All posts by KNG

Shiga

Myen hpyendap rim da ai Rev. Hkalam Gum Hpan Lat Bai Lawt Pru Wa

Leave a comment

Jinghpaw Wunpawng Hkalup Hpung Ginjaw KBC, Sama Ginwang Amu madu Rev.Hkalam Gum Hpan Lat hpe Myen hpyen dap ni March 20 ya shana hkying 4 ram aten hta bai dat ya sai lam chye lu ai.

Rev Hkalam Gum Hpan Lat hpe lai wa sai January praw 30 ya shana, Myitkyina Dap Kawng Htoi San Lawk Sama Ginwang rung lakying kaw na shana hkying 7 ram aten shinggan jahkring pru ai ten, Myen hpyen dap ni rim woi mat ai rai nga ai.

Myen hpyendap gaw shi hpe Shanglawt hpyen du shadu nna, rim woi mat ai hpang adup zingri san jep hkrum ai lam mung nga ai nga, sara hte ni nawn ai ni, KNG shiga dap hpe tsun dan wa ai re.

“Dai shana rim woi mat ai hpang, Myen hpyen dap san Jep shara de sa kau ai, dai san jep ai shara kaw tsawm ra adup abyen zingri kau ai nga tsun ai, dai kaw na Myitkyina Masat 1 Balik dap kaw bai wa sharen da ai.” nga tsun dan ai re.

Dai zawn Sara Gum Hpan Lat rim hkrum ai lam hpe, PCG kaw na hting let ya let, laika bang na bai shaw la ai re lam matut chye lu ai.

Rev. Hkalam Gum Hpan Lat gaw, Myitkyina Masat 1 Balik dap Hkyuk hta Shata mi Jan rawng nna, lawt pru wa ai rai nga ai.

Sara rim hkrum ai shana hta Mawdaw hte hpawn rim hkrum mat wa ai rai nna, ya ten du hkra Mawdaw hte Mung Chying Masat hpe rai n jaw shi ai re lam chye lu ai.

Rev Hkalam Gum Hpan Lat gaw, lai wa sai 2021 Ning kaw na Sama ginwang a Amu Madu magam let hpe gun hpai wa ai mung rai nga ai.

lamu ga, Shiga

Laiza grup yin hkashi ni hta maza hta ai lamang galaw

Leave a comment

Mungkan hkashi Hkanu masat n htoi hpe, Laiza mare kata hkashi ni hta maza hta ai lamang hku nna galaw wa ai lam chye lu ai.

Ndai lamang hta Laiza Municipal, CSO magam gun ni hte Mung shawa kanu kawa ni jawm galaw wa ai rai nna, dai lamang hta mung shawa yawng marai 300 jan sa du shang lawm ai lam chye lu ai.

KIO uphkang ginra, Laiza makau grup yin na Hkashi Hkanu ni hta Plastic maza mala law taw nga ai hpe shayawm wa lu hkra hte, Hka de maza n kabai bang na lam hpe hpaji jaw ningmu jahpaw mayu ai lam a majaw, n dai lamang hpe woi galaw ai re lam, Htoi Gender and Development Foundation Director Srn Nbau Nang Pu tsun ai re.

Myen hpyendap daru magam zing kau ai hpang, mung masa shamu shamawt ai mungshawa ni Laiza de du wa ai hpang, shaning shagu, ndai zawn lamang ni hpe galaw nga ai re.

Shiga

KIA dung 6 hpe Myen hpyendap nbungli bawm wa jahkrat

Leave a comment

Hpakan KIA Dapba 9, Dung 6 hpe bat 5 ya jahpawt, Myen hpyendap Nbungli hte Bawm wa jahkrat gasat ai majaw, hkala ai lam nga wa sai re.

Mandalay Tada U de na lung wa ai Jat nbungli 2 gaw,March 10, Bat 5 ya jahpawt hkying 1 ram aten, KIA Dung 6 lama bum mayan Bawm 4 lang wa jahkrat bun ai lam shawnglam shi sawk ni kaw nna chye lu ai re.

Dai zawn, Myen hpyendap nbungli bawm ma ja wa jahkrat bun ai majaw, KIA maga marai 3 hkala nna, Shat gawk hte, Tsi rung gawk ni hten za mat ai lam nga ai hpe chye lu ai re.

Hpakan, KIA Dapba 9 ginra hpe Myen hpyendap gaw majan nbyin ai raitim, Nbungli hte dingyang pyen kawoi ai lam ni, Bawm ma ja wa jahkrat bun ai lam ni galaw nga ai rai nga ai.

Lai wa sai 2022 ning October 23 ya shana hta mung, A Nang Pa hta Myen hpyen dap n bung li  bawm wa jahkrat bun ai majaw, Magam gun ni hte mung shawa marai 100 hkawt asak si sum mat wa sai re.

Shiga

Hpakan mungshawa marai 7 hpe Myen hpyendap rim sharen da

Leave a comment

Hpakant ginra hta Myen hpyen dap ni, n dai laman mara kata mung shawa ni hpe majoi rim jep ai lam ding yang galaw nga ai re.

March praw 7 ya shana hkying 11 ram aten hta mung, Hpakant Mawwan Lawk, Shu-Dawng-Thit Hpalap seng madu hte seng magam gun marai 3, hpalap lu taw ai marai 3, yawng marai 7 hpe Myen hpyen dap ni rim woi mat wa ai re.

Shan hte marai 7 hpe Hpakant balik dap hta rim sharen da ai rai nna, hpa majaw rim ai ngu hpe ya ten du hkra a tsawm tup hkrak n chye lu ai re.

Rim hkrum ai hta lawm ai hpalap seng madu gaw, Ko Soe Naing ngu ai wa rai nna, seng kata Wifi sa lang taw nga ai ni hte seng magam gun ni a mying hte gara shara kaw na ni re ngu hpe gaw a tsawm tup hkrak rai n lu sagawn lu shi ai re.

Hpakant hta Myen hpyen dap daru magam zing ai hpang kaw nna, Internet line di kau hkrum ai majaw, hpalap seng, lusha seng ni hkan hkying hkum mi 5000 hte 10000 daram jaw na jai lang ra nga ai re.

Myen hpyendap ni n dai laman Hpakant ginra hta masha wunawng rim ai lam ni ding yang galaw wa taw nga ai rai nna, n kau hpe dat ya ai lam nga ai raitim n kau hpe matut rim sharen da ai lam ni nga taw ai re lam chye lu ai.

Shiga

Mungkan Amyu Shayi Masat Nhtoi Lamang hpe Woichyai Hpyen yen dabang hta galaw

Leave a comment

March shata praw (8) ya shani ang ai Mungkan Amyu Shayi masat n htoi lamang hpe, KIO uphkang ginra Woichyai hpyen yen dabang hta, mung shawa marai 700 sa du shang lawm ai hte galaw wa ai re hpe chye lu ai.

Dai lamang hpe, Htoi Gender & Development Foundation woi awn let ‘Rap Shara Myit Hkrum Rau Ta Gindun’ ngu ai gabaw hte galaw ai re lam chye lu ai.

Tinang ginra hta Num La n bung ai lam nga ai hpe rap shara chye wa lu na matu yaw shada let n dai lamang hpe woi galaw ai re lam, Htoi Gender & Development Foundation a Director Nbau Nang Pu, KNG shiga dap de ya na zawn tsun dan ai re.

“Rap Shara Myit Hkrum Rau Ta Gindun ngu ai hta, Num hte La gaw shangai wa ai kaw na a tsam, hkrang n bung ai lam ni nga ai, Num ni hta gawng kya ai lam ni grai nga ai, dai zawn re n bung ai ra gadawn ai lam hpe rap shara ai hku na galaw ya ra ai, dai hpe rap shara sa wa ai shaloi rau sha ta gin dun na myit hkrum mang rum hte galaw sa wa na ahkyak ai.”

Ndai lamang hta Ginjaw Laiza ginra hta nga ai CSO, NGO, CDM, Ginjaw amyushayi magam dap, Tsi Jawng ma ni hte hpyen yen dabang hkan na mung shawa yawng marai 700 jan sa du shang lawm ai lam matut chye lu ai.

Shiga

Hkasan mare hta hpyen masa zim sai majaw, dum nta bai wa sai

Leave a comment

Myen hpyendap ni mare kata kaw na pru thing nut mat sai majaw, Hkasan (ရေကြည်) hpyenyen mare masha ni gaw myit tsang ai lam naw nga taw ai raitim, dum n ta bai nhtang wa taw sai re.

Wungpawng Mungdan Shanglawt Hpyendap KIA dung 11 ginra, Myitkyina, Hukat, Hkasan mare maga Myenhpyendap hte SNA pawm hpawm dap hte hpyen masa shaja hkat wa ai majaw, mare masha ni March 4 ya shani kaw na hpyen yen mat ai raitim March 6 ya gaw tinang mare dum n ta bai wa sai lam tsun ai re.

Myen hpyendap n gun 300 daram the mare de htim shang wa ai ten, Tai lum mare na, mung masha dum nta gat seng langai mung wan nat kau ya ai lam nga ai re.

Dai sha n ga, hkasan mare na Mare masha 20 Jan hpe mung porter woi mat nna, 2 ya na ai hpang, march 5 ya shani she bai dat ya ai chye lu ai.

Myitkyina, Hkasan mare gaw, Laiwa sai 2021 ning kaw nna, Hpyenyen ni hpe dum n ta gap ya nna, 2022 ning May 25 ya shani mare masha ni dum n ta wa nga hpang ai ya htingaw 80 ram nga ai re.

Shiga

Mung shawa marai 9 sat hkrum ai mabyin hta lit nga ai KIO/KIA lawan hparan ya na matu dum nta masha ni hpyi shawn

Leave a comment

Wunpawng Mungdan Shanglawt Hpyendap KIA Dap Ba 2 ginra, Lawa ninghtawn, Magawng Tawng mare hta, mung shawa marai 9 sat hkrum ai mabyin hte seng nna, lit nga ai KIA dap dung 20 ni hku nna tara rap ra ai hku lawan hparan ya na matu dum nta masha ni hpyi shawn nga ai re.

Lai wa sai January 24 ya shani Lawa mare makau, Magawng Tawng mare na Sara Daw Pa hta, Namti mare kaw na Slg.Laude Yaw Han hte rau shi manang ni nga-hkwi sha sa ai ten, KIA hte PDF ni rim woi mat wa ai hking hkum 6 laman hta sha, sat kau hkrum ai re.

Mungshawa marai 9 sat kau hkrum ai shata mi ladu hkrum sai raitim, ya ten du hkra shanhte hpe gara kaw lup makoi tawn da ai lam n tsun dan shi ai majaw, dum nta masha ni hpe shalan shabran kyuhpyi la lu hkra, lawan lajang ya na matu, sat kau hkrum ai Slg. Laude Yaw Han a dum nta masha langai n dai zawn tsun ai re.

“lit nga ai ni gaw anhte na moi mang hpe shaw ya na matu dai ni, hpawt ni nga di gaw tsun taw ai tim nteng mat mat re. Galoi sa woi shaw na kun gara hku bai tsun wa na kun nchye ai. anhte byin mayu ai gaw mang hpe lu da di kyuhpyi la myit shalan la mayu sai. Ya gaw shata mi mung du wa gara hku di baw re mung n chye jam jau taw nga ai” tsun ai re.

Ndai mabyin hta sat kau hkrum ai mung shawa marai 9 gaw, asak 47 ning Slg. Laude Yaw Han, asak 49 ning Slg. Kyaw Soe, asak 56 ning Slg. Lazum Tu Lum, asak 35 ning Slg. Lazum Htoi Shawng (Htun Aye), asak 28 ning Jan Hpauma Hkawn Bu, asak 28 ning Jan Ndau Htu Nan, asak 27 ning Htun Yung, asak 50 ning Slg. Myint Htwe hte asak 27 ning Shd. Hpoe Lay ni rai nga ai.

Slg. Laude Yaw Han gaw Namti Pat Ja San magam hta ningtau ningbaw lit hpe gun hpai taw ai wa rai nna, Jan Hpauma Hkawn Bu hte Jan Ndau Htu Nan yan gaw Monyin, Sahmaw buga hpung masha re ai lam chye lu ai.

Slg. Lazum Tu Lum, Slg. Lazum Htoi Shawng (Htun Aye), Slg.Myint Htwe hte Slg.Htun Yung, dai marai 4 gaw Manmaw Buga Hkalup Hpung Je-In hpung lawk kaw na rai nna, Slg.Lazum Tu Lum gaw Sr. Kaba Lazum La Tsun Masat Gawk Nu Alu Tam Hpa-awn lit hkam re lam chye lu ai.

Rim nna sat kau hkrum ai mung shawa marai 9 hta Slg. Kyaw Soe ngu ai wa gaw Sam Hkyeng amyusha langai rai nna shi a nga shara gaw Mogawng mare kaba kaw na re lam chye lu ai. Dai marai 9 hta Hpoe Lay hkrai sha Slg. Kyaw Soe a jinghku re lam chye lu ai.

Ndai mabyin gaw mung shawa yawng hpe hkrit gahpra kajawng shangun ai re majaw, n tara sat hkrum ai mung shawa marai 9 matu tara rap ra lam pru wa hkra, ginra masha marai 17 lawm ai ‘Lam Tam Komiti’ hpe hpaw nna ya ten shakut nga ai re.

KIA Dap Ba 2 hte KIO/KIA Ginjaw de mung, ndai mabyin hta tara tawt lai ai ni hpe ahkyak la ya na matu hpyi shawn da ai hpe matut chye lu ai.

“anhte gaw masha mat ai mabyin kaw nna komiti hpaw let, sawk sagawn hpang wa rai nga ai. Ya gaw mang hkang npawt byin wa ai hpe jawm sagawn lu saga ai. Raitim sat kau hkrum ai masa lam hpe gaw npawt ndung hkren chye lu hkra naw shakut taw ai. Si mat sai ni na moi mang ni hpe ma lu hkra shaw la na matu rai nga ai. bai nna KIO/KIA maga na mung ndai lam gaw yawng hpe a htu hkra wa mai ai mabyin lam re majaw atsawm sha ahkyak la galaw sa wa na gaw nga tsun da ai. Raitim ya ten du hkra, lak lai lam n nga shi ai” nga nna ‘Lam Tam Komiti’ malawm, mying ntsun wam ai Salang langai KNG hpe tsun ai.

Marai 9 sat hkrum ai mabyin gaw January 24 ya shana, Slg. Laude Ya Han hte manang ni yawng, Magawng Tawng mare na Slg.Kyaw Soe a sun wang hta wu wu di di hpawng chyawm taw nga ai ten, shana 8:00 daram hta KIA hte PDF ni sa rim woi mat wa re lam sawk sagawn lu ai re.

Dai mung shawa marai 9 rim hkrum ai Januray 24 ya shani sha, Mogawng Mungshawa Makawp Maga Dap PDF rai nga ai UG BLACK-K kaw nna, Sam Hkyeng Pyithusit ningbaw Slg.Kyaw Soe hte rau shi masha marai 9 hpe Lawa mare makau hta lu rim ai lam KNG shiga dap hpe tsun dan lai wa sai re.

Dai mabyin hte rau kalang hta, January 28 ya shani Hpakant hte Myitkyina lam n maw kaba ntsa na Myen hpyen du Paing Thu Soe ngu ai wa hpe mung bai lu rim la ai lam UG BLACK-K ni tsun da ai re.

Ndai lam hte seng nna ginra masha ni hpe san yu yang, Slg.Kyaw Soe gaw Sam Hkyeng amyu sha langai re lam chye lu tim, Pyithusit ningbaw rai, n rai gaw tup hkrak nchye ai lam, tsun ai re.

Mung masha marai 9 sat hkrum ai mabyin gaw shinggyim ahkaw ahkang tawt lai ai, kaba dik mara langai re majaw, ja ja ahkyak la ya na matu n dai mabyin hpe chye lawm ai Namti buga na Slg. Langai gaw n dai zawn tsun ai re.

“ndai gaw shinggyim ahkaw ahkang tawt lai ai mung re. Hpyen masa lam hku mung rai rai nbyin gying ai mabyin langai re. Mara kaba ai ni hpe pyi anhte gaw san jep sawk sagawn na galaw sa wa ai baw she re. Ya gaw lani mi lana mi aten sha masha marai 9 sat kau ai ngu gaw labau hta ma n tsawm sai. Bai nna shanglawt hpe ya ten yawng e mung masan sa ai hku na hkap la da ai ten re majaw myit yu ra ai. Dai majaw shi htung nga ai hte maren lawan galaw ya ra ai” nga nna hpyi shawn ai re.

Ndai mabyin gaw dai ni, shata mi ladu hkrum sai rai nna, seng ang ai Shanglawt Asuya kaw nna lawan lit la hparan ya ra ai lam  hpyi shawn ai re.

Matut nna, Slg. Laude Yaw Han a dum nta masha langai mung, KIO lit nga salang ni hpe ndai zawn hpyi shawn da ai.

“Anhte ni gaw ya na zawn kalang ma nhkrum sha yu ai. Ya ten gaw anhte dum nta masha ni gaw myit ru tsin yam hkrum sha taw ai ten re.  Ndai hpe KIO asuya kaw nna gara hku lit la ya na ngu sha chye mayu ga ai. KIO ngu gaw anhte a matu kam hpa gying ai asuya langai re majaw ndai mabyin seng na lawan hparan ya na hpe sha ra ai law”

Ndai lam hpe KIA hpyendap hku nna komishin hpaw sawk sagawn taw sai lam, Wunpawng Mungdan Shanglawt Hpung KIO Ginjaw, Shiga Dap Lit Hkam Dukaba Nhpang Naw Bu, KNG hpe tsun ai.

“dai daw gaw hpyendap kaw nna komishin hpung hpaw nna jep sagawn ai madang kaw rai taw nga ai. Hparan ai daw gaw rai ndu shi na re.”  nga nna tsun ai.

Danai lido lam ntsa, Lawa mare makau hta ya na zawn mung shawa marai 9 sat hkrum ai mabyin a shawng daw, ya sat kau hkrum ai Slg.Kyaw Soe hte ginra masha nkau lapran, lamu ga manghkang loi li nga ai lam, tsun nga ma ai raitim tup hkrak nchye lu shi ai re.

Mung shawa marai 9 hpe hpa majaw KIA dung 20 hte PDF ni sat kau ai ngu ai hte seng nna, lit nga ai Shanglawt Dap lit hkam ni sang lang dan ai lam sha n rai yang, kadai mung chye na matu yak nga ai re.

lamu ga, Shiga

Dingsing Pa hta ga sau htu nan htu na lam KIO salang ni hku nna ginra masha ni hpe tsun

Leave a comment

Manmaw, Dingsing pa ginra hta gasau htu shaw na re majaw, woi awn ninghkap ai ni hpe ahkyak la na nga nna, Sinpraw Ginwang Ginjaw KIO asuya uphkang salang nkau tsun wa ai lam, Dingsing pa ginra masha ni tsun ai re.

February 17 ya shani, Dingsing Pa, Hpakgum mare hta Sinpraw Ginwang Ginjaw salang ni sa du let, ga sau htu shaw na hkyen ai mare kahtawng hkan na mung shawa ni hpe shaga la n htawm, hkrum zup hpawng hta ga Sau htu na lam hte seng nna, tsun shana wa ai lam dai zup hpawng hta shanglawm ai Dingsing pa ginra masha langai KNG hpe n dai zawn tsun ai.

‘’ndai gaw ginjaw matsun re majaw gaw n htu sha yang n mai ai. htu nan htu sha ra ai nga na dai hku na zup hpawng sa hpawng ai lam ni nga ai. Dai re majaw dai magam bungli hta e hkan pat nang ai, nhtu shaw sha na matu hkan ninghkap woi awn ai ni hpe anhte Asuya ni kaw na shi hte ging dan ai hku na ahkyak la na re nga na tsun ai ‘’

Sinpraw ginwang ginjaw amu madu, Mai Ja yang muklum Du, Manmaw ginwang D.O hte Zai Ladat Du, ni sa du let, ga sau htu shaw na galaw tawn ai, Hpakgum, Dingsing, Dingsing bum,Hkapra, Njungbum, Hpaidan, Darawn, Hka u, Jan mai, dai mare kahtawng hkan na mung shawa ni hpe shaga zup hpawng la nna, tsun wa ai lam chye lu ai.

Mare masha yawng 200 Jan sa du shanglawm ai rai nna, dai shani na zup hpawng hta, Sinpraw Ginwang Ginjaw Amu madu wa ‘ginjaw matsun hte ga sau htu shaw na re majaw, ninghkap woi ai ni hpe ahkyak la na re ngu’ tsun ai ga si a majaw, myit kaw hkra nna, kanu mum Jan Lahtaw Roi Asak 56 ning, salum, sai rawt ana hte dai shara hta malap mat nna, tsi rung sa ai lam hta nan, n nga mat wa ai mabyin mung byin wa ai hpe chye lu ai re.

KIO asuya hku nna, dai zawn tsun shana wa tim, Mare masha ni hku nna chyawm, Ja ja matut ninghkap mat na lam, Ninghkap Komiti malawm, Dingsing pa ginra masha langai matut tsun ai.

‘’ndai mare kahtawng 9 hpe sha shanhte shaga ga hkying nna sa hkaw tsun ai lam nga shanhte gaw lu htu hkra nga anhte mare shawa ni mung ndai hpe gaw yawng hkra nlu, ninghkap na ngu ai lam nga ga ai”

February 17 ya dai shani hta sha, Dingsing Pa ginra masha ni hku nna, ya sa sau htu shaw na matu galaw tawn ai dabang ni hpe February 28 ya shani hpang jahtum tawn dawm kau ya na matu, Sinpraw Ginwang Ginjaw, Ninghtawn rung, ginwang daw hkan e mung Laika bang hpyi shawn da ai lam nga ai hpe matut chye lu ai.

N dai zawn masa Lam ni the seng nna, KIO Sinpraw Ginwang Ginjaw de KNG shiga dap kaw nna, matut mahkai ai raitim, matut n lu ai re.

Ginra masha ni hku nna, na ja matut ninghkap na lam gaw, tinang a labau shang lamu ga ginra ni hten za mat na hpe myit tsang ai, n ra sharawng ai majaw, re nga tsun ai re.

Lai wa sai February 15 ya shani gaw, Dingsing Pa ginra masha ni hku nna, Ga Sau htu shaw ai lam hpe Ja ja jawm ninghkap mat na matu, ningmu jahpaw zuphpawng ni galaw wa ai lam nga ai re.