Hpakant Gwihka Myen hpyem dap hpe htim shagrawt ai hta, Mung shawa marai 4 si nna marai 6 hkala hkrum wa ai lam chye lu ai.
Gwihka Myen hpyen dap hpe KIA hte PDF pawng hpawm dap ni January 20 ya jahpawt sa htim gasat zing kau ai hta, mung shawa ni mung si hkala hkrum wa ai rai nga ai.
Dai dap shara hpe sa htim gap gasat ai hta, Myen hpyen dap maga marai 20 hkawt si nna, marai 7 hpe jahkrum lu rim woi la nna, dap shara yawng hpe wan nat jahten kau ya lu ai nga, dai ginra na mung shawa ni KNG shiga dap de tsun dan wa ai re.
“Gwihka hpe January praw 6 kaw na htim gasat hpang ai, nbungli hte nau wa gap ai majaw, jahkring gan jahkring nna, 18 ya shani kaw na htim gasat ai gaw, January 20 ya jahpawt zep zi lu zing sai, Myen hpyen dap shara nkau hpe nat kau ya ai, laknak hte malu masha tsawm ra lu la ai,” nga tsun ai re.
Gwihka Myen hpyen dap hpe htim gasat ai ten, Hpakant Myen hpyen byuha dap na laknak kaba gap shadam bun ai majaw, mung shawa si hkala hkrum wa ai rai nga ai.
Ya ten Gwihka Seng Noi mare yawng hpe KIA dap htim gasat zing madu da sai rai tim, Hpyen masa matut shaja hkat taw ai lam nga ai re.
Dai zawn Hpyen masa shaja hkat taw ai hta, Myen hpyen dap maga de na, laknak kaba ni jahkring hkring gap shadam bun ai majaw, Seng Awng Buga Nawku htingnu hta laknak kaba si hkra hten ai lam ni nga wa ai re.
Hpyen masa kahtet taw nga ai ten, Myen hpyen dap maga laknak kaba gap shadam bun ai lam ni a majaw, Uru Sengmaw ginwang kata na, nawku hpung n kau January 21 ya shani na laban nawku hpawng hpe gan jahkring ai lam ni galaw wa ai re.
Ya na zawn hpyen masa kahtet nga ai ten, mung shawa yawng mung, sadi maja let, ahkyak ai malu masha hte arung arai ni hpe jahting da na matu, nawku hpung ni kaw na tsun ndau da ai re.
