Hpakant Kasen Bum Myen hpyen byuha dap hpe, KIA dap maga htim gasat zing madu la lu sai lam Dukba Naw Bu tsun ai re.
Kasen Bum Myen hpyen dap hpe KIA Dung 6 ni, dai na maga hkying 5 daram aten kaw na sa htim gap gasat ai hta, dai na maga de hkying 6 chyen daram hta htim gasat zing madu kau lu ai re lam Dukaba Naw Bu tsun ai re.
“Dai ni gaw Hpakant Kasen Bum hpe dai na maga de hkying 6 daram hta zing la lu ai, ngut na Loi Mawk Yang maga de ma pang dip lu ai lam nga ai, dai ni gaw dai daram sha re,” nga Dukaba Nhpang Naw Bu tsun ai re.
Kaen Bum kaw na yu wa ai Myen hpyen hpung ni hpe dai hpawt manap Nam Maw mare makau kaw hkap shing la gasat ai hta mung Myen hpyen dap maga sum machyi lam ni law wa ai re.
Tamahkan Myen hpyen dap kaw na hprawng pru wa ai Myen hpyen hpung ni hpe, lam lapran shara lahkawng kaw hkap shingla gasat hkrum ai hpang, Kasen Bum Myen hpyen dap hpe bai htim gasat ai hta, dai na maga de htim gasat zing la lu ai rai nga ai.
Kasen Bum hta Tamahkan kaw na hprawng yen pru wa ai Myen hpyen hpung ni wa du hprawng yen taw nga ai dap shara rai nna, dai dap shara hpe htim gasat ai hta, Myen hpyen dap maga, တပ်ရင်မှူး ဒုတိယဗိုလ်မှူးကြီး langai mung si ai rai nna, laknak machyu pala ni mung zing madu la lu wa ai lam chye lu ai.
March 9 ya jahpawt hkying 7 daram hta mung Tamahkan kaw na hprawng gale pru wa ai Myen hpyen hpung 70 jan hpe, Kasen Bum makau KIA KPDF pawng hpawm dap ni hkap shingla gasat ai hta hkying hkum lahkawng daram laja lana gap gasat hkat wa ai re.
Dai gap gasat hkat ai hta Myen hpyen dap maga sum machyi lam ni law wa ai majaw, Seng Tawng maga na Mawdaw 5 hte sa tau la ai ten, Nam Maw mare shingdu maga hta kalang bai hkap shingla gasat hkrum wa ai re.
Kasen Bum Myen hpyen dap hpe KIA dap maga lai wa sai 2023 ning August shata hta kalang htim gasat zing madu kau lu sai shara rai tim, KIA maga dap jung shara jahkrat ai lam n galaw ai majaw, Myen hpyen dap ni bai wa du dap jung ai shara rai nga ai.
Ya na zawn Myen hpyen dap ni bai wa du dap jung ai hpe KIA dap maga kalang bai htim shagrawt kau ai lam mung rai nga ai.