Shwegu ginwang kata na Myen hpyen dap shara 4 hpe, KIA PDF pawng hpawm dap ni kaw na laknak kaba hte sa gap bun wai lam chye lu ai.
Shwegu Myen hpyen dap Hk.M.Y 602, Lahta lam numbraw (အထက်လေးလမ်းဆုံ )shagyit, lawu lam numbraw (အောက်လေးလမ်းဆုံ) shagyit hte Ngabat Gyi balik dap, dai shara 4 hpe dai hpawt manap jau sa htim gap gasat wa ai nga, dai ginra na PDF lit nga ai Salang langai KNG shiga dap de tsun dan wa ai re.
“Dai hpawt manap hkying 5 daram hta Myen hpyen dap shara 4 hpe Pading 60 mm hte sa gap bun ai, Myen hpyen dap kata tsawm ra kabrawng wa ma ai, shan hte maga na mung laknak kaba ni bai gap bun ai lam nga wa ai, machyi ai lam gade ram nga n nga chyawm a tsawm n chye ai,” nga tsun dan ai re.
Jahpawt manap jau sa htim gap gasat wa ai hta, Myen hpyen dap maga de na hkra machyi ai lam ni nga wa ai sha n ga, shan hte dap kata kaw dumbru dumbra rai kabrawng jawng ai lam matut tsun dan wa ai re.
Myen hpyen dap kata 4 lang, shagyit shara lahkawng kaw 4 lang hpra hte Ngabat gyi balik dap kaw 2 lang sa gap bun wa ai hta, hkra machyi lam loi li nga wa ai re.
KIA PDF pawng hpawm dap maga de na dai zawn sa gap bun ai hpang, Shwegu Myen hpyen dap Hk.M.Y 602 dap kaw na laknak kaba ni hte bai n htang gap bun wa ai lam ni nga ai hpe chye lu ai.
Dai zawn sa gap bun ai hta, Myen hpyen dap maga grai wa hkra machyi ai lam n nga ai rai tim, shan hte hpe lagaw gang ai hku na sa jahkrit gap gasat lu ai re lam matut tsun dan ai re.
Myen hpyen dap hpe sa htim gap gasat bun ai hta, mung shawa n kau hkrit kajawng ai lam ni nga nna, hprawng yen hkawm wa ai ni mung nga ai hpe chye lu ai.
Ya ten dai ginra hta majan grai wa laja lana gap gasat hkat ai lam n nga ai rai tim, Myen hpyen dap ni hpe lagaw gang ai hku na, laknak kaba ni hte jahkring hkring sa gap shatsang ai lam ni nga taw ai hpe chye lu ai.
