All posts by KNG

Shiga

KIA Wunkat yu PDF ramma marai 4, Hopin Muklum kaw rim hkrum

Leave a comment

Wunpawng Mungdan Shanglawt Hpyendap KIA ginra kaw hpyen wunkat yu la nna, tinang ginra Sezin Mare de bai n htang wa ai PDF ramma marai 4 hpe, Myen hpyen dap gaw Hopin Muklum hta laknak hte hpawn rim kau dat sai lam chye lu ai.

Rim hkrum ai ramma marai 4 gaw August 16 ya shana maga hkying 5 ram aten, tinang mawdaw hte Sinat laknak M – 79, 40 mm bawm si, pala n kau hte hpawn Hopin muklum kata kaw rim hkrum mat ai re lam, lit nga ai PDF ni KNG shiga dap de tsun shateng ai.

“Rim hkrum ai lam gaw teng ai. Wunkat yu na Sezin mare de bai n htang wa ai ten Hopin Wan Leng lam makau kaw rim hkrum mat ai re. Shan hte rim hkrum ai hta sinat laknak ni mung lawm mat ai, rai tim grai law hkra gaw n re,” nga PDF na lit nga ai ni KNG de tsun dan ai re.

Jinghpaw mungdaw ginra ni hta n dai laman PDF ramma ni rim hkrum ai lam law taw ai rai nna, dai zawn rim hkrum ai gaw, Myen hpyendap hpe shiga jaw ai masha (ဒလန်) ni a majaw rim hkrum ai law taw ai lam Mung Shawa Makawp Maga Dap PDF maga de tsun ai.

Ndai shata 10 ya jan hta mung Myitkyina Chya Ra Pa Ti lawk hta Myen Dalan ni shiga jaw ai majaw, Myen hpyen n gun kaba hte sa wang gap ai hta, PDF maga de na marai 6 asak si sum nna, marai 1 hkala hkrum wa ai lam mung byin wa sai.

Shiga

Hpakan kaw N-gun Madun ai Mung Shawa marai 8 hpe rim nna, tara jewat da

Leave a comment

Hpakant gumshem Myen hpye  dap hpe ning hkap n gun madun ai mung shawa marai 8 hpe tara kanu amyu myu masat let tara jewat da ai lam chye lu ai.

N gun madun na rim woi hkrum ai kaw na, amyu shayi marai 5 hpe tara kanu masat 505  hte tara jewat ahkyak la da ai lam chye lu ai.

Rim hkrum ai marai 8 hta marai 7 gaw amyu shayi ni rai nna, dai ni gaw San Chyoi mare na rai nna, Salang Thein Htun gaw Seng Tawng mare na myit su kanu kawa langai hku na shanu nga ai wa re lam chye lu ai.

Maw Mung ginra masha langai KNG shiga dap de tsun dan ai gaw, “Shan hte hpe tara jewat ai gaw lai wa sai August 9 ya shani hta jewat da ai hpe n dai hpang daw she chye lu ai rai nna, dai hta lawm ai amyu shayi ni hpe gaw tara kanu masat 505 (A) hte jewat ai. Rai na, Salang Thein Htun hpe gaw 505 sha n ga laga laknak hpai ai tara kanu the mung jewat da ai re” nga tsun ai.

Dai marai 8 hpe du wa na August 19 ya shani Hpakant tara rung hta shawng ningnan rung shapraw san jep hpang wa na re lam matut chye lu ai.

Dai ni gaw lai wa sai July 13 ya shana maga hkying 5 ram aten Seng Tawng mare hta n gun madun ngut na bai wa ai lam hta rim hkrum ai re lam chye lu ai.

Dai marai 8 hpe rim ai hta lawm ai Hpakant Balik dap dung 30 na Balik Du jum langai hte  balik ma marai 2 mung n dai shata praw laman Hpakant Seng Tawng KBZ Bank makau hta gap sat hkrum wa sai.

Shiga

Myen hpyen dap Nam Si Aung hte Deng 21 Shagyit hta, laja lana gumhpraw hta sha nga

Leave a comment

Sagaing hte Jinghpaw Mung jarit Nam Si Aung Shagyit hte Myitkyina Deng 21 Shagyit hta dung ai Myen hpyen dap ni kaw na, lai sa lai wa mung shawa ni hpe shawoi na hta htam 3 jan nna, gumhhpraw hta sha taw nga ai lam, hkawmsa ni kawn chye lu ai.

Ndai August shata laman dai shagyit kaw na lai yang, jat nna gumhpraw hta sha taw ai sha n-ga, matsa mawa mung hkrum sha nga ai lam hpe, Myitkyina Mandalay lam gau ai Mawdaw la langai KNG shiga dap de tsun ai.

“Nam Si Aung hte Myitkyina Deng 21 pawng hpawm shagyit hta dung ai Myen hpyen dap ni shawoi 3000 jaw ra ai rai yang, n dai hpang de 10000 jaw ra ai, gumhpraw mung jaw ra, shan hte roi sha ai hpe mung hkam ra, ngu ai hku mung hkan ra, kalang lang bai matsa katut, dai hku na galaw sha ra ai ga rai nga ai” nga tsun wa ai.

Mawdaw la ni tsun ai hku rai yang, shagyit langai mi hta, Nang hpam Balik ၊ Ninggawn uphkang dap၊ Hpyen dap၊ Masha pru shang gawn hkang dap hte Mawdaw BK ni pawng hpawm da nna, mawdaw langai lai yang 45000 ram du hkra jaw taw ra ai lam chye lu ai.

Gun rai htaw mawdaw ni hpe dai zawn gumhpraw jat hta taw nga ai sha n ga, dai shagyit hta sin ai Myen hpyen la ni mawdaw la ni hpe hkan matsa ai lam ni jahkring hkring hkrum sha nga ai re lam chye lu ai.

Yangon Mandalay hkan na lung wa ai gunrai htaw mawdaw kaba ni Jinghpaw mung du shang wa ai hte Nam Si Aung gate hte Deng 21 gate dai shara lahkawng hta gumhpraw mun 9 ram jaw taw ra ai re lam matut sagawn chye lu ai.

Shiga

Pyi Thu Tsit Dap ni, Mare masha nta ni hpe atik anang htawt sit shangun

Leave a comment

Jahtu Zup Sanpya mare hta dap jung nga ai Salang Min Zin Tant Pyi Thu Tsit dap gaw, Wunpawng Mungdan Shanglawt Hpyendap KIA ni a sa htim gap gasat hkrum ai hpang, dap shara hte ni ai nta hpe 5 ya laman htawt sit na matu matsun jahkrat wa ai lam chye lu ai.

Pyi Thu Tsit dap the Miter 300 ram sha gang ai Salang Lamung Tang Gun a n ta hpe gaw n dai laman lawan htawt sit na matu, August 13 ya shani mare salang ni hpe shaga la nna, tsun sha ngun wa ai lam Sanpya ginra masha langai KNG shiga dap de tsun dan ai.

“Min Zin Tant hte hkrum wa ai Mare Salang ni kaw na, Salang Lamung Tang Gun hpe Phone shaga wa ai, Salang Tang Gun a n ta hpe n htoi 5 ya laman lawan htawt sit ya na hku nga na tsun wa ai, laga San Pya Pyi Thu Tsit dap hte ni a n ta ni mung htawt sit na hku nga na tsun ai, gadai gara n ta ni lawm ai hpe chyawm tup hkrak n chye shi ai nga”, San Pya mare masha langai KNG de tsun dan wa ai re.

Dai n ta shara gaw, lai wa sai 10 ning jan kaw na sun galaw let kring mading rai nga wa ai n ta rai nna, dai zawn lawan htawt sit na matu nmai byin ai majaw, hkrit tsang nga ai lam n ta madu Salang Lamung Tang Gun KNG shiga dap de ya na zawn tsun dan ai re.

“Ngai nan mung laknak hpai ai gara wuhpung hpe raitim hkrit ai re majaw, n ta htawt shangun ai lam hte seng na, n ta yawng tsep kawp hpya htawt kau ai lam n re sha, masha gan yen ai hku na sha myit daw dan da ai, shanhte tsun ai hku n ta yawng run la na htawt na hku gaw, ya ten gara hku ma n mai byin shi ai, dai zawn n mai byin ai lam hpe mare myitsu kanu kawa ni hpe mung bai tsun dat sai” nga ai re.

Salang Tang Gun sha n ga Pyi Thu Tsit dap the ni ai n ta n kau hpe mung lawan htawt sit na matu tsun sadi jaw da ai lam nga ai rai nna, Awng Ra, San Pya mare makau grup yin hta hkau na galaw ai mung shawa ni mung hkau na yup sin ai lam n galaw na matu tsun da ai lam nga ai re hpe matut chye lu ai.

Majan bai byin wa ai rai yang, Pyi Thu Tsit dap maga de na lak nak kaba ni hpe wang lu wang lang gap bun lu na matu, ya kaw na tau hkrau yen da shangun ai re lam Jahtu Zup ginra masha langai KNG de matut tsun dan ai.

“Madung gaw shan hte Mung shawa ni nga yang laknak kaba wang lu wang lang n lu gap ai, Mung shawa ni n nga jang she shan hte wang lu wang lang laknak kaba ni lu gap ai. Dai gaw hpyen masa lam a majaw re ngu mu ai”

San Pya mare hta nta hting gaw 500 jan nga ai hta n ta 100 jan nga ai shara makau hta San Pya Pyi Thu Tsit dap hpe lai wa sai 2019 ning hta gap da ai re lam chye lu ai.

Ndai shata 11 ya jahpawt Pyi Thu Tsit dap sa htim gap gasat hkrum ai hpang August 13 ya jahpawt Awng Ra hte Sanpya mare na myitsu salang 3 hpe Min Zin Tant shaga woi hkrum ai rai nna, mare masha n kau hte KIA hpe tsun sadi jaw ai lam ni nga wa ai lam chye lu ai.

Shiga

Myen Hpyen Dap ni, Putao Ginra na Asak 18 Ning Hpring Mying Jahpan hta kyin nga

Leave a comment

Putao ginra hta asak 18 ning hpring sai ni hpe mung chying masat galaw ya na ngu tsun nna, mying jahpan ni hpe Myen hpyen dap kaw na hkan hta gahkyin hkawm taw ai lam chye lu ai.

August 10 jan kaw na, Putao ginwang uphkang rung a matsun hte ninghtawn, mare, lawk shagu hkan hta ga hkyin kyin hkawm taw ai lam Putao Kawng Kahtawng na mung shawa langai KNG de ya na zawn tsun dan ai re.

“Mung chying masat galaw ya na nga na, n ta masha jahpan ni hpe mani hta mat wa ai, n dai n ta hta 18 ning hpring sai marai gade nga ai kun? Mung chying masat gadai rai n galaw shi ai kun? dai ni san ai. Rai nna, madung gaw Mung chying masat n lu ai ni a mying jahpan hta nna galaw ya ai re ngu mu ai”

Putao ginra na laga Lawk, Kahtawng hkan nga ai Hpung Kyi Jawng, Nawku hpung wang zawn re ni hta nga ai masha jahpan yawng hpe nngam ai sha, mying jahpan hkan hta ai kaw, Mying, Asak, Num La, Kanu Kawa mying, Mung chying masat hte, n ta hkring dat ni yawng, hkan gahkyin hta shangun da ai lam chye lu ai.

Dai mying jahpan ni gaw du wa na 2023 Myen hpyen dap galaw na ra lata poi hta asung shang na re lam tsun da ai lam nga ai zawn, mare masha ni gaw myit tsang ai lam nga ai raitim, ganing ndi bang ra taw ai lam chye lu ai.

Jinghpaw mungdaw shara law malawng hta dai zawn mying jahpan hta ai lam hpe lai wa sai June shata ram hta hta la ngut sai lam chye lu ai.

Myen hpyen dap kaw na dai zawn mung shawa ni a mying jahpan hkan hta let, Mungchying masat ni shakut na galaw ya taw ai lam gaw, du wa na 2023 ra lata poi galaw na matu ya kaw na hkyen lajang shakut taw ai lam mung rai nga ai.

Maga mi de mung, Myen hpyen dap shakut galaw na hkyen nga ai Ra lata poi hpe Wunpawng myusha ni kaw na, n gun jaw madi shadaw shang lawm ai lam ni n galaw na matu, KIO ginjaw salang langai KNG shiga dap de tsun da ai mung nga ai re.

Shiga

Jak Sau manu ndang nna, Sawlaw de lung ai Mawdaw ni jahkring da ra

Leave a comment

Sawlaw bum de gunrai htaw shalun taw nga ai mawdaw la ni, ndai laman Jak Sau manu tsaw rawt mat ai majaw, gunrai htaw shalun na lam hta yak hkak ai sha n ga, mawdaw pru ai lam hpe jahkring da ra ai lam chye lu ai.

Lai wa sai ten hta Saw Law bum de gun rai kalang htaw shalun ai rai yang, shawoi gaw sen 5 npu sha mat taw ai raitim, ya gaw manu lung mat ai majaw, manu ndang mat nna ahkring kau ra ai re lam Saw Law mawdaw la langai KNG shiga dap de ya na zawn tsun dan ai re.

“Madung gaw Jak sau manu grai rawt mat ai, rawt ai nga tim pyi ra ai ram n lu mari lang mat ai, anhte kalang lung yang shawoi sen 4 ram ma ai, ya na manu hku rai yang sen 8 ram ma wa ai, gate hkan grai bai jaw ra ai rai, an hte na matu n kaik ai.” nga ai re.

Madung gaw sau manu tsaw rawt mat ai hta, ra ai ram mari lang na matu mung yak hkak mat ai majaw, jahkring da ai re lam matut chye lu ai.

Ya na zawn Jak Sau manu tsaw rawt mat nna, mawdaw ni dai ginra de n lu du mat ai majaw, dai ginra hta magam gun taw nga ai ni hte mung shawa ni, malu masha dum hprut yak hkak wa na myit tsang nga ai lam ginra masha ni tsun ai.

Saw Law ginra hta lai wa sai ten, Miwa mungdan hpe machyu let, ra ai malu masha ni hpe dai de na gin len shalai bang ai raitim, Covid byin ai hpang kaw na jarit n hpan yawng kum kau ai rai nga ai.

Dai re majaw, ya ten madung Myitkyina Waimaw de na sha htaw shalai bang taw ai ten, n dai zawn dumhprut mat ai rai yang, ginra masha ni hta yak hkak ai lam ni grai law wa mai ai lam matut tsun dan ai re.

Saw Law ginra gaw, pa layang ga hte tsan ai bum tsaw n tsa kaw de da ai mare rai nna, hkrun lam matut mahkai yak ai sha n ga, Phone matut mahkai lam ni mung yak ai shara re lam chye lu ai.

Dai zawn re shara hta gun rai ni hpe htaw shalai la na yak hkak nga ai lapran, Myen hpyen dap, Pyi Thu Tsit, BGF dap shara ni htan mung gumhpraw kahtap jaw bang na lai ra hkrunlam re lam chye lu ai.

Ya ten Myitkyina muklum kata, datsi jak sau liter mi hta kyats 3000 ram jaw ra taw ai rai nna, shing gan lagu dut ai ni hkan rai yang kyats 5000 du hkra jaw ra taw ai lam sagawn chye lu ai.

Shiga

NLD Rapdaw Datkasa hte N-gun Madun Ningbaw yan, Myitkyina kaw rim hkrum

Leave a comment

Hpakant Maw Mung mare na n gun madun woi awn ai ningbaw hte Hopin muklum na rapdaw dat kasat yan hpe, August 14 ya shani, Myitkyina Deng 21 Shagyit hta rim hkrum wa sai lam, ginra masha ni kaw na chye lu ai.

N gun madun ai hta woi awn ai, Ko Sai Mg hte, NLD Mogaung rap daw datkasa Ko Myo Kyaw yan gaw, Myitkyina kaw na Hpakant de lung wa ai ten, Myitkyina Deng 21 Myen hpyen shagyit hta rim hkrum mat ai re lam, Hpakant Maw Mung mare na mung shawa langai KNG shiga dap de ya na zawn tsun dan ai re.

“Ko Sai Mg rim hkrum mat sai nga na mani hpawt hkying 10 ram hta Phone hte shana wa ai. Kaja grai myit n pyaw mat ai, shi hte rau rapdaw datkasa Ko Myo Kyaw hte rau mawdaw langai kaw rau jawn yu wa ai hta rim hkrum mat ai re. Hpa majaw rim hkrum ai i nga yang NUG asuya na ငွေတိုက်စာချုပ် hte Ko Sai Mg na Phone hta PDF hte seng ai sumla ni mu ai majaw rim hkrum mat ai nga tsun ai,” nga tsun dan ai re.

Dai rim hkrum ai hpang Myitkyina Myen hpyen dap san jep shara de rim woi mat ai hpang ya ten du hkra kadai hte mung matut mahkai n lu ai lam matut tsun dan ai re.

Ya rim woi hkrum mat ai, Ko Myo Kyaw hte Ko Sai Mg yan gaw, mare buga magam bungli ni hta myit lawm hkum lawm shakut shaja shang lawm ai yan rai nna, amyu sha lam hta kahkyin gumdin woi awn chye ai yan re majaw, shan yen hpe Myen hpyen dap ni hku na zing ri sat kau na hpe ginra masha ni myit tsang nga ai re.

Ya ten Myen hpyen dap ni kaw na Myitkyina muklum kata san jep rim hkawm ai lam ni ding yang galaw taw nga ai rai nna, lai wa sai lahkawng masum ya laman hta Shanglawt magam gun marai 4 hte hpawn laga PDF ni hpe mung rim hkawm ai lam ni ding yang galaw nga ai rai nna, Muklum shinggan hkan na Shagyit ni hta mung laja lana san jep ai lam ni ding yang galaw taw ai re.

Shiga

Jahtu Zup de n gun jat wa ai Myen hpyen hpung ni, bawm kapaw hkrum nna, marai 2 hkala

Leave a comment

Lido lam kaba, Dum Bang mare hta dap jung shara jahkrat tawn ai, Myen hpyen dap Hk.L.Y (298) dap n gun 60 ram hpe, Jahtu Zup de lai lung wa ai ten lam lapran kaw Hkam Bawm hte hkap kapaw nna, Myen hpyen la 2 hkala hkrum ai lam chye lu ai.

Mana August 11 ya shana maga hkying 6 ram aten Dum Bang kaw na Nawng Mi maga de hkau na pa lam hku na lai lung wa ai ten, KIA hkap kapaw nna dai zawn hkala hkrum ai hpang, makau grup yin ni de sinat gap shadam wa ai lam, ginra masha ni tsun dan ai.

“Mana maga hkying 6 ram aten Nawng Mi mare ding sa kaw Bawm ngoi ai, dai hpang Myen hpyen dap ni makau grup yin de sinat gap shadam ai dai ram sha re, grai wa majan kaba byin ai hku gaw n re,” nga Nawngmi ginra masha langai KNG shiga dap de tsun dan ai re.

Dai Myen hpyen hpung ni gaw, mani hpawt majan byin ai Jahtu Zup de hpyen garum lung wa ai hpyen hpung ni rai nna, Pyi Thu Tsit hpyen hpung ni Nawng Mi mare kaw na wa tau la ai lam chye lu ai.

Ya ten Hugawng lido lam kaba mayan kaba hta KIA hte Myen hpyen dap Pyi Thu Tsit pawm hpawm hpung ni hpyen masa shaja hkat taw ding yang rai nna, lai sa lai wa mung shawa ni hpe laja lana san jep ai lam ni galaw taw ai lam ginra masha ni tsun dan ai re.

Shiga

Laknak kaba gap bun ai majaw, Sezin Mare grupyin na Mung shawa ni hprawng Yen

Leave a comment

Sezin mare hta dap jung shara jahkrat tawn ai, Myen hpyen dap ni kaw na, makau grup yin shara ni de laknak kaba majoi hkrup mara gap bang taw ai majaw, Jamaw ginra hte mare kaji kahtawng  20 ram na mung shawa 300 ram Hpakant Tamahkan de bai hprawng yen pru wa ra ai lam chye lu ai.

Mana August 11 ya shana kaw na Sezin mare makau hkan, laknak kaba shana tup gap bang wa ai majaw, grupyin  hkan nga ai mung shawa ni, dai ni hpyen yen dabang de bai hprawng yen wa ra re lam, ginra masha, KNG shiga dap de ya na zawn tsun ai.

“Myen hpyen dap ni gaw hpa majan byin ai lam n nga ai rai tim, anhte mung shawa ni nga ai maga de laknak kaba ni hte gap bun taw ai. Shanhte chyawm PDF hte KIA ni nga ai shadu na gap ai she nrai i, raitim anhte mung shawa ni gaw laknak kaba n sen n sim n sa ngoi wa yang gaw hkrit ai, hkrit ai majaw yawng hprawng yen pru wa ai.”

Matut nna, Myen hpyen dap gaw, KIA Dung 26 hpe gasat na masing hte Holicopter n bungli, hpyen n gun ni ding yang jat da nna, mani hpawt hkying 11 ram aten hta mung, hpyen n gun 60 ram hpe wa jahkrat kau da ai lam shawng lam hpyen shi sawk ni shana wa ai kaw na chye lu ai.

Shingrai, KIA Dung 26 ginra de Myen hpyen dap ni kaw na htu shadut htim gasat shang wa ai rai yang, a ten n tam majan n hpan laja wa mai lam, shawng lam magam gun langai KNG shiga dap de tsun ai.

“Dai Myen hpyen hpung ni ya ten Sezin maga de rai n shang shi ai, n dai de shang wa jang gaw, majan matut laja na re” nga shana wa ai.

August praw 8 ya shani majan byin ai hpang, Myen hpyen dap hte Sam Hkyeng SNA dap ni Sezin mare na mung shawa n ta 600 jan wan nat jahten kau ya nna, mung shawa ni a manu dan ai arung arai ni hpe mya la mat wa ai lam ginra masha ni kaw na chye lu ai.

Myen hpyen dap ni kaw na dai mare hta n bungli bawm jahkrat bun nna, gap sat kau hkrum ai mung shawa marai 35 hte 40 lapran nga ai lam ginra masha ni matut shana wa ai.

Ya ten, Sezin makau grup yin mare na mung shawa ni, Hpakant Tamahkan, Hawng Pa mare hkan matut hprawng yen jat taw nga ai majaw, Hpyen yen mung shawa 5000 jan nga sai rai nna, grau law jat wa na lam sha re majaw, hpyen yen mung shawa ni a matu garum ningtum malu masha ra ahkyak taw ai lam chye lu ai.

N dai hpyen yen ni gaw, shan hte a dum n ta yawng wan nat jahten kau hkrum sai rai nna, mare buga dum n ta de aloi sha bai n htang wa na nloi sai re majaw, aten galu nga lu na matu lam shagu hta garum la ra nga ai lam chye lu ai.

Shiga

Myen Hpyen Dap hte Sam Hkyeng Dap ni Pat da ai Sezin Mare Masha ni hpe bai dat ya

Leave a comment

Nawnglut ginwang, Sezin mare hpungkyi jawng kaw pat hkrum taw ai mung shawa ni, dai hpawt August 11 manap lawt wa lu nna, Tamahkan, Hawng Pa, Nat hka htung mare hkan hprawng shingbyi nga lu sai lam garum katum hpung ni kawn chye lu ai.

Myen hpyen dap ni August praw 9 ya shana kaw na, nbungli hte mare kata bawm wa jahkrat, mung shawa ni a n ta nat jahten ai lam ni galaw nna, mung shawa ni hpe mung gara de n pru shangun ai sha, Hpungkyi jawng kaw mahkawng bang da nna,  jahkrit shama hpyen ning gang shatai wa ai kaw na lawt pru wa lu ai re lam chye lu ai.

Kawsi hpang gara, jahkrit shama re ai shara kaw na lawt lu mat ai re lam ginra masha langai n dai zawn tsun dan ai re.

“Myen hpyen dap ni matut sharawng da ai rai yang jaw sha na n nga sai gaw, mare ting mung wan nat kau sai rai, mari sha la sha na shara n nga sai, gara kaw na mung n chye la jaw sai, dai majaw dat dat ya ai” nga tsun ai re.

Raitim, mare kaw naw pat hkrum taw ai ni naw nga ai zawn, ya hprawng pru wa ai ni mung hkyep din pyi n lawm ai, hkala hkrum ai ni mung nga nna, dai hpyen yen ni a matu tsi mawan, malu masha ni garum ningtum hkyak hkyak ra nga ai lam, hpyen yen yu kawn ni tsun ai.

Ya ten dai hpyen yen mung shawa ni gaw, Hawng Pa hpungkyi jawng hta marai 500 jan, Tamahkan Mashalet jawng hte lahta tsang jawng ni hta 500 jan, နတ်ရေတောင် mare hta marai 200 jan hprawng shing byi taw nga nna, matut du wa na naw nga ai lam chye lu ai.