Myitkyina Hpakant lam kaba shara 3 hta Myen hpyen dap ni pat da nna, hkrun lam hkawm mung shawa ni yak hkak taw nga ai lam chye lu ai.
January 15 ya shani kaw nna, Kamaing Lawa lam numbraw hta shara mi, Nam Ya mare hta shara mi, Hpakant Shi It Yang (lay pyin) hta shara mi, yawng shara masum hta pat da ai re lam, Mawdaw la ni tsun ai re.
“Kamaing kaw na gaw tsep kawp n shalai ai, Namya kaw chyawm ginra masha ni hpe sengke hte loi loi jaw shalai ai, Hpakant maga de na gaw yu wa ai lam tsep kawp n nga ai hpe yu yang, n jaw shalai ai ga rai nga ai, ya mawdaw lam ntsa mung shawa hkying hku pat hkrum taw nga ai,” nga Mawdaw la langai KNG shiga dap de tsun dan wa ai re.
Myen hpyen dap maga de na dai zawn lam pat da ai majaw, mawdaw la ni mung du ai shara kaw na gara de mung n mai shamu ai sha, lam lapran yak hkak taw nga ai rai nna, mung shawa hkying lam pat hkrum taw nga ai re.
Ya ten Mogaung maga de na lung wa ai Mawdaw yawng hpe Kamaing mare makau hta hkap jahkring nna, Hpakant na yu wa ai ni hpe, Lung Hkang mare hta hkap jahkring da ai lam chye lu ai.
Myen hpyen dap maga dai zawn lam pat kau ai majaw, KIA dap ni Namting Myen hpyen dap hpe sa gap gasat ai hpang, January 15 ya shani kaw na KIA mung lam bai pat wa ai nga, Senghpra ginra masha langai langai KNG de matut tsun dan wa ai re.
Ya ten Namting mare makau grup yin hta hpyen masa shaja hkat taw nga nna, Myen hpyen dap maga nbungli hte wa gap gasat ai lam ni nga taw ai re hpe chye lu ai.
Hpyen masa shaja hkat taw nga ai Hpakant lam mayan hta ya ten hkrun lam hkawm mung shawa hkying lam, pat hkrum taw nga ai re.
