Jinghpaw mung hte Sammung jarit, Mabeing ginwang Moe Lung mare hpe Myen hpyen dap majan byin ai lam n nga ai rai tim, nbungli hte wa gap bun ai majaw, mung shawa hte hpungkyi marai 6 asak si sum nna, dum n’ta 10 wan hkru hten mat ai nga, ginra masha ni tsun ai re.
March praw 2 ya shana hkying 6 daram hta, Mandalay Tata Oo kaw na pyen lung wa ai Myen hpyen Jet Fighter nbungli hte bawm wa jahkrat bun ai hta, mung shawa dum n’ta 10 wan hkru hten mat nna, hpung kyi langai, amyu shayi langai, yawng pawng marai 6 asak si sum wa ai hte, laga mung shawa marai 7 mung hkala hkrum wa ai nga, dai ginra na mung shawa ni KNG shiga dap de tsun dan wa ai re.
“Anhte shara kaw hpa majan mung n byin ai, dai hku nbungli hte lung wa na bawm wa jahkrat bun kau da ai, dai wa jahkrat bun ai hta, Hpungkyi 1, amyu shayi 1 laga la wa ngan marai 4 si ai, ngut na hkala ai ni mung lawm ai,” nga tsun ai re.
Dai bawm wa jahkrat ai hta nta 10 daram mung wan hkru lawm mat ai lam matut tsun dan ai re.
Moe Lung mare hpe nbungli hte bawm jahkrat ngut ai hpang, Shwe Tung mare de mung bai wa jahkrat bun ai lam chye lu ai.
Nbungli bawm hte asak si hkrum ai ni gaw, ramma, wa ngan daw ni rai nna, shan hte a asak gade re ai ngu hpe a tsawm n chye lu ai re.
Ya ten dai ginra hta majan byin ai lam hpa n nga ai rai tim, Myen hpyen dap maga ya na zawn nbung li hte wa gap bun ai re nga, ginra masha ni ndai zawn matut tsun dan wa ai re.
Dai mare gaw, lai wa sai ten hta mung majan laja wa ai shara re majaw, dai mare na mung mare masha ni dum nta n lu mai byin ai hku nga taw ai kaw, ya na zawn nbungli hte kalang bai wa gap bun ai re lam chye lu ai.
Mabeing muklum kaba hpe KIA hte KPDF pawng hpawm dap maga lai wa sai January shata hta htim gasat zing madu kau ai hpang, Myen hpyen dap maga hpyen uphkang shara masat da ai ginwang mung rai nga ai.
