Masat Shadaw (30) Sha Ga Di Mare Hpe KIA Pawng Hpawm Dap Ni Gasat Zing Madu La Lu
Jinghpaw Mung Dingdung, Hkawnglan Hpu Ginwang Miwa Mung Jarit Masat shadaw (30) Sha Ga Di Mare hpe Wunpawng Mungdan Shanglawt Hpyendap KIA hte Rawang KPF Pawng hpawm Dap maga dai ni gasat zing madu kau lu sai lam, shawng lam hpyen shi sawk ni kaw na chye lu ai re.
Hkawnglanhpu Shing Hkawng mare makau Sha Ga Di Mare hpe Wunpawng Mungdan Shanglawt Hpyendap KIA KPF pawng hpawm ni lai was ai June Shata htum wa mahka kaw na htim gasat ai ya shata mi hkawt htim gasat ai hpang, Sha Ga Di Mare hpe gasat zing la lu wa ai lam re nga, shawng lam hpyen magam gun hte matut mahkai nga ai magam gun langai KNG shiga de n dai zawn tsun dan da ai re.
“Miwa Mung Jarit Masat shadaw (30) Sha Ga Di Mare hpe anhte maga na ni zep zi rai sai lam shana wa ma ai, Dai shara hpe htim gasat ai Ya Bat 3 daram rai sai ga rai nga ai,” Dai ni gasat zing la lu sai, ya gaw anhte maga na Lusha gun sha loi tsamai sai,” nga tsun dan ai re.
Ya Gasat zing la lu ai Masat shadaw (30) shara gaw, Shing Hkawng Mare the ni dik shara rai nna, Hkyen hkrat Katsi dik ai ginra langai re sha n ga, Bum tsaw ni hte hkrai shinggrup gawan da ai ginra langai mung rai nga ai.
Dai shara gaw, Miwa gumsan mungdan hte Jarit rau yep re ai ginra shara langai re majaw, ahkyak ai jarit gate langai bai gasat zing la lu sai ga rai nga ai lam, shawng lam hpyen magam gun langai n dai zawn matut tsun ai re.
“ Jarit gate langai bai gasat zing jat la lu sai ga rai nga ai, Ya anhte ndai ginra de gaw hkrunlam yak ai Bum marawn ni hkrai re ai, Bum alang hpe lai di nna lusha gun sha ra ai yak dik ginra re, ya Miwa Mung Jarit hpe bai lu gasat zing la jang gaw anhte na matu lusha gun sha dai daram n yak sai, kabu pyaw ai le,” nga tsun ai re.
Sha Ga Di Mare hpe htim gasat ai hta KIA Pawng hpawm maga sum machyi lam ni mung nga wa ai re.
Myen Hpyen maga na hpyen bawng masha jahkrung lu rim ai ni nga ai sha n ga, laknak machyu pala alaw alam hpe mung padang dip zing madu la lu ai lam nga ai hpe chye lu ai re.
Dai ginra gaw law malawng Rawang bawsang ni nga ai ginra re lam chye lu ai.
