Mungmyti Sinli, Muse, Pangsai makau, Shabuk Kawnghka mare kaw, mazut roi rip sat hkrum ai, Sara Num yan lahkawng a manghkang, mahtai n pru ai shaning 9 ning hpring sai re.
9 ning hpring wa ai ten du hkra ndai lam hte seng na tara rap ra ai lam hpa mung rai n lu shi ai zawn, ndai lam hte seng nna mahtai kaja shapraw lu na mung yak hkak taw nga ai re.
Ndai zawn 9 ning du mat wa ai rai tim, ndai mabyin lam hpe galoi n malap ai hte tara rap ra ai lam hpe matut myit mada taw nga ai lam, Saranum Hkawn Nan Tsin a kanu Jan Wahkawn Lu Bu KNG de ndai zawn tsun dan wa ai re.
“9 ning hpring mat sai le i, rai tim mung dai ni du hkra ma yan the seng na tara rap ra ai lam hpe n lu la shi ai majaw, anhte nta masha ni hku nag aw myit n pyaw ai, ndai lam hte seng na hkam sha ai, nteng nman ai ndai lam hpe prat ting makoi magap da lu na n re ngu hpe kam ai, ya kalang dat ndai teng man ai lam hpe n lu shaw madun lu ai rai tim, lani mi na aten hta mahtai kaja lu wa na re ngu hpe myit mada taw nga ai,” nga tsun dan ai re.
Lai wa sai 2015 ning, January 19 ya shani, Pangsai makau, Shabuk Kawnghka mare hta KBC a laika hpaji sasana saranum yan rai nga ai, Saranum Hkawn Nang Tsin hte Maran Lu Ra yan, mazut roirip zingri sat hkrum ai, 2024 January 19 ya shani, 9 ning hpring sai rai nga ai.
9 ning hpring sai raitim, dai ni du hkra teng man ai mahtai n pru ai zawn, tara rap ra ai lam n lu ai n tsa, Dum n ta masha ni hku nna gaw, myit n shayawm ai sha, tara rap ra ai lam lu ai shani du hkra myit mada nga ai lam tsun ai re.
Saranum yan sat hkrum ai mabyin hte seng nna, KBC kaw nna woi awn let, tara rap ra lam, mahtai kaja pru hkra lam tam shakut wa ai raitim, masa lam mayak amyu amyu a majaw, bungli matut galaw n mai mat ai rai nga ai.
“Daini ndai ten du hkra anthe mungdan kata hta shinggyim ahkaw ahkng tawt lai ai lam ni, roi rip zingri sat hkrum ai lam ni law dik hkra nga wa ai rai tim, tengman rap ra ai mahtai galoi n pru ai, ahkaw ahkang lu wa ai shani mahtai kaja lu wa na re ngu hpe matut myit mada taw nga ai, kaja nan ndai zawn ntara tawt lai ai ni hpe mung ja ja ahkyak la shangun mayu ai,” Nga Saranum Hkawn Nan Tsin a kanu matut tsun ai re.
Kawnghka mare hta myen hpyen hpung ni du nga ai ten, saranum yan asak si sum wa ai rai nna, sawk sagawn tawn ai sakse ni hpe mahta let mara tara tawt lai ai gaw myen hpyendap re nga, shinggyim ahkaw ahkang hte seng ai wuhpung ni a sumtang hta madi madun tawn ai re.
Lai wa sai 2022 ning du hkra gaw, shaning shagu, saranum yan sat hkrum ai nhtoi, ladaw du shagu tara rap ra ai lam, mahtai kaja pru hkra KBC woi awn nna, myit dum akyu hpyi hpawng ni galaw wa ai raitim, maning 2023 ning hte dai ning gaw akyu hpyi ai lamang alak mi n lu galaw mat sai re.
