Mabeing mare kaba hpe KIA PDF pawng hpawm dap htim gasat zing
Mungmyit mare kaba hta majan byin
Jinghpaw Mung hte Sam Mung jarit Mabeing Muklum kaba hpe KIA woi awn ai hte PDF pawng hpawm dap maga htim gasat zing madu kau lu sai re lam chye lu ai.
Mabeing mare hpe January 20 ya jahpawt htim gasat hpang wa ai rai nna, 21 ya jahpawt jau hkying 8 daram hta htim gasat zing madu kau lu sai lam, shawng lam magam gun langai KNG de tsun dan wa ai re.
“20 ya jahpawt jau kaw na htim gasat hpang ai, hpang jahpawt zep zi lu zing sai, ya shara jasan ai lam ni galaw taw nga ai,” nga tsun dan wa ai re.
Mabeing mare hpe htim gasat ai hta, Myen hpyen dap maga nbungli hte htim gasat ai lam nga wa nna, mung shawa n kau hkra hkala ai lam ni mung nga wa ai re.
Dai mare kaba hpe htim gasat zing madu ai hta, Myen hpyen bawng masha lu rim ai hte laknak machyu pala ni mung padang dip zing madu la lu wa ai re.
Matut na rai tim, Mabeing hte jarit rai nga ai Mungmyit mare kaba hta majan matut laja nga nna, dai mare na Myen hpyen byuha dap hpe htim gasat taw nga ai re.
Mungmyit mare Myen hpyen byuha dap hpe htim gasat ai hta, Myen hpyen dap maga nbungli hte laja lana sa gap bun ai lam ni nga taw nna, myo mare kata yawng laknak kaba si hte nbungli bawn a majaw hkru hten ma sai lam dai ginra na mung shawa langai KNG de tsun dan wa ai re.
“Mungmyit muklum balik dap hte laga dap shara kaji nig aw lu zing sai, ya naw ngam ai Byuha dap kaba hpe htim gasat taw nga ai, nbungli hte nau wa gap ai majaw, mung shawa si hkala law ai hte muklum mung tsawm ra hten mat sai,” nga tsun dan wa ai re.
Ya ten KIA woi awn ai PDF pawng hpawm dap ni Mungmyit mare kaba de shang lu nna, dai mare kaba na balik dap hte Myen hpyen dap shara n kau hpe, htim gasat zing madu da nna, naw ngam taw ai Myen hpyen byuha dap kaba hpe htim shagrawt taw nga ai re.
Majan laja taw nga ai, Mungmyit hte Mabeing mare kaba ni hta, Myen hpyen dap ni kaw na, January 21 ya jahpawt kaw na Phone Internet line yawng pat kau ya sai lam chye lu ai.
Ya ten Sammung hte Jinghpaw mung jarit mayan yawng hta Hpyen masa laja taw nga nna, hpyen yen mung shawa ni mung yak hkak jam jau taw nga ai re.
