Mana Hkying 9 chye kaw Myen Hpyen ni, Hpakant Namhpyit Kahtawlik Hpyen Yen dabang kaw Myen ni laknak kaba gap bang ai majaw, Ma kaji langai asak si hkrum nna, nta masha ni hkala hkrum wa ai lam, ginra masha ni tsun dan wa ai re.
April 23 ya shana Hkying 9 jan aten Namhpyit Naga Yung Gawngngu kawng kaw dung ai Myen hpyen ni gap dat ai laknak kaba si, Namhpyit Kahtawlik Hpyen Yen dabang kaw wa hkrat ang ai majaw, Slg Dumdaw La Tawng a kasha Dumdaw Gam Maw asak (13) ning re ma asak si sum mat nna, kanau Ma Naw madaw ngu na wa gaw, hkala hkrum wa ai nga, Hpakant ginra masha Langai KNG Shiga dap de n dai zawn tsun dan wa ai re.
“Mana hkying 9 Minute 20 kaw Namhpyit Hpyenyen kaw Myen ni a laknak kaba wa hkrat bun ai majaw, Slg Dumdaw La Tawng a kasha Dumdaw Gam Maw asak (13) ning re ma asak si sum mat nna, Kanu hte Kanau Ma Naw ngu na yan mung hkala ma ai nga,” tsun dan ai re.
Ya ten dai makau grup yin yawng hta Myen Hpyen ni shara la da ai lam chye lu ai.
Myen Hpyen ni nga taw ai shara gaw, Rahkaing Htunghking rung, Mawsiza Hpungkyi Jawng, Namhpyit Naga Yung hpara kawng ni hta dap jung shara la na nga taw ai lam chye lu ai.
April 23 ya shana de hkying 4:45 Pm ten, KIA ni pat hkum da ai Seng Tawng, Kyauk Twi Tawng, Uru hka hte Gwihka hka mazup maga de simai tam hkawm ai shan Nu ni bawm kabye la nna, Kanu ngu na wa dai shara hta nan si mat nna, kasha ngu na yan gaw, hkala hkrum wa ai lam chye lu ai re.
Si hkrum ai Hpawmi gaw, asak (36) ning re ai Hpawmi Thu Za ngu ai wa rai nna, Hkala hkrum ai yan gaw, kasha Myint Myat Thu Asak (11) Ning hte Shd Pyi Sone Aung Asak (7) ning yan gaw, hkala hkrum ai lam chye lu ai.
Ndai laman Hpakant ginra shara shagu hta, Myen Hpyen dap hte Pyithutsit dap ni hpyen shamu shamawt ai lam galaw nna, mung shawa ni hpe ladu lai san jep ai lam galaw nga ai majaw, Hpakant ginra kaw nga nna, hkawm sa taw ai mung shawa ni yawng, sadi sahka let a tsawm hkawm sa na lam, lit nga ai ni tsun sadi jaw da ai re.
