai re, nkau gaw mam hkai da ai, n kau gaw nhkai da ma ai, Ja htu na matu yawng dut da ngut masai, nkau gaw ndut mayu ai Mam hkai da ai, law malawng gaw nkam dut ai rai tim, tinang hkauna makau na wa dut jang gaw kaning n di na dut kau ra ai ni mung nga ai nga,” matut tsun ai re.
Ya ja htu na matu hkyen nga ai shara hta Hkauna lamu ga, Eka 50 daram nga ai hta na Eka 20 kaw ja htu na matu hkyen shajin taw nga sai re.
Hkauna lamu ga ni yawng matut na nga ai hkauna lamu ga ni hkrai re majaw, langai gaw dut nna, ngam ai langai wa gaw ndut ti mung, hkauna hka mayak lam ni nga wa na re majaw, n kam tim dut kau ra ai masa lam ni byin taw ai hpe chye lu ai.
Ndai lamu ga the seng na, lit nga ai Asuya ni kaw na sa du jet joi na lam tsun ai rai tim, dai ni du hkra hpa laklai wa ai lam mung n nga shi ai hpe chye lu ai.
Putau ginra hta Myen hpyen daru magam rai n zing shi ai ten mung shawa ni mai byin dang di ai hku lata Honda kaji ni the ja htu sha ai lam nga ai rai tim, daru magam zing kau ngut ai hpang, Jak kaba ni hte Ja htu sha ai lam ni grau law wa ai majaw, Putau makau, Machang Baw, Nawng Hkaing, Makat Maw, Mularshidi shara hkan na lamu ga ni ma mat wa sai re.
Makat Mung mare gaw n ta htinggaw 60 jan nga ai mare kaji langai re lam chye lu ai.
