Majan sum nna India maga de hprawng gale pru mat wa ai Myen hpyen hpung ni hpe sa tau la ai, Myen hpyen nbungli gaw, nbungli lam kashawt nna, nam de hkrat mat ai majaw nbungli daw hten mat ai lam, dai ginra na shiga dap ni hta tsun da ai kaw na chye lu ai.
January 23 ya jahpawt hkying 10 chyen daram hta India Mizoram mungdaw, I-Zaw muklum makau na, Lengpui nbungli daru hta, nbungli wa yu ai ten nbungli lam kashawt nna, shachyang shadang n lu hkang mat ai majaw, galau hten mat ai re lam chye lu ai.
Nbungli wa kasawt galau ai majaw, dai nbungli kaw lawm ai Myen hpyenla n kau hkala hkrum ai lam ni nga wa ai re.
India hte Myen mung jarit, Hkang Mungdaw hta byin ai majan hta, Myen hpyen dap ni hpyen majan sum nna, India mung maga de hprawng yen shang mat ai Myen hpyen la marai 267 hpe sa woi la na matu sa wa ai nbungli re hpe chye lu ai.
Majan sum na hprawng pru mat wa ai Myen hpyen la marai 276 hta marai 184 hpe gaw January 22 ya shani sa woi la mat nna, laga naw ngam ai ni hpe dai ni numdaw lahkawng lang ngu na sa woi ai hta ya na zawn n bungli kashawt galau hkrum ai mung rai nga ai.
Gumshem Myen hpyen dap hpe mungdan ting madang htim shagrawt nga ai hta, Rahkaing hte Hkang Mungdaw ni hta majan sum ai lam ni ding yang hkrum taw nga ai re.
