Bu htawt masha shata 3 na yang, du ai shara hta Me bang mai ai hpe KSPP ninghkap
2020 ra lata poi e, Bu htawt bungli galaw masha ni hpe dai shara hta du ai shata (3) na sai teng yang, Me bang na ahkang jaw na lam ntsa Myit n hkrum ninghkap mat na re nga nna, mungdaw daju Kachin State People’s Party KSPP tsun ai re.
Mung hpawm ra lata poi komishin gaw shi a ahkang aya hte shawng ningnan lang gram ai ra lata poi hte seng ai upadi hpe October praw 3 ninghtoi hte gram nna Pyithuhluttaw hte Amyotharhluttaw de ndai bat laman sa dat ai hta lawm ai re.
“Bu htawt bungli galaw masha ni hpe Me bang shangun ai ngu gaw njaw ai law. Shanhte a dinghku jahpan rawng ai ginra hta she Me bang ra ai. Mungchying masat lekmat hte sha nmai galaw ai. Dai re majaw, kadai raitim mung tinang dinghku jahpan nga ai ginra kaw she Me bang ra ai” Nga nna Jinghpaw Mungdaw Mungshawa Party KSPP ningbaw Dr. Manam Tu Ja tsun ai re.
Jinghpaw mungdaw gaw Myen mung ting hta Bu htawt bungli galaw masha law dik rai nna sut nhprang pru ai Hpakan, Danai hta sha n-ga Miwa langu sun wang ni hta bungli galaw masha sen kaba du nga sai re.
Dai re majaw kadai mung tinang dinghku jahpan rawng ai buga de nhtang wa nna, Me bang gying ai lam Dr. Manam Tu Ja matut tsun ai re.
Shata 6 (nhtoi 180) kaw nna shata 3 (nhtoi 90) de shayawm kau ai majaw ra lata poi hta ginra daju Jinghpaw Party ni matu akyu nnga na tsang ai majaw, ndai hpe ninghkap na nga nna rapdaw dat kasa langai tsun ai re.
“hkawm wa hkawm sa masha ni hku nna anhte mungdaw de Me bang ai ladat hpe gaw nkam galaw shangun mayu ai. Raitim, ya 180 nrai nna, 90 ngu de bai htawt yang, anhte mungdaw kaw nhprang sut rai htu taw nga ai lawu mung na ni grai du rai yang gaw anhte amyu sha party ni a ahkaw ahkang gaw tsawm ra mi sum wa na masa de du wa ai. Dai hpe mung ngai gaw gram mayu ai hku re law. Nlaw htum mi na 180 de naw tang na matu yaw nga ai.”nga nna Njang Yang Pyithuhluttaw dat kasa Slg. Lama Naw Awng tsun ai re.
Mungdaw asuya hku nna mung Bu htawt bungli galaw masha nkau hpe dinghku jahpan hte mungchying masat galaw ya ai lam ni nga ai re.
Mungdaw simsa lam n lu ai ladaw, mungmasa lam hta ahkyak ai ra lata poi hta jasam amyusha bu htawt masha ni hpe tinang mungdaw kata Me bang na hkang jaw ai gaw manghkang kaba byin mai ai lam tsun ai re.
“Mungdaw daju amyusha party a matu gaw challenge kaba rai nga ai. Hpa na nga yang, Bu htawt bungli galaw masha gaw Hpakan, sha n-ga shara magup hkan na grai law ai. Dai ni gaw anhte amyusha nre sha, kaga amyusha ni hkrai rai nga ai. Dai re majaw, ginra daju Kachin Party ni na matu gaw grai challenging kaba rai nga ai. Hkrit tsang ra nga ai.” nga nna Myitkyina mare kaba daju tara kasa Hka Bung tsun ai re.
Jinghpaw mungdaw mungshawa Party KSPP gaw ya yang mungdaw shara shagu hta shi a rung lakying ni hpe hpaw ninghtan sai rai nna, 2020 ra lata poi e ginwang yawng hta dang na matu shakut nga ai lam chye lu ai.
