Myitkyina Lekung Lawk hta Kani Nang Hpam Wanglu Wanglang Dut Mari Jai Lang Nga Ai Hpe Ahkyak La Ya Na Mare Masha Ni Myit Mada
Myitkyina Lekung lawk, Nawku jawng makau grup yin hta Kani hpraw htu ai masha lani hte lani grau grau law wa taw nga ai majaw, makau grup yin na mung shawa ni hta shim lum lam nnga wa ai nga, dai lawk hta nga ai mung mare masha ni kaw na chye lu ai.
Myen hpyen dap daru magam zing kau ai hpang, dai grup yin hta kani lusha htu ai masha grau grau law wa ai zawn, masha wuhpung nawng dut mari htu ai lam ni galaw taw nga ai nga, dai ginra na mung shawa langai KNG shiga dap de tsun dan wa ai re.
“Kani ya ni kaw lam makau kaw mahkawng jawng taw, dut ai ni gaw sengke hte jahkring mi dai kaw tsap nna, lawan ladan dut jaw kau da, kani ya ni gaw dai kaw nan htu, gadai hpe mung hpa n shadu, kani ya nau sawng ai majaw mare dum n’ta shim lum lam kachyi pyi n nga ai,” nga tsun ai.
Dai kani ya ni gaw masha mahkawng htu taw nga ai hta lata kaw sha n ga, lahprang kata ni de du hkra htu aprup taw nga ai majaw, dai makau grup yin ni hta nga ai amyu shayi ni shim lum lam n nga hkrit tsang taw ai lam matut tsun ai.
Ya kani ya law dik shara gaw, Lekung, Mali Yang na Nawku jawng makau grup yin na lam numshe shara ni hta law dik re lam ginra masha ni tsun ai.
Ya na zawn kani ya ni lam numshe kaji ni hta dut mari lu sha jai lang taw nga ai majaw, mare lawk hta nga ai mung shawa ni shim lum lam n nga ai zawn, tinang dum nta hpe aten tup yu sin ra taw nga ai re.
Kani ya ni shani shana lam makau hta ndai zawn lu sha jai lang taw nga ai hpe lit nga ai ni hku nna, ja ja lawan ahkyak la ya na hte dai ginra na kani dut mari ai ni hpe rim ahkyak la ya na ginra masha ni myit mada ra sharawng nga ai re.
