Jehkam Majan Ten Laman Dum N’ta Hten Mat Ai Mung Mare Masha Ni Rai Nlu Nhtang Wa Shi

Manmaw hte Mandalay lam kaba lapran na Je Hkam Mare hta, Majan ten laman dum n’ta 40 jan hten mat ai majaw, ya ten du hkra dai ginra na mung mare masha ni dum n’ta rai n lu wa shi ai re.

Lai wa sai February shata hta Je Hkam Myen hpyen dap hpe Wunpawng Mungdan Shanglawt Hpyen dap htim gasat zing madu ai hta dai mare na dum nta law malawng Myen hpyen dap laknak kaba si hte nbungli bawm ni a majaw hten mat ai rai nga ai.

Mare de mung shawa law malawng lai wa sai 10 ya ram kaw na bai n htang wa lu sai rai tim, dum n’ta hkru hten mat ai mung mare masha ni gaw, ya ten du hkra rai n lu wa shi ai lam dai ginra na mung shawa langai KNG de tsun dan ai re.

“Law malawng gaw bai shang sai, lai wa sai 10 ya jan ram kaw na wa nga taw sai, dum n’ta tsep kawp hten mat ai ni gaw, nga na shara n lu shi ai majaw, nhtang wa lu ai lam rai n nga shi ai, dum n’ta gaw gap la na mung majan bai byin wa na kun ngu hpe myit tsang na, ya du hkra hpa gaw gap ai lam mung rai n galaw shi ai,” nga tsun ai re.

Je Hkam mare hta, majan zim ai shata mi jan na sai rai tim, dum nta n lu mat sai ni a matu gaw, mare de bai wa nga na matu yak hkak taw nga ai rai nna, dai mung mare masha ni dum nta ba gap gap la lu na garum ning tum ra ahkyak taw nga ai re.

Ya na zawn dum nta hkru hten mat ai majaw, wa gan rawng shingbyi na kawa nta zawn re sha rai tim, gan gap rawng na garum ningtum ra taw nga ai nga, matut tsun dan wa ai re.

Dai mare na mung mare masha ni gaw, majan galoi bai byin wa na kun ngu ai hpe myit tsang ai sha n ga, mare kaba nbungli bawm bai wa jahkrat bun na hpe myit tsang ai majaw, dum nta gaw gap ai lam hpe rai n galaw shi ai nga tsun ai re.

Je Hkam mare hpe KIA hte KPDF pawng hpawm let, lai wa sai February 19 ya shani hta htim gasat zing madu kau ai rai nna, ya ten dai ginra hpe KIA maga up hkang taw nga ai re.

KIA up madu nga ai ginra hta, Myen hpyen dap maga na hpyen shamu shamawt ai lam ni ding yang nga taw ai majaw, majan bai byin wa na masa nga ai lam ginra masha ni tsun maram taw nga ai re.