Manmaw Robert Hpyenyen Dabang Hta Hpyen Yen Ningnan Ni Hpe Shara Jaw Kau Na Hpyenyen Dingsa Ni Yak Hkak Nga

Manmaw, Robert hpyenyen dabang kata, zaw hkat tawn ai gawk ni hpe adup hpaw nna, kata na rai ni htawk shale kau ya let, hpyenyen ning nan ni hpe shara jaw kau ai majaw, dai gawk shara hta mi kawn nga taw ai hpyenyen ni nga shara mayak hkrum taw nga ai re.

Manmaw kata majan shiga kahtet wa ai ten, Robert hpyenyen camp kata myen hpyendap ni jahkring hkring shang sawk jep ai majaw, myit tsang ai hpyen yen mung shawa ni yawng ngu na ram, march shata 10 ya shani kaw na, Munghkawng, Mungding Pa hte Yi,sun hkauna hkan gan koi yen mat ai rai nga ai.

Dai zawn, Robert hpyenyen camp na, hpyenyen ni gan yen mat ai ten, shan hte a gawk zaw ni hpe adup hpaw let, rai ni yawng htawk shale kau ya nna, Manje, Nmawk de na du wa ai hpyenyen n nan ni hpe shara jaw kau ai re lam, Robert hpyenyen hta mi kaw na nga ai hpyenyen langai KNG shiga dap hpe ya na zawn tsun ai re.

Mi gaw hpyen yen dingsa hte ningnan ni n mai pawng nga ai ngu rit kawp tara nga ai, rai tim ginwang kaw na ni gaw anhte Camp kaw အာဏာသိမ်း kau, mi na nga nga ai ni a gawk zaw ni adup hpaw kau, rai ni htawk kabai kau, dai kaw na ni nga mat, ya anhte ndai kaw na ni gaw matsan shayen rai, nga na shara n lu mat rai, ndai kaw sha nga na zawn, wa na zawn matsan shayen rai na yak hkak nga ga ai, myi na Camp Komiti nga na san da ai ni hpe mung nan hte n galaw ra sai nga na jahkring kau ai hku rai nga ai, masha dai ram law ai na arai ni matsan shayen dumbru dumbra rai na htawk ayai kau ya ai ga rai nga ai.” nga tsun ai.

Manmaw ginra kata laknak kaba grai ngoi wa ai majaw,mung shawa law malawng hprawng pru nga ai ten, Robert hpyenyen dabang na mung shawa ni mung, tinang shimdum ai shara ni de gan koi mat ai raitim, nkau gaw June praw ram hta Robert hpyenyen camp de bai n htang wa sai re. Robert hpyenyen dabang hta  htinggaw  400 jan nga kaw na, ya gaw htinggaw 100 ram sha ngam taw sai lam chye lu ai.

Maga mi hta, Nmawk, Manje hta majan laja lana byin ai majaw, dai kaw na ginra mung shawa ni law malawng Manmaw kata de hprawng yen shang wa ai hpe chye lu ai.

Dai hpyenyen ni, shata 3 ram Manmaw kata nga shara ni yak wa ai majaw, htinggaw 200 ram hpe  Robert hpyenyen camp kata shara jaw na hku, Manmaw ginwang hpyenyen lakawn nga ai buga hpung woi ni, hkyen lajang dat ai re lam Robert hpyenyen kaw na ni tsun ai.

Nmawk de na hpyen yen mung shawa ni hpe shara jaw ra ai majaw, mi na nga ai hpyen yen mung shawa arai ni yawng hpe htawk kau ya ai majaw, mi kaw na nga ai hpyen yen mung shawa nig aw gara de mung n jau jau yak hkak hkrum taw nga ai rai nga ai.

Manmaw mare kaba hta ya teng hpyen yen mung shawa grau grau law jat wa ai majaw, shara jahkrat ai lam hta mayak nga ai lam hte seng nna, Manmaw ginwang Hpyen yen lakawn lanawn na ningtau lithkam sara langai KNG de ndai zawn matut tsun dan wa ai re.

“Tatma 88 shang ai hpang yawng hprawng mat sai, anhte ma pru shang ai lam n galaw saga, March shata 25 ya hpang jahtum ngu na anhte hpang jahtum data galaw yu yang htinggaw 54 shang ngam ai, kalang hkrit na hprawng sai ni, ya gaw Myen asuya jawng bai lung mayu ai majaw bai shang wa rai ai, dai shang wa mayu ai majaw dai hku tsun ai rai nga ai, ya hte Nmawk hte Manje de na shang wa ai hpyen yen ni anhte ginwang de laika bai bang ai majaw, anhte gaw ya man nga ai shara ni hkan shara jahkrat tawn ai re,”  nga tsun ai.

Jinghpaw mung kata majan laja taw nga nna, hpyenyen ning nan grau grau law jat wa ai majaw, ni nawn ai nawku hpung hte Hpyen yen lakawn lanawn ni hku na mai byin ai ladat hte shara jaw ai lam ni galaw nga ai re.