Wunpawng Mungdan Shanglawt Hpyendap KIA Dapba 11, Nmau Ginwang Ginjaw hpe hpaw masat dat ai lam chye lu ai.
Nmau Ginwang Ginjaw, KIA Dapba 11 hpe Nmau hka mayan, Manwin, Ulang Pa Ginwang hte Shwegu Ginwang ni hpe masat da ai rai nna, dai shara ni yawng hta Myen hpyendap hkoi tsai mat sai re.
Dapba 11 hta e KIA hpyendap Dung 12, Dung 27 ginra ni hpe masat bang da ai lam chye lu ai.
Ya na zawn Dapba (11) hpaw masat dat ai lam gaw, KIA htim gasat zing madu da lu ai gaiwang kaba wa ai majaw, ndai hpe uphkang jum hparan ai hta masan sa na matu, hpaw jat dat ai re lam, KIO Ginjaw shiga dap lithkam, Dukaba Nhpang Naw Bu KNG de ndai zawn tsun dan ai re.
“Dai de e lamu ga ni tsawm ra dam lada wa ai le, mi na Sinpraw Ginwang Ginjaw na Ulang Pa Ginwang, Shwegu Ginwang ni sha uphkang ai hta e, ai n dep wa ai le, lamu ga grai dam wa ai le, mung shawa ni a nga mu nga mai lam, galaw lu galaw sha lam ni kaw na hkawt anhte hku na uphkang ai lam ndep n hkap byin wa ai majaw, ginwang ginjaw hpe bai hpaw masat dat ai lam rai nga ai,” nga tsun ai re.
KIA Dapba (11) Nmau Ginwang Ginjaw hpe bai hpaw masat dat ai shara ni gaw, Mungmyit Sinli hte Jinghpaw mung ginra shara ni lawm ai rai nna, lawu maga de Mabeing du hkra lawm ai re.
Ya na zawn KIA htim gasat zing madu mat wa ai gaiwang dam lada wa ai majaw, uphkang loi na matu hpaw jat ai rai nna, mungdan ting gap di la lu wa ai rai yang, matut hpaw jat mat wa ra na re lam Mung masa yu maram taw nga ai Sara langai ndai zawn tsun ai re.
“Shalawt da ai gaiwang dam wa majaw, uphkang loi na matu hpaw jat ai re ngu mu ai, Jinghpaw mung ting na, hpyen wa hpe lu jasan kau yang mung, Dap Ba/Dap Dung ni matut, hpaw jat wa ra na sha re. Uphkang hparan hparen ai masan sa na matu gaw,” nga tsun ai re.
Dapba (11) hpaw masat jat dat ai shara gaw, Miwa mung hte mung jarit masawn rai nna, dai ginra ni hta hpaga gunrai ginlen ai lam hte sut masa masa hpaga lam hta ahkyak ai shara re majaw, KIA maga ya na zawn lawan ladat hpaw masat dat ai re nga mung masa yu maram ai ni tsun ai re.
Wunpawng Mungdan Shanglawt Hpyendap KIA hta lai wa sai 2011 ning kaw nna, Dapba 10 du hkra hpaw masat da ai kaw na, ya dai ning 2024 ning hta Dapba ningnan langai hpe bai hpaw masat dat ai lam rai nga ai.
