Katsu kaw na, Dabak maga de lai sa wa ai Myen hpyen hpung hpe KIA dap ni kaw na hkap shingla gasat dat ai kaw na, majan byin wa ai lam chye lu ai.
January 19 ya shana maga de hkying 4 daram hta, Katsu kaw dap jung nga ai Myen hpyen hpung ni, Dabak maga de lai sa wa ai hpe, KIA dap maga Sama lam numshe hta hkap gap gasat ai kaw Myen hpyen dap maga sum machyi lam nga wa ai nga shawng lam magam gun langai KNG shiga dap de tsun dan ai re.
“Hkatsu kawn Dabak hkran de rap wa ai Tai hpyen ni hpe Tinang maga hkap gap gasat ai hta Tai hpyen marai 3 lu rim la ai, laknak rung rai padang dip la lu ai lam nga ai,” nga tsun dan wa ai re.
Myen hpyen dap maga sum machyi lam nga wa ai majaw, Katsu Myen hpyen dap kaw na laknak kaba ni gap shadam bun wa ai majaw, dai mare makau grup yin hkan na mung shawa ni hkrit kajawng hprawng yen wa ai lam ni nga ai hpe chye lu ai.
“Hkying 4 ram hta, sinat kaji kaba nsen bai ngoi wa ai majaw, Katsu mare masha nkau Gara yang Nawku jawng wang de sa htawt sit nga ma ai,” Ginra masha langai KNG de tsun dan wa ai re.
Dabak , Katsu hte Ga Ra Yang Mare grup yin hta nga ai, asak kaba sai ni hte Ma kaji n kau hpe lai wa sai shata kaw na, Aung Mye Thit mare de htawt sit da sai rai nna, asak ram ai ni bungli galaw lu galaw sha na matu dai mare sin let, nga taw ai re.
