Namlim Pa Mung Shawa Ni Majan Ten Na Bawm Ni Hpe Lawan Jasan Ya Na Ginra Masha Ni Myit Mada Nga
Shaning 10 ning jan hprawng shakram kau da ai Namlim Pa mung mare masha ni tinang mare buga de bai n htang wa nga lu na matu hkyen lajang shajin taw sai rai tim, Majan ten na laknak angaw angam ni hpe gadai rai n jasan ya shi ai majaw, mung shawa ni yak hkak taw nga ai re.
Ndai ten Manmaw mare kaba hta mung majan masa n htuk ai majaw, Manmaw Robert jawng wang hte Htoi San hpyenyen dabang ni hta shaning 10 jan ning sa du hprawng yen lai wa sai, Namlim Pa, Mungding Pa ginra masha ni gaw ya ten buga de bai n htang wa na hkyen taw ai rai nga ai.
Ya na zawn tinang mare buga de bai n htang wa nna, mare buga wa jasan na hta, majan ten na laknak angaw angam ni hpe gadai laknak lang wuhpung mung rai n jasan ya shi ai majaw, mare buga dum nta gaw gap ai lam hpe n wa gwi galaw ai nga ginra masha ni tsun nga ma ai re.
“Ya mare makau grup yin ni de gaw ga lup bawm ni grai naw lup tawn da ai, ga kanaw mawdaw hte a tsawm sha n ganaw kau yang mare dum nta wang de rai n gwi wa ai, ya ga ganaw mawdaw hte bawm seng taw tim pye leng hte rin hkra ai shara ni hta kapaw hkrum ai lam ni nga ai,” nga tsun ai.
Mare masha n kau gaw, nawku jawng wang makau grup yin jasan jaseng ai lam ni wa du galaw sai rai tim, mare kata jasan jaseng ai lam ni rai n lu galaw shi ai rai nga ai.
Dai ginra hta Majan ten laman na laknak angaw angam ni hpe lawan seng kau ya na hpe ginra masha ni myit mada ra sharawng nga ma ai re.
Manmaw hpyen yen dabang kaw na bai hprawng yen pru wa ai Namlim Pa hte Mungding Pa na mung mare masha ni yawng gaw ya ten, Mung Hkawng mare makau grup yin ni hta wa machyu shingbyi taw nga ai re.
