Monyin hte Mawhan lapran Ywarthit ဆယ်မိုင် mare kaw SNA ni dap jung shara jahkrat wa ai majaw, majan byin wa na hpe ginra masha ni myit tsang nga ai re.
Dai shara hta KIA maga dap jung shara jahkrat ai lam n galaw tim, galoi mung hpyen shamu shamawt hkawm nga ai shara re majaw, aten n tam majan byin wa mai ai shara re lam ginra masha langai KNG shiga dap de n dai zawn tsun ai re.
“Mawhan Sinpraw maga Ywarthit (ဆယ်မိုင်) mare kaw shara wa la ai lam nga ai, dai shara gaw KIA PDF dap shara hte tsawm ra ni htep ai shara ngu mai tsun ai, ya gaw SNA ni mung Patrolling hkawm, KIA hte pawng hpawm maga na galoi mung Patrolling hkawm ai shara re rai, ya du hkra chyawm ထိတွေ့တိုက်ပွဲ gaw rai nnga shi ai, n dai hku sha rai yang kalang n rai yang kalang gaw majan kaba byin wa na re.” nga tsun ai.
Ya ten Wanleng lam mayan de SNA ni hpyen dap nnan grau grau hpaw jat taw nga ai lam ginra masha ni kaw na chye lu ai.
Lai wa sai Shata lahkawng jan hta Mogaung Kanyin Myaing mare kaw SNA Dap shara nnan hpaw jat ai hpang, dai ginra na mung shawa ni hpe hkawm sa hkawm wa lam ni hta pat hkum shingdang ai lam ni galaw wa ai majaw, ginra masha ni jam jau hkrum wa ai ai lam tsun ai re.
Ya ten wan leng lam mayan SNA ဌာနေပြည်သူ့စစ်, ပစ nga nna hpyen rim lahkawn taw ai rai tim, kaja wa nan dai ginra de majan byin wa ai rai yang, shan hte wuhpung masum pawng hpawm nna majan hpaw ai lam ginra masha wa n dai zawn matut tsun ai re.
“SNA Mung SNA wuhpung hku na lahkawn ai. ဌာနေပြည်သူ့စစ် mung ဌာနေ hku nga na lahkawn ai. maga mi de Myen hpyen dap mung ပစ nga na lahkawn ai. Shan hte wuhpung (3) gaw mying sha n bung ai. Hpyen Shamu shamawt ai lam ni galoi ma rau jawm galaw ma ai, SNA hte ပစ gaw galoi ma rau re. shan hte wuhpung masum hpe grai wa garan ginhka na lam n nga ai maren sha re.” nga ai.
SNA Dap shara ningnan bai hpaw jat taw ai shara gaw, Monyin Muklum hte Deng (10) tsan ai shara rai nna, Monyin Htawng kaba nga ai mare kahtawng re lam chye lu ai.
Wan leng lam mayan de lai wa sai shata kaw hpyen wunkat masat yan kalang ngut nna, ya kalang bai hpaw na matu hkyen nga ai majaw, hpyen lahkawn ai lam ding nga taw ai hpe chye lu ai.
Ya ten Monyin ginra ni hta KIA hte pawng hpawm ai SSIA ngu ai Sam laknak lang wuhpung langai nga ai rai nna, Myen hpyen dap hte pawng ai SNA ni hte hpyen masa shaja hkat taw ai mung rai nga ai.
Myen Hpyen dap maga na gaw, 2021 ning darum magam zing kau ngut ai hpang, Wunpawng Mungdan kata hta Jinghpaw hte Sam hpe sumprat dawk sai garan ginhka taw ai nga, (66) Ning Hpring KIO Party Masat nhtoi mungga hta KIO Tingnyang Up Dukaba Nban La tsun mat ai re.
Ya ten Wanleng lam mayan hta SNA hpe n ra sharawng ai Sam Mung shawa ni law law nga taw ai hpe matut chye lu ai.
