Myokung Mare Mung Shawa Tsi Rung Hpe Myen Hpyen Jet Fighter Nbungli Hte Wa Gap
Shwegu Ginwang, Myokung mare hta majan byin ai lam n nga tim Myen hpyen dap kaw na, Jet Fighter nbungli hte Pound (500) kaba ai nbungli bawm wa jahkrat bun ai majaw, asak (8) ning re ma kaji langai si nna, marai (6) Hkala hkrum wa ai lam chye lu ai.
June praw 2 ya jahpawt maga hkying 12 jan ai ten hta Mandalay maga na pyen lung wa ai Jet Fighter nbungli langai hte Pound (500) kaba ai bawm hte Myokung ninghtawn mung shawa tsi rung shawng hta wa hkrat bun ai majaw, tsi rung shawng na dum n’ta langai yawng hten ayai mat nna, makau na dum nta masum hte tsi rung dum n’ta ni mung hkra hten wa ai lam, dai ginra na rawt malan hpung ni KNG shiga de tsun dan ai re.
“Dai kaw machyi masha sin na nga taw ai asak 8 ning ra ma kaji langai si ai, shi kawa ngu na wa mung lagaw daw kau ra ai, laga marai 6 hkala hkrum ai, tsi rung shawng na n ta langai gaw hpa n mu mat hkra ayai mat ai, makau na dum nta 3 hte tsirung dum nta ni tsawm ra hten mat ai, wan shadaw ni daw ai, Nga dumsu 3 ma dai kaw si taw ai,” nga tsun dan ai re.
Myen hpyen dap maga ya na zawn mung shawa ni hkrai nga ai shara hta nbungli hte bawm wa jahkrat ai lam gaw, Nmawk, Manje majan ni hta hkra hkala ai ni hpe dai tsi rung hta tsi tsi ya taw nga ai ngu, n tsen n hten ai hte wa gap bun ai masa re nga, rawt malan hpung maga de na tsun maram da ai re.
Ya n bungli bawm wa jahkrat bun ai Myokung mare gaw, hpa majan byin ai lam mung n nga ai shara rai nna, mung shawa ni hpe hkrai laksan tsi gawn lajang ya taw ai mung shawa tsi rung re lam tsun ai re.
Nbungli hte wa gap ai Myokung mare gaw, Shwegu mare kaba, mali hka sinna maga de nga ai mare kahtawng langai rai nna, lai wa sai shata hta htim gasat zing kau lu ai Sinhkan mare hte deng 10 jan daram tsan ai mare re lam chye lu ai.
