Hpakant lam de htu shadut lung wa ai Myen hpyen hpung ni, Mana hkying 5 ram hta Nam Ya mare de du shang wa lu sai nga, shawng lam hpyen magam gun hte ni nawn ai ni tsun ai re.
April 22 ya shani Kamaing kaw na htu shadut lung wa ai Myen hpyen hpung ni gaw, lam lapran 5 ya ram gap gasat hkrum ai hpang, May praw 2 ya shana de hkying 5 ram hta gaw, Nam Ya mare de htim gasat du wa lu ai sai nga ginra masha langai KNG de n dai zawn tsun dan wa ai re.
“Nam Ya lawu mare kaw na Myen hpyen hpung ni Nam Ya mare နတ်ကြီးစဉ် de mana hkying 5 ram kaw du wa sai nga tsun ai, dai ni gaw shani ting kapaw dat hkring dat kapaw dat hkring dat re lam gaw nga ai,”nga dai ginra na hpyen yen ni hpe yu lakawn taw nga ai, Uru Sengmaw ginwang na lit nga ai Sara langai KNG de tsun dan wa ai re.
Nam Ya de du wa ai Myen hpyen hpung ni dai hpawt manap Hkintau mare na Slg Latsen Tang Gun a mamhtu jak kaw rawng nga ai Myen hpyen la marai 70 ram hpe KIA dap maga Drone bawm 7 lang sa jahkrat bun wa ai hta Myen hpyen dap maga si hkala lam ni law wa ai nga matut tsun dan ai re.
Dai Myen hpyen hpung ni Nam Ya makau de lung wa ai ten, Um Kahtawng kaw na Kahtawlik Kyuhpyi bum hta wa nga taw ai laman mung KIA pawng hpawm dap ni sa gap gasat ai lam ni nga wa ai re.
Myen hpyen dap ni lung wa ai lam ding yang KIA maga na hkap shingla gasat ai zawn, Myen hpyen dap maga na mung Drone kaba ni hte lam ding yang pyen gayin kinyu yu ya nna, shan hte n tsen n hten ai shara ni hta bawm jahkrat bun rai nna, htu shadut htim gasat lung wa ai lam chye lu ai.
Ya ten Myen hpyen dap hte KIA dap lapran Nam Ya mare makau grup yin hta hpyen masa matut shaja gap gasat hkat taw nga nna, Myen hpyen dap maga na mung, lai wa sai ten dap jung ai Nam Ya byuha dap de gaw rai n lu shang shi ai lam chye lu ai.
