Shwegu ginwang အထက် ၄ လမ်းဆုံ၊ အောက်၄လမ်းဆုံ shara ni kaw, dai na maga hkying 4:30 Pm ten kaw Y12 Nbungli bawm hkan jahkrat taw nga ai lam, ginra masha langai KNG shiga de tsun dan wa ai re.
“Dai na maga de hkying 4 chyen kaw mung အထက် ၄ လမ်းဆုံ၊ အောက်၄လမ်းဆုံ shara ni kaw Y12 nbungli hte bawm hkan jahkrat bun hkawm nga ai,” nga tsun ai re.
Myen Hpyen Hpung ni Katha Mawlu hpe gasat zing ngut ai hpang, Shwegu maga de htim gasat taw nga ai ya shata lahkawng hkawt na wa sai re.
Myen hpyen maga na Shwegu hpe gasat zing lu na matu, Malihka sinpraw, Sinna lahkawng maga hku na htim gasat taw nga ai re.
Lai wa sai Shata kaw Myen hpyen maga nbungli hpyen n-gun kaba hte laja lana htim gasat wa ai majaw, KIA PDF pawng hpawm dap maga dap shara n kau hpe gan tat sum kau ai rai tim, n dai laman hta dai gan tat sum kau ginra ni yawng hpe bai gasat la lu sai lam Shwegu ginra masha wa n dai zawn tsun da ai re.
“Moi ya dai gan yen kau da ai Lambraw yang, Nyaungpin Kwi, Manwin Lay ndai shara ni kaw PDF hte Shanglawt ni shara bai la kau sai majaw, Mandalay kaw na Mawdaw ni Shwegu de nmai shang mat sai, Shani shagu n tsa kaw na Y12 the Bawm ding yang jahkrat bun nga ding yang re, dai hpawt mung ngoi ai, dai na maga mung bai pyen gayin na jahkrat kau da sai,” nga tsun dan ai re.
Ahkyak ai shara n kau hpe KIA pawng hpawm maga na bai gasat zing kau lu sai majaw, Katha hte Shwegu lapran mawdaw lam kaba hku pru shang n mai sai lam matut tsun dan ai re.
Lagaw lam hku htim ai Myen hpyen maga sum machyi law ai majaw, n dai laman gaw, lagaw lam hku n htim ai sha n bungli kaw na laknak kaba hpan hkum jahkrat bun taw nga ai lam matut chye lu ai.
Myen hpyen nbungli kaw na jahkrat ai bawm law malawng gaw, pound 500 kaba ai Bawm law malawng rai nna, Pound 1000 daram kaba ai bawm ni the mung jahkrat bun ai lam nga ai hpe chye lu ai re.
Ya ten Shwegu muklum kata na mung shawa htinggaw 300 daram gaw tinang man ang ai de hprawng yen taw ai rai tim, Mung Shawa law malawng gaw muklum kaw naw nga taw ai hpe chye lu ai.
Jinghpaw Mung Sagaing jarit mayan na ginra ni hpe Myen hpyen ni bai gasat zing madu kau ma wa ai the rau, Jinghpaw mung Manmaw hpyen man a matu ahkyak dik Shwegu hpe htim gasat nga ai gaw, dai ni ten du hkra shani shagu nbungli bawm sa jahkrat bun nna, htim gasat taw ai rai nga ai.
