Manmaw Dingsing Pa ginra hta Wunpawng Mungdan Shanglawt Hpung KIO kaw na, dai ginra hta ga sau htu a lam hpe jahkring kau ya ai laning mi hpring sai majaw, dai ginra na mung shawa ni shawoi na zawn wang lu wang lang galaw lu galaw sha taw sai lam, ginra masha ni tsun ai re.
Dai ginra hta lai wa sai laning mi jan kaw KIO kaw na ga sau htu ai lam hpe n’gun dat galaw na matu hkyen wa ai hpe ginra masha ni kaw na ja ja ninghkap wa ai majaw, 2023 ning April 15 ya shani Mai Ja Yang muklum hta KIO Ningbaw Kaba Dukaba Nban La kaw na tara shang yawng jahkring kau ya ai rai nga ai.
“2023 ning April 15 ya shani Ningbaw kaba Nban La kaw na, ga sau htu ai lam hpe tara shang jahkring kau ya ai, dai ni nga yang laning mi ladu hkrum sai, dai ni du hkra tsep kawp n htu mat ai, dai majaw KIO ningbaw kaba hpe mung chyeju dum ai, shiga dap ni hpe mung chye ju dum ai lam tsun mayu ai,” nga tsun ai re.
Ya na zawn mung shawa n’sen hpe madat let, dai ginra ga sau htu ai lam hpe jahkring kau ya ai majaw, chyeju dum ai lam hte, ga sau htu ai lam hpe ninghkap ai hta shang lawm garum ya ai ni yawng hpe grai chye ju dum ai nga, ginra masha ni tsun wa ai re.
Dingsin Pa ginra hta ya na zawn ga sau htu ai lam hpe jahkring kau ya ai majaw, du dep na ten na mung shawa ni a hkam ja lam, galaw lu galaw sha lam ni hta myit tsang lam hpa n nga sai nga matut tsun wa ai re.
Dai ginra hta ga sau htu chyam yu na matu Miwa Company ni hpe KIO kaw na lai wa sai 2022 ning December shata hta ahkang jaw wa ai re.
Ya na zawn ahkang jaw wa ai hpang, mung shawa n-gun kaba hte ning hkap wa ai majaw, KIO asuya kaw na bai dawm jahkring kau ya ai lam mung rai nga ai.
Ya ten Nmawk hte Loi Je lapran N Hkawng Pa hte Sinlum bum makau na Byen Woi mare, Lagat Bum mayan hta shani shana matut htu taw nga ai re.
Sinlum bum mayan hta mung, ga sau htu wa na hpe myit tsang ai mung shawa ni kaw na, ga sau n htu na lam ninghkap pyen dau ni shakap da ai hpe mu lu ai re.