KIO Uphkang Dap hpaw ja jubili poi galaw

KIO Uphkang Dap (DGA) Hpaw 50 ning hpring golf ginsup poi, Nov. 7-8, 2019, Laiza

Myen mung asuya hte majan naw byin nga ai masa kata, Wunpawng Mungdan Shanglawt Hpung (KIO) gaw Mungchying Uphkang Dap (DGA) hpaw ai 50 ning hpring ja jubili chyeju shakawn lamang hpe tinang ginjaw Laiza muklum e du na bat galaw na re.

Ndai poi gaw 2011 ning majan ningdaw kalang bai byin wa ai 8 ning hpang KIO a kaba dik poi rai nna, Myen asuya hte gap hkat jahkring lam ntsa ahpraw achyang dawdan ra ai mungmasa lambraw kaw du nga ten, ndai poi kaba galaw ai lam mung rai nga ai.

Kadun hku DGA ngu law chye ai Uphkang Dap (Department of General Administration) hpe 1969 ning hta hpaw ai raitim shata hte nhtoi hkrak n chye ai majaw masat nhtoi n lu masat shi ai re.

DGA hpaw 50 ning hpring chyeju shakawn akyu hpyi lamang hpe Nov. 14-15 hta galaw na hkyen da ai re.

Yungwi Pinra hte Ka Hkrang Shingjawng Poi hpe gaw jau nna Nov. 13-14 hta galaw na hkyen da ai re.  Ndai lamang de Laiza shinggan na shingni hpung hte yu ngwi shayi shadang ninghkrin ni hpe mung saw shaga tawn ai hpe mu lu ai.

Bai nna, Laiza gulf pa e gold ginsup poi hpe gaw Nov. 7-8, daini bat Mali Ya shani galaw nna ginsup hpang nga sai re.  Dai poi de golf ginsup sa ai Myitkyina de na mawdaw 20 jan gaw mani bat Masum Ya shana de Nam San Yang kaw nna Laiza de lai shang wa sai lam chye lu ai.

17-ning simsa lam hten nna, 2011 ning June praw 9 ya shani Myen hte bai byin wa ai shanglawt majan a majaw, pru wa ai hpyen yen sen mi jan nga ai kaw mun tsat jan gaw Miwa ga jarit KIO uphkang ginra ni hta shiangbyi nga ai re.

KIO gaw ‘hpyen wa’ hte gap jahkring nhtawm hpyen yen ni tinang dum nta nhtang wa ai lamang hpe galaw nna saboi ntsa mungmasa bawngban mahtai tam lu hkra shakut nga ai lam, Ginjaw Komiti Tingnyang Up Dukaba Nban La a Oct. 25, KIO a 59 ning hpring shatsam mungga hta mu lu ai re.

0 Reviews

Write a Review

Read Previous

Hpyen yen amyu shayi ni shapraw ai gun rai madun dut poi galaw

Read Next

Bu htawt masha shata 3 na yang, du ai shara hta Me bang mai ai hpe KSPP ninghkap

Leave a Reply

Your email address will not be published. Required fields are marked *