Myothit Tahkaw Hka Mahkrai Hpe Nbungli Bawm Sa Jahkrat ai hta Mung Shawa Marai (2) Si Hkrum Wa

Myo Thit Tahkaw Hka Mahkrai hpe Myen Hpyen Dap nbungli bawm lahkawng lang sa gap bun ai hpang, Laiza Manmaw lam hpe KIO maga pat tawn ai lam ginra masha ni tsun ai re.

October 25 ya shani hkying 10 ten daram hta Myen Hpyen Jet Nbungli hte Tahkaw hka mahkrai hpe bawm bai sa jahkrat bun ai majaw, dai kaw lai wa hkrup ai mung shawa marai 2 dai shara hta nan asak si hkrum wa ai lam chye lu ai.

Myen Hpyen maga Tahkaw hka mahkrai hpe bawm sa jahkrat bun ai lam hte seng nna, ginra masha langai n dai zawn tsun dan ai re.

“Bat 6 ya shani sa jahkrat bun ai kaw mahkrai loi n yawt mat ai, Mani laban ya shani kalang bai sa jahkrat ai gaw mahkrai kaw n ang ai sha, kawng lam maga loi ang ai majaw, mung shawa (2) si ai. ya chye lu ai daram nga yang, mahkrai gaw tsep kawp lai n mai hkra hten ai madang gaw n rai shi ai, Mani shawng shani dai sumla Vedio hkan pru ai hte raw sha naw re” nga tsun ai.

Myothit Tahkaw Hka Mahkrai kaba gaw, Myitkyina Laiza Manmaw lam a matu ahkyak dik mahkrai langai mung rai nga ai.

Ya ten Manmaw ginra majan laja lana htim gasat taw ai majaw, Manmaw majan de dap jau ai lam hpe lagaw gang mayu ai masa hte mahkrai bawm wa kapaw jahten ai masa re lam, mung shawa langai n dai zawn tsun maram da ai re.

“Madung gaw Manmaw majan rai nga ai, Manmaw de ထောက်ပို့ lam hpe lagaw gang mayu ai majaw, Mahkrai hpe Nbungli hte da sang sa jahkrat bun ai ngu mu ai.” nga tsun ai re.

Myothit Tahkaw hka mahkrai hpe October 24 ya shani hkying 10 kaw nbungli bawm sa jahkrat bun ai majaw Mahkrai chyen mi maga n-yawt mat ai lam chye lu ai.

24 ya shani nbungli bawm sa jahkrat bun ai hpang, 25 ya shani kalang bai sa jahkrat bun wa ai lam rai nga ai.

Myen hpyen maga Myothit mahkrai hpa lahkawng ya bawm sa jahkrat bun wa ai majaw, ya ten dai lam hpe KIO maga pat tawn ai lam chye lu ai.

Ndai masa lam hpe Online n tsa de sumla gayet mara ai lam ni n galaw na matu KIO maga matsun tawn ai lam nga ai hpe chye lu ai re.