Mawsiza Htun Tauk Sau Seng shingdu na Lashu Kawng na Myen Hpyen Hpung Ni hpe KIA Drone Bawm Sa jahkrat Bun
Hpakant Lawnghkang pru wa lam, Mawsiza Htun Tauk Sau seng shingdu kaw, shara la nga ai Myen Hpyen ni hpe KIA KPDF pawng hpawm dap ni drone bawm sa jahkrat bun ai hta, Myen Hpyen maga si hkala ai lam nga ai nga, KIA hte ni nawn ai Salang ni kaw na chye lu ai.
Dai na maga de hkying 2 aten daram hta, Mawsiza Htun Tawk Sau seng makau na, Lashu Kawng hpe KIA maga Drone bawm sa jahkrat bun ai hta Myen hpyen maga sum machyi ai lam nga ai majaw, makau grup yin ni de sinat kaji kaba bai gap shadam bun ai majaw, makau kaw nga ai asak 6 ning re ai ma kaji langai hte dinggai langai hkala hkrum wa ai nga, ginra masha langai KNG de n dai zawn tsun dan ai re.
“Mawsiza Htun Tauk Sau Seng shingdu kaw, anhte Jinghpaw ni gaw, Lashu Kawng ngu tsun ai dai shara kaw Myen ni nga taw ai hpe laknak kaba kun, Drone kun sa gap bun ya ai kaw Myen ni loi machyi mat sam ai, makau grup yin de sinat bai gap shadam ai majaw, Ma kaji langai the dinggai langai hkala ai da, ya dai hkala ai ni na mying asak ni hpe sagawn nga ding yang re,” nga tsun dan ai re.
Myen hpyen maga si hkala ai ni hpe dai na maga hkying 5 aten daram du hkra, AD Van Mung Shawa jawn mawdaw the sa lahka htaw la taw ai lam matut chye lu ai re.
Dai shara kaw nga ai Myen hpyen hpung ni gaw, lai sa lai wa mung shawa ni hpe ladu lai san jep taw nga ai Myen hpyen hpung hte Pyithutsit ni re lam chye lu ai.
Warazup Pyithutsit hpung ni ndai April shata kaw na, Hpakant de du lung wa ai hpang, mung mare masha ni hpe ding bai ding na jaw ai lam ni ding yang galaw taw nga ai nga, ginra masha langai mung KNG de n dai zawn matut tsun dan wa ai re.
“Ndai April 10 ya ram kaw na Min Zin Thant Pyithutsit ni du ai hpang kaw na, anhte Hpakant ga mung shim lam n nga mat sai, Mung Shawa ni hpe ladu lai san jep, lawm wa ai gumhpraw, Lungseng ni yawng hpe mung kashun la kau ya rai, shan hte kam ai hku she lagu sha taw ma ai,” nga tsun dan ai re.
Lai wa sai Hka Jaw Poi ten laman hta mung, Rahkaing mung shawa marai 3 hka jaw poi sa pyaw ai mung shawa ni hpe rim zingri sat kau ai lam mung nga ai hpe matut chye lu ai.
Dai laman sha Malang Yang mare Kahtawlik Nawku Jawng wang kaw hprawng yen taw ai Hpyen yen Ma kaji Langai mung Sinat pala shadam hkra ai majaw, Ma kaji langai asak si hkrum wa sai re.
