Hpakant lam de Myen hpyen dap hpyen n’gun kaba hte htu shadut lung wa ai majaw, Hpakant lam mayan na mung shawa marai 600 hkawt Hpakant Nawku jawng wang shara ni hta wa du hprawng yen taw sai lam chye lu ai.
Namya mare na hpyen yen mung shawa ni gaw, Hpakant Seng Awng Hkalup Nawku jawng wang hta marai 116, Sabaw Buga Hkalup Hpung nawku jawng wang hta marai 57, Kahtan mare Hkalup nawku jawng wang hta marai 57, Htoi San သာယာကုန်း Hkalup nawku jawng hta marai 65, Nam Hpyit mare nawku jawng hta marai 44,Kade nawku jawng wang hta marai 60, Kapmaw mare masha ni gaw, Mawsiza buga hkalup nawku jawng wang hta marai 120, Senghpa mare masha ni gaw, Yuma mare nawku jawng hta marai 60 wa du hprawng yen taw nga ai lam chye lu ai.
Ya matut nna mung mare de ngam ai mung shawa nkau naw nga ai rai tim, ngam taw ai ni yawng gaw, tinang Yi sun hkauna ni de hprawng yen ma sai rai nna, ya ten mare kata mare sin ai marai 2,3 hta lai na gadai n nga yawng hprawng yen ma sai lam chye lu ai.
Hpakant lam mayan rai nga ai, Jahkrau Loi Seng hte Kahtan Yang mare na mung shawa ni gaw, ya ten du hkra gara de mung n mai hprawng yen rai mare kata hta sha hkrit tsang nna, naw nga taw ai lam hpyen yen ni hpe yu lakawn taw ai hpung Sara langai ndai zawn tsun ai re.
“Jahkrau Loi Seng, Kahtan Yang bu ni gaw Hpakant de yen na matu yak taw ai ga rai nga ai, shingdu maga de mung Kamaing kaw Myen ni nga taw ai bai rai, shawng de bai hprawng yen pru wa nga yang mung, Ma U Pin hta Myen ni but rawng taw nga re majaw, myit yak myit tsang na ya ten du hkra gara de n hprawng ai naw nga taw ai ga rai nga ai,” nga tsun dan wa ai re.
Dai hpyen yen mung shawa ni gaw, lai wa sai bat Myen ni grai bai htu shadut wa ai majaw, Uru Sengmaw Ginwang de garum hpyi dat ai hpang, Uru Sengmaw Ginwang na lit nga ai ni buga mawdaw ni hte sa woi shaw da ai hpyen yen mung shawa ni rai nga ai.
Ya ten Myen hpyen dap gaw, Hpakant lam de n lu n da hpyen n’gun kaba hte htu shadut taw nga nna, Myen hpyen n’gun grai law ai majaw gaw, dai na n rai yang, hpawt de hkan gaw, Nam Ya de lu du wa na masa nga ai nga, shawng lam hpyen magam gun hte ni nawn ai Salang langai KNG de ndai zawn tsun dan wa ai re.
“Shiga gaw, Myen ni hpyen n’gun grai law dik hkra hte htu kaput bang wa ai majaw gaw, dai na n rai yang hpawt de hkan gaw Nam Ya de lu lai bang wa na masa pru taw nga ai,” nga tsun dan wa ai re.
Kamaing kaw na htu lung wa ai Myen hpyen hpung ni ya ten Ma U Pin lai ကျောက်ထု rai n du lu Pa Hkren bum lagaw mayan hta du nga na, dai na de du hkra gaw rai n lu lai lung wa shi ai lam chye lu ai.
KIA dap maga na mung ကျောက်ထု makau grup yin hta kring mading dap jung shara jahkrat na hkap shingla gasat taw nga ai majaw, dai mayan hta majan byin nga ai n htoi masum ya ram du wa sai re.
Myen hpyen dap maga na gaw mani April 27 ya shani hta mung hpyen nbungli hte lahkawng lang wa htim gasat ai hpang lagaw lam hte htu shadut lung wai hpe KIA maga na hkap lu shingla gasat kau dat ai re.
Dai mayan hta KIA hte Myen hpyen dap lahkawng maga hpyen masa matut shaja hkat taw nga ding yang re lam mung chye lu ai.
