Muse hte Munggu lapran Pang Sai ginwang daw, Hpaikawng Mare na hpaji jawng hta sharawt da ai Amyusha Dawnhkawn hpe Kokang MNDAA dap ni kaw na shayu kau ya ai hpe, KIA dap maga na lit nga ai ni bai sa sharawt da ai majaw, lahkawng maga masa lam shaja hkat taw nga ai re.
Kokang dap maga Hpaikawng hpaji jawng hta sharawt da ai Amyusha Dawnghkawn hpe Kokang MNDAA dap ni May 26 ya jahpawt shayu kau ya ai majaw, KIA maga na lit nga ai ni dai shana maga hkying 1 chyen daram hta bai sa sharawt da wa sai re.
Dai shana jang Kokang dap maga de na Dawnhkawn hpe lawan bai shayu na matu kahtap tsun wa ai rai nna, lama nan hte May 27 ya shana de hkying 3 du hkra n shayu ai rai yang, shan the ni nan bai sa shayu kau ya na nga tsun ai lam, dai ginra na mung shawa langai KNG de ndai zawn tsun dan wai re.
“Ndai jawng kaw, dai ning na Rawt Malan N’htoi shani kaw na rai nga ai, shan hte Miwa ni dawnghkawn sa shalun da ai majaw, anhte mung sa shalun da ai. Dawnghkawn lahkawng gaw rau shalun da ai she mani May 26 ya jahpawt shan hte Kokang ni anhte na Myusha Dawnghkawn sa shayu kau ya nna, anhte de na ninghtawn salang ni bai sa shalun da ai rai nga ai, dai shana de jang lawan shayu hpawt na de hkying 3 hpang jahtum nan hte n shayu jang anhte bai shayu kau ya na ngu bai tsun da malu ai, ya du hkra gaw rai n sa shayu kau ya ma ai” nga tsun ai re.
![](https://kachin.kachinnews.com/wp-content/uploads/2024/05/signal-2024-05-29-222344_002-300x173.jpeg)
Hpaikawng mare hpaji jawng hpe 2024 -2025 Hpaji jawng lung ladaw a matu, mare jawng komiti ni kaw na mying jahpan hta taw nga ai hpe, Kokang MNDAA dap maga na sa hkum pat ai lam ni galaw wa ai re.
Dai sa hkum pat ai hta, Jawng Up hte seng-ang ai jawng sara saranum ni hpe NUG asuya CDM jawng sara ni woi awn ai အထူးဒေသ ( ၁ ) ပညာရေးမှူး Sr Soe hte Sara Devid ngu ai yan hte matut mahkai galaw nna, hpaw na matu jawng up saranum hpe sa tsun wa ai re.
Dai jahpawt manap jawng mying hkap hta la taw nga ai ten, Kokang MNDAA dap ni kaw na jawng mying sa ap ai ni gadai hpe mung n shang shangun ai sha, chyinghka lam yawng pat sin kau nna, jawng mying hta ai lam hpe n galaw na matu tsun wa ai nga, ginra masha wa n dai zawn matut tsun dan wa ai re.
“1027 Majan masing ngut ai hte rau anhte mare komiti ni hku na dai kaw jawng hpaw na matu hkyen wa ai, dai hpe shan hte gaw shan hte na shara re, ahkang n lu ai jawng n mai hpaw ai nga na tsun wa ai, anhte gaw jawng hpaw saga ngu na mying jahpan hta nga yang, nmai hpaw ai mying jahpan mung n mai hta ai, mying jahpan kachyi myi mung n mai ka ai nga na bai sa hkum pat wa ai, shani ting mang hkang bai byin ai, shan hte kaw na Du Zawng nga wa yu wa nna, kachyi mi bai wa hparan kau da ya ai, mying jahpan gaw hta mu, dai hta la lu ai mying jahpan hte jawng sara saranum ni na jahpan ni yawng hpe shan hte Kokang de tang madun na hku tsun da ai” nga matut tsun wa ai re.
Jawng Up saranum hpe Kokang dap maga de na Munggu de nga ai Dukaba ni hpe wa jahkrum na matu atit anang tsun wa ai rai tim Jawng up saranum maga de na, dai de lung na matu ngai hta ahkang n nga ai ngu bai n htang tsun dat ai lam chye lu ai.
Kokang dap woi awn ai hpaji masing lam hpe hpaw sharin sa wa lu na matu, jawng sara saranum ni hpe du wa na May 28 kaw nna, June praw 3 ya shani du hkra wunkat jaw sa mat na re lam chye lu ai.
Dai zawn shan hte woi awn ai hpaji masing lam ni hta hkan nang let, jawng sara ni a shata shabrai ni hpe shanhte Kokang dap ni kaw na ya na hta grau jan hkra shata mi miwa gumhpraw Yuan 1500, Myen gumhpraw Sen 8 daram jaw na ngu ni tsun mat wa ai lam nga ai hpe matut chye lu ai re.
Dai ginra ni hta gaw lai wa sai ten ni kaw na rai tim, tinang lagaw tinang tsap ai hta, prang wang myusha hpaji masing lam hte sa taw sai hpe Kokang dap maga de na sa hkum pat wa ai lam rai nga ai.