All posts by KNG

Shiga

Wai Maw, N Wan Kawng Myen hpyen dap hte Majan byin

Leave a comment

Wai Maw Sadung lam kaba, N Wan Kawng hta dap jung ai Myen hpyen dap ni hpe Wunpawng Mungdan Shanglawt Hpyen dap KIA Dung 3 ni, laknak kaba sa gap bun ai hpang lahkawng maga aten kadun laman gap gasat wa ai lam chye lu ai.

October 31 ya shana maga hkying 1 chyen ram aten N Wan Kawng Myen hpyen dap hpe KIA ni laknak kaba sa gap bun ai hpang, aten kadun gasat hkat wa nna, Myen hpyen dap maga mung laknak kaji kaba ni hte mana du hkra makau grup yin ni de gap shadam bun taw ai lam chye lu ai.

Dai ginra hta lai wa sai bat mi ram kaw na hpyen n gun kaba jat bang da nna, makau grup yin ni hta Myen hpyen dap ni hpyen shamu shamawt lam ni ding yang nga taw ai majaw, Jawng ni hpe mung tau hkrau pat da ai lam, dai ginra hta ang ai Jawng Srn langai KNG de ya na zawn tsun ai.

“N Wan kawng mayan hta lai wa sai bat mi ram kaw na Myen hpyen la ni grai du wa ai, dai zawn Hpyen la ni grai law wa ai majaw, mung shawa ni hkrit na Jawng jau na pat kau sai, dai ni shani ka ang kaw na sinat ngoi wa ai, Nam de na ni shawng sa gap dat sam ai, gap da na bai hting nut mat ai, Myen hpyen dap ni shan hte hkrai sha dai na maga hkying 3 ram du hkra gap shadam taw ai.”

Ya ten Myen hpyen dap hte U Shwe Min woi awn ai Pyi Thu Tsit hpyen hpung ni KIA Dung 3 ginra de kalang bai hpyen n gun kaba hte htu shadut taw ai lam ni nga ai rai nna, Nang Zaw Yang maga de mung hpyen n gun ni bai jat bang taw ai lam matut chye lu ai.

KIA Dung 3 Nang Zaw Yang maga de lai wa sai ten, Myen hpyen dap hte U Shwe Min woi awn ai Pyi Thu tsit hpyen hpung ni majan kaba hpaw wa yu sai rai tim, awng dang ai lam n lu ai hte bai hting nut mat ai lam chye lu ai.

Majan Shiga, Shiga

KIA Dung 9 hpe Myen hpyen dap ni laknak n gun hte gasat taw

Leave a comment

Mungmyit Sinli Kut Hkai Ginwang, Wupawng Mungdan Shanglawt Hpyendap  KIA Dap Dung (9), Kawng Sak Bum hta majan laja lana byin taw ai hta, dai ni shani ka ang hkying 12 aten ram kaw na dai na maga de du Myen hpyen dap gaw n gun hte gasat taw nga ai lam chye lu ai.

Myen hpyen Helicopter n bung li lahkawng hte 3 lang da bat, wa htim gap gasat taw ai lam, myi chyaw mu ginra masha langai tsun ai gaw, “Dai hpawt manap jau kaw na, Kawng Sak Bum mayan hta gap gasat hkat taw ai, dai ni shani ka ang ram kaw na gaw Ji Grawng Nbungli 2 hte mung wa htim gap gasat ai sha n ga Nam Hpak Ka Myen hpyen dap kaw na lak nak kaba ni hte mung ding yang gap sharu bun ya taw ai” nga KNG shiga dap de matut tsun dan ai re.

Ndai zawn gasat taw ai gaw, Myen hpyen dap Dapnu (77 ) ni rai nna, mani kaw na Namhpak Ka hte Kut Hkai lapran mayan hta Hpyen n gun 400 ram hte htu shadut shamu shamawt hkawm taw ai re lam chye lu ai.

September praw 6 ya shani hta mung Kut Hkai mare shang, Asia World Gate makau hta myen hpyen dap hte KIA Dung 9 lapran majan byin wa sai rai nna, Myen hpyen dap maga na laknak kaba si gap shadam bun ai majaw, Maw Hate mare na, mung shawa marai 4 hkala hkrum wa sai hta Ma langai hkala sawng ai lam chye lu ai.

Ya ten KIA Dung 9 ginra hpe Myen hpyen dap ni kaw na laja lana htim gasat zing la na hkyen taw ai re majaw, Laknak kaba hte nbungli ni hte gap sharu bun taw ai re lam, shawng lam hpyen shi sawk ni mu mada nga ai.

Kawng Sak Bum gaw, Nam Hpakga Muse lam kaba lapran Hu Mung mare a sinpraw maga na bum re lam chye lu ai.

Shiga

Nmawk Ginra de Majan byin hkyen nna, mare masha ni 300 ram hprawng yen

Leave a comment

Nmawk ginra e, Wunpawng Mungdan Shanglawt Hpyen Dap KIA hte Myen hpyen dap lapran hpyen masa shaja hkat taw nna, gap gasat hkat wa na masa nga ai majaw, hkrit tsang ai mung shawa marai 300 ram, shim lum ai shara ni de hprawng yen magang taw sai lam chye lu ai.

September praw 6 ya jahpawt kaw na, Manmaw muklum Myen hpyen dap Hk M Y (437) dap ni shang wa ai majaw, Nmawk Hka Nan lawk makau mayan hta nga ai KIA dap hte hkrum katut gap gasat hkat ai lam nbyin shi  yang, Nmawk Hka Nan lawk hte Wa Wang mare masha ni tau hkrau hprawng yen da ai re lam, ginra masha langai KNG shiga dap de lawu na zawn tsun ai.

“Mani hpawt Manmaw de na Myen hpyen n gun 200 ram lung wa ai, anhte nga ai makau mayang hkan sha Shanglawt ni nga ai, Myen hpyen dap ni gaw Hpaji Jawng hte Nawku Jawng makau grup yin hkan sha bai wa nga taw re rai yang gaw, ni ni htep htep sha rai sai, aten n tam mai gap hkat wa ai” nga tsun dan ai.

Ya ten dai shara mayan hta shada da Pe 400 ram sha gang hkat taw nna, lahkawng maga yu sin hkat taw ai masa hta, Hka Nan hte Wa Wang mare na n ta loi li shing gang taw sai re majaw, maga mi sit lung wa ai hte gap hkat wa na masa rai taw ai lam chye lu ai.

Nmawk Hka Nan lawk hte Wa Wang mare gaw matut ai mare kahtawng rai nna, ya ten Myen hpyen dap Hk M Y 437 hpyen hpung ni Hka Nan lawk lahta tsang jawng makau hte Nawku jawng shawng hte yang hta hpyen man lahkawng garan na shara jahkrat tawn ai majaw mung, mare masha ni hkrit tsang ai re lam chye lu ai.

Ya ten, hpyen hprawng 200 ram gaw, Nmawk nawku hpung wang hta hprawng yen taw ai rai nna, marai 100 ram gaw, ကြေးနန် lawk hte Alen Kawng lawk ni hta koi yen taw nga ai lam matut chye lu ai.

Manmaw kaw na Myen hpyen hpung ni lung wa ai ten, lam kaba hta hkawm taw ai mung shawa ni yawng hpe mung jahkring nna, san jep ai lam ni galaw wa ai lam ginra masha ni tsun ai.

Ndai zawn Daw Hpum Yang, N Mawk ginra shara nkau hta hpyen masa shaja hkat taw ai ten, KIA maga de na mung maja na nga na lam, tsun sadi jaw da ai lam nga ai.

Majan Shiga, Shiga

Mare Masha ni Hpyi Shawn ai zawn, Jahtu Zup Ginra de Majan Zim na, Nmai Byin  

Leave a comment

Danai Lido lam kaba n tsa, Jahtu Zup Pyi Thu Tsit dap hte Wunpawng Mungdan Shanglawt Hpyen Dap KIA hpe lai wa sai August 27 ya shani, Jahtu Zup, Awng Ra, San Pya mare kahtawng 3 na mung shawa n kau, mare makau grup yin hta majan n shabyin ya na lam hpyi shawn was ai raitim, lahkawng maga gasat wa na mahtai sha jaw wa sai lam chye lu ai.

KIA Dap Ba 2 hte Danai Myen hpyen dap D K Ts de sa nna, sa hpyi nyem ai hpang, dai zawn bai n htang shana wa ai nga, sa du jahkrum ai salang langai KNG shiga dap de tsun dan wa ai.

“Madung hku na dai ginra ni hta majan n shabyin ya na hte lahkawng maga sim sim sa sa hte nga na matu sa bawng jahkrum ai re. rai tim KIA maga de na gaw Pyi Thu Tsit dap ni hpe jasan nan jasan ra na re nga nna, Myen hpyen dap mag ana mung KIA htim gasat wa yang gaw gasat ra na re nga nna htang dat ma ai” nga tsun dan ai re.

Dai zawn lahkawng maga na tsun dat ai shiga a majaw Jahtu Zup ginra hta majan n hpang laja lana gap gast hkat wa mai ai ngu maram let, Jahtu Zup, San Pya, Awng RA mare na mung shawa nkau, shim lum ai mare ni de hprawng yen taw nga sai lam matut chye lu ai.

Majan galoi laja wa na nchye ai raitim, mani September praw 2 ya shani gaw, Myen hpyen n bungli langai KIA Dung 14 ginra de pyen gayin mat wa sai lam chye lu ai. Bai nna, Myen hpyen dap hpyen n gun 200 ram mung ndai bat laman Lawa mare kaw na, nam lam hku Nawng Mi, Wara Zup maga de lai lung wa sai lam Dumbang ginra masha ni tsun ai.

Dai Myen hpyen hpung ni gaw, n dai shata laman Monyin maga de na lai lung wa ai Myen hpyen dap Dapnu 88 ni rai nna, Jahtu Zup Pyi Thu Tsit dap de hpyen n gun garum lung wa ai hpyen hpung ni re lam chye lu ai.

Dai rai nna, majan byin wa na hpe myit tsang ai majaw, shani shagu ngu na htawt sit hprawng pru taw nga ai rai nna, n ta sin ai marai 1, 2 sha nga sai lam Sanpya mare masha kawn chye lu ai.

Jahtu Zup ginra hta lai wa sai June shata ram kaw na hpyen masa shaja hkat taw ai rai nna, August 11 ya jahpawt hta San Pya Pyi Thu Tsit dap hpe KIA dap maga na sa htim gap gasat ai lam ni byin wa sai.

Shiga

Hpakant, Maden Yang Mare Masha Htinggaw 30 jan hprawng yen

Leave a comment

Hpakant ginra Maden Yang (Maw Pung) mare de Myen hpyen n gun kaba hte shang htim gasat wa na shiga  majaw, dai ginra na mung shawa htinggaw 30 jan, tinang hte ni nawn ai jinghku ni hpang de hprawng yen magang nga sai lam chye lu ai.

August 26 ya shani, Maden Yang (Maw pung) mare hta Salang Zaw Min Oo hte ramma marai 3 hpe Mung Shawa Makawp Maga Dap PDF ni hte matut mahkai ai majaw nga, Myen hpyen dap ni sa rim mat wa ai hpang, dai mare kata na PDF ni hpe mung matut jasan mat wa na re lam, shiga pru nna hprawng yen ai re nga, Maw Pung mare masha langai KNG shiga dap de lawu na zawn tsun wa ai.

“Mare kata PDF dap ni nga ai ngu n tsen n hten byin taw nga ai. Myen hpyen dap ni kaw na dai Maden Yang (Maw Pung ) mare hpe n ta langai hpang langai shang jep kasawk ai lam ni galaw na hpe myit tsang ai majaw, n ta hting gaw 30 jan hprawng yen taw sai, ngam ai ni mung rai a hkyak ai ni hpe htawt sit da sai” nga tsun dan ai re.

Maden Yang (Maw Pung) mare gaw Hpakant ginwang Lung Hkang Ning htawn hta lawm ai mare rai nna, mare hta n ta hting gaw 200 jan hte masha 3000 ram nga ai re.

Ya ten Hpakant ginra hta Myen hpyen dap ni kaw na, KIA hte PDF ni hpe ding yang lu rim taw ai rai nna, hpyen masa lam ni shaja hkat wa ai lam ni nga taw ai re hpe chye lu ai.

Lai wa sai August praw 8 ya shani hta mung, Sezin mare hpe Myen hpyen dap ni kaw na, n bung li hte wa htim gap gasat ai lam ni a majaw, dai ginra na mung shawa ni Hpakant ginra ni hta hprawng machyu taw nga ai.

Shiga

N Jip Yang Mare kaw, Chyaru Nang Kahtam hkat nna, Salang 2 si

Leave a comment

Myitkyina Tayang Zup lam lapran N Jip Yang mare na Hpungkyi Jawng sin ai, U Soe kaw sa manang lahkawng sa chyai nna, tsa sing lu sing sha rai, ga law hkat wa ai kaw, kahtam hkat ai majaw marai 2 dai shra hta nan si mat wa ai lam ginra masha ni kaw na chye lu ai.

အောင်မြေသစ် Myen Hpungkyi Jawng sin asak 51 ning ram re ai Slg U Soe a manang yan gaw, Salang Min Min Soe hte Salang Myo Aung yan rai nna, lai wa sai August 28 ya shana 11 ram hta, dai zawn ga law n htu kahtam sat hkat wa ai re lam N Jip ginra masha KNG shiga dap de tsun ai.

“Dai Hpungkyi Jawng na lithkam hpungkyi wa n dai laman gan hkawm taw nga ai majaw, U Soe wa hpe sin da sha ngun ai ten Slg Min Min Soe hte Myo Aung ngu ai wa sa chyai nna lu sha ai hpang ga law hkat wa ai kaw na, Slg Myo Aung wa kaw na, Slg Min Min Soe hte U Soe wa hpe gahtam sat kau da ai re” nga tsun dan ai re.

Dai kahtam sat kau da ai Slg Myo Aung wa ya ten du hkra hprawng hkawm nga ai rai nna, gara shara de makoi hkawm taw ai nchye lu shi ai lam matut tsun ai.

Dai gahtam sat hkrum ai yan lahkawng gaw, Bego muklum hte Tant Se muklum na yen re lam matut chye lu ai.

Ya ten dai Slg Min Min Soe hte U Soe sat hkrum ai lam hte seng nna, Slg Myo Aung hpe lu rim ahkyak la na matu, Myitkyina P L N Myen hpyen balik dap hta shawk shawn da ai lam chye lu ai.

Shiga

KIA Dapba 8 ginra de, Myen hpyen nbungli 4 hte bawm wa jahkrat bun

Leave a comment

Jinghpaw mung hte Sagaing jarit mayan shara lahkawng hta Myen hpyen dap ni kaw na August 24 ya shana n bung li 4 hte Wunpawng Mundan Shanglawt Hpyendap KIA hte Mung Shawa Makawp Maga Dap PDF ni nga ai hkan, bawm hkan wa jahkrat bun kau da ai lam chye lu ai.

Nbung li hte gap hkrum ai shara ni gaw, Katha Moe Thar makau grup yin hte Mung Nyang ginwang KIA Dap Ba 8 ginra makau grup yin ni hta rai nna, Yak 130 Jet Fighter n bungli 2 hte wa jahkrat bun kau da ai re lam shawng lam hpyen shi sawk ni KNG shiga dap de tsun ai.

“Mana wa gap ai shara 2 hta re. Shara mi hta n bungli 2 hpra hte wa gap ai, shara mi gaw Moe Thar maga de wa gap ai rai nna, hpang shara mi gaw anhte Ba 8 ginra de re. Shanhte wa gap ai shara 2 gaw gade n tsan hkat ai, madung gaw PDF hte KIA ni nga ai shara hpe lata gap gasat ai rai na re, anhte maga hpa hkra machyi ai lam mung gaw n nga ai.” nga shawng lam na magam gun langai shana wa ai.

Dai n bungli 4 gaw Mandalay Ta-Da-Oo kaw na shana hkying 10 ram hta rawt lung wa nna, hkying 10 chyen ram aten bawm wa jahkrat bun kau da ai re lam chye lu ai.

Dai hpawt manap hkying 6 ram aten gaw, Myitkyina- Mandalay Mawdaw lam kaba, Naba mare makau hta Myen hpyen dap hte KIA PDF pawng hpawm dap ni shani hkying 11 ram aten du hkra majan gap gasat wa ai lam chye lu ai.

Sum machyi ai lam hte seng nna gaw, a tsawm tup hkrak n chye lu ai raitim, shara makau grup yin hkan ndai laman majan matut manoi byin nga ai lam chye lu ai.

N dai laman Jinghpaw Mung hte Sagaing jarit mayan, Kawng lam, Hka lam mayan yawng hta hpyen masa lam matut shaja hkat nga ding yang rai nna, Myen hpyen dap maga de na hpyen n gun kaba hte htu shadut taw nga ai majaw, gap gasat hkat ai lam ni jahkring hkring byin taw nga ai re.

Shiga

U Shwe Min a Pyi Thu Tsit marai 4 hpe, Kani, Sinat laknak ni hte rau lu rim da

Leave a comment

Slg. Shwe Min woi awn ai Pyi Thu Tsit magam gun marai 4 jawn wa ai Pajero maw daw hpe KIA Dung 3 ni kaw na Sani Hku mare hta hkap jahkring jep yu ai hta Kani Nang hpam hte hpawn sinat laknak mung lawm rai hkap lu rim ai nga shawng lam hpyen shi sawk ni tsun dan ai re.

August 24 ya shana maga hkying 6 ram aten hta, Waimaw ginwang, Sadung – Sai Law – Man Wing lam hku, Pang Wa magade lung wa yang, Lisu Pyi Thu Tsit  marai 4 jawn lung wa ai Pajero mawdaw hpe hkap jahkring san jep yu ai kaw dai zawn mu jep shapraw lu ai re lam, shawng lam hpyen shi sawk ni KNG shiga dap de tsun dan ai.

“Sai Law – Man Wing lam hku na Pang Wa maga de lung wa ai Mawdaw hpe shana jan du wa mahka lung wa ai majaw, n tsen n hten na hkap jep yu ai, hkap jep yu ai hta Kani Nang Hpam hte hpawn sinat gadun langai hte Pyi Thu Tsit hking mung lawm rai hkap mu jep rim la ai, ya dap kata san jep ra ai lam ni hpe san jep taw ding yang re”  nga tsun ai.

Dai hkap lu rim ai Lisu Pyi Thu Tsit ni gaw, asak 52 ning re ai Slg. Yaw Han, asak 45 ning re ai Slg. Ngar Thar, asak 18 ning re ai Shd. Thar Cha Ho, asak 21 ning re ai Shd. Lar Si ni re lam chye lu ai.

Dai lu rim ai hta Sinat gadun langai, hpyen hking htau mi hte Kani nang hpam malu masha alaw alam re lam chye lu ai.

Ya ten dai ni hpe KIA Dung 3 shawng lam ginra ni hta rim san jep taw ai rai nna, shan hte hte matut mahkai bungli galaw ai ni hpe san jep shapraw taw nga ai lam matut chye lu ai.

Salang Shwe Min woi awn ai Pyi Thu Tsit hpyen hpung hpe Myen hpyen dap daru magam zing ai hpang hpaw shabawn hpang wa ai rai  nga ai.

Lai wa sai shata kaw na KIA Dung 3 ginra de Myen hpyen dap hte pawng hpawm htim gasat hpang wa nna, ndai laman majan gan zim taw nga ai aten ya na zawn, hkawmsa ai hta mu jep ai lam mung rai nga ai.

Shiga

N Jut Lung Mare na, Kyu Hpyi Hpawng Lusha, Marai 40 Jan  Sha Shut

Leave a comment

Myitkyina N Jut Lung ( Aung Min Thar) mare hta August 22 ya jahpawt Ma jahtawng htu kyu hpyi hpawng lamang langai hta daw jaw ai lusha a majaw, sa du shang lawm ai ginra masha 40 jan sha shut nna machyi makaw byin hkrum wa sai lam chye lu ai.

Dai Ma Jahtawng htu kyuhpyi hpawng lamang hta nbaw shat, shanam htu hte nga shadu ni, daw jaw wa sai rai nna, du sa ai ginra masha marai 40 ram kan mase madawn ai lam ni byin wa ai nga, ginra masha ni KNG shiga dap de tsun dan ai re.

Ta tut hkrum sha ai N Jut lung ginra masha langai tsun ai gaw “Kyuhpyi hpawng lamang gaw jahpawt hkying 10 ram hta ngut ai, dai kaw n baw shat, nga hte shanam htu, dai kaw shan si mai hpan mi ma shadu jaw ai. Dai sha ngut ai hpang shani ka-ang hkying 12 ram du wa ai ten yawng gaw baw sin, kan mase, madawn ai lam ni byin jawng ai hte, n kau gaw baw sin na galau taw ai ni mung lawm, dai hku ni byin rai mare tsi rung tsi jaw gawk hta yawng hpring mat ai.”

Sha shut nna machyi ai ni hta, asak kaba sai ni hte ma kaji ni grau laja lana byin nna, machyi sawng ai ma kaji lahkawng hpe gaw Myitkyina mung shawa tsi rung de sa da sai lam chye lu ai.

Kaga asak naw ram ai ni hta gaw laja lana grai sawng hkra nbyin ai lam tsun ai re. Ya ten, dai lusha sha shut ai ni yawng gaw, bai hkyamsa wa sai lam sagawn chye lu ai.

Shiga

Laiza kaw, Gunrai dut mari lam hta, Kyat sha lang ra sana

Leave a comment

Laiza Muklum kata gunrai dut ai ni yawng Myen gumhpraw hte sha dut jaw ra na lam Laiza Muklum Uphkang Rung Mungchying Uphkang Dap, Wunpawng Mungdan Shanglawt Asuya kaw na August 19 ya shani n dau dat sai.

Dai n dau laika hta, KIO asuya uphkang ginra jarit mayan hta Covid ana a majaw jarit pat da ai hte mung masa mayak manghkang ni a majaw, gumhpraw manu hkrat nna, Miwa Yuan gumhpraw shang wa ai lam n nga,taw mat wa sai hpang grau yak hkak dut dang wa ai majaw, hkyam sa lu ai made hkyam sa lu na matu yaw shada let, gat dut ai ni hkan sa ra na lawng lam 5 hte n dau da ai rai nga ai.

Dai n dau hta madung hku nna, Tinang ginra shang wa ai gun rai ni yawng hpe Myen gumhpraw hte sha tawt sawn dut ra na rai nna, Miwa gumhpraw manu shakap tawt sawn dut ginlen ai lam tsep kawp n galaw lu na tsun da ai.

Bai Miwa mungdan kaw na dan tawk mari jashawn dut ginlen nga ai kunrai ni hpe gaw Miwa gumhpraw/ Myen gumhpraw hku tawt sawn nna dut ginlen mai ai rai tim, tinang gat lawk a gumhpraw galai manu (exchange rate) hta n jan ai sha tawt sawn la ra na lam, n dau da ai.

Maga mi de, ndai zawn mayak ni majaw, 2021 June kaw na, Kongsi matsun the maren, Muklum kata htaw jashawn ai gunrai ntsa hkanse hta ai hpe manu shayawm kau sai zawn, ningpawt madung lush ani kawn ahkan hkanse hta ai lam hpe mung ya ten du hkra nhtoi nmasat dawm jahkring da ai lam hpe mung mu lu ai.

Laiza Muklum kata na hpaga yumga galaw nga ai, Manam Jarawp, Hotel, Lu sha seng, Store seng ni, Mawdaw, Cycle gram/ rung rai dut seng, Computer laika shatsawm seng, Tsi jaw gawk hte Tsi mawan dut seng, Bu Hpun palawng dut/ jak chywi seng, Tsawm shakya seng ni, Jak sau dut seng ni hte nta gawk/ seng gawk shap sha ai ni yawng, lahta na ndau hpe hkan nang hkansa na matu tsun da ai.

Dai zawn n dau da ai lam hpe hkan nang hkan sa ai lam n nga ai gadai gara gat seng hpe rai tim, mare ninghtawn gawn hkang rung shing n rai uphkang rung ni kaw na ja ja ahkyak la sa wa na lam n dau da ai re.