Myitkyina Putao lam kaba pat da ai nhtoi 20 ya du wa nga sai majaw, Putao mare kaba hta malu masha hte, jak sau ni dup hprut wa taw nga ai lam ginra masha ni tsun ai re.
Ndai shata praw 8 ya shani kaw na, Myen hpyen dap shara ni hpe Wunpawng Mungdan Shanglawt Hpyen dap KIA kaw na sa htim gap gasat wa ai hpang, mawdaw lam kaba hpe KIA hte pawng hpawm dap maga pat kau ai gaw, dai ni nhtoi 20 ya du wa nga sai hte rau sau mawdaw, gun rai mawdaw ni tsep kawp n shang mat ai majaw, malu masha hte jak sau ni dum hprut wa ai re nga, dai ginra na mung mare masha langai KNG de tsun wa ai re.
“Sau seng n kau ni nga yang pat mat sai, langai lahkawng ram naw hpaw ai gaw jahpawt daw jahkring mi sha hpaw ai, sau seng hpaw tim ra ai daram n lu la sai, Mawdaw langai hpe 20000, Sengke langai hpe 5000 na sha bang ya mat sai, laga malu masha ni mung grai yak wa sai,” nga tsun ai re.
Jak sau dum hprut wa taw nga ai sha n ga, malu masha lam ni mung dumhprut wa taw nga ai re.
Potao hta ya ten ba hkri si tsep kawp dumhprut taw nga sai rai nna, Udi 3 hta lap hkying 5, nga ai rai nna, laga sau shakau ni mung shawoi na hta htam lahkawng masum manu tsaw rawt mat sai re.
Sumprabum Myen hpyen dap shara hpe KIA htim gasat hpang wa ai kaw na, dai lam kaba yawng pat mat ai rai nga ai.