All posts by KNG

Nmawk mare kata Myen hpyendap hpe KIA bawm hte hkap gasat

Nmawk Mare kata hta dai hpawt manap hkying 11 daram e, Myen hpyen dap shamu shamawt hkawm ai hpe Wunpawng Mungdan Shanglawt Hpyendap KIA dung 15 ni bawm hte hkap gasat ai kaw nna Majan byin wa ai re.

Myen hpyen dap gap dat ai laknak kaba si, mung shawa dum n ta hta wa hkrat nna, n ta numgaw malawng mat ai hte Mung shawa langai, lagaw lahkawng maga hkala hkrum wa ai re lam chye lu ai.

Myen hpyen dap Hk-M-Y 437 dap na hpyen hpung ni hte Kyuhpyi bum maga de na yu wa ai Myen hpyen hpung ni hpe Nawng Pau lam num she hta bawm hte hkap gasat dat ai hta, Myen hpyen dap maga na si hkala ai lam nga ai majaw, mung shawa dum nta 2 hte Sengke gram seng langai hpe wan nat jahten kau ya ai lam matut chye lu ai.

Myen hpyen dap ni kaw na, n dai laman Lung Ja bum maga de laknak hpyen n gun bai jat shalun la na matu, lam de shim lam sa la ya na matu, Hk L Y 437 na ni hte Kyuhpyi bum na yu wa ai Myen hpyen hpung ni hpe hkap shing la dat ai re lam, shawng lam magam gun ni kaw na chye lu ai.

Dai zawn Myen hpyen dap ni nat kau ya ai n ta wan hkru ai majaw, dai kaw na mare ting wan hkru wa na hpe myit tsang ai majaw, mare salang wa kaw na wan sat dap de wan sat mawdaw shaga ai raitim, n tsa na matsun n lu ai nga nna, n sa sat ya ai re lam buga masha langai ya na zawn tsun dan ai re.

majan kata mung shawa hkala hkrum ai lam

“Mare salang wa gaw, Myen hpyen la ni nat kau da ya ai n ta kaw na mare ting wan hkru wa na masa nga ai majaw, wan sat dap de wan sat mawdaw shaga ai, ntsa na matsun n lu ai nga na n sa ai, mare masha ni hpe jawm shaga gahkyin na bai sat yang mung gadai n jaw sat lu na, nga nna Myen hpyen la ni sinat madi wa ai, dai hku hkru nga u ga nga tsun ai” nga mare masha langai KNG shiga dap hpe tsun dan wa ai re.

Dai zawn Myen hpyen dap ni hkap kapaw hkrum ai hpang mare ting laknak kaji kaba n sen ngoi hpang wa ai gaw dai na maga de du hkra re lam chye lu ai.

Nmawk mare kata de ya na zawn gap gasat hkat wa ai majaw, mung mare masha n kau Manmaw de hprawng yen ra taw ai re.

Dai zawn gap gasat hkat ai hta hpyen dap lahkawng maga sum machyi ai lam nga n nga hpe a tsawm n chye lu ai raitim, Myen hpyen dap ni hpe bawm hkap kapaw bun ai re majaw, Myen hpyen dap maga sum machyi si hkala ai lam nga na re lam, buga masha ni matut tsun dan wa ai re.

Nmawk ginra Lung Ja Bum mayan de Myen hpyen dap ni lai wa sai October 22 ya shani kaw na wa htim gap gasat hpang wa ai gaw, dai ni ten du hkra gap hkat dat, zim dat masa naw rai taw nga ai re.

Nmawk, Lung Ja Bum Lagaw na Yi Hkauna Hkan, Mam Nmai Dan La

Nmawk Giwang Lung Ja Bum lagaw na mare kahtawng ni hta Myen hpyen dap ni dap jung shara la taw ai hte, shani shagu ngu na laknak kaba ni gap shadam bun taw ai lam ni a majaw, Mung mare masha ni Hkau na mam shu dan la na matu shimlam nnga nna, yak hkak taw ai lam chye lu ai.

Lung Ja mare, Nawng Pau mare, Wa Wang mare hte Nmawk Hka Nan lawk ni hkan na, mare masha law malawng a hkau na gaw, Lung Ja Bum lagaw grup yin hkan rai nna, Myen hpyen dap ni kaw na laknak kaba ni hte jahkring hkring gap shadam bun ai majaw, kadai nlu dan ai sha, n kau mam ni krawp mat ma wa sai lam, Nmawk Hkanan lawk na mung mare masha langai KNG shiga dap de tsun dan ai re.

“Dai hkau na makau grup yin de sha myen hpyen dap ni shani shagu ngu na lak nak kaba gap bang taw ai, shaloi gaw mung shawa ni asak hte rang na gadai n gwi sa dan ai. Gumhpraw law law jaw na gun jang shaga na tim pyi gadai n gwi sa taw ai, dai zawn byin taw ai majaw, dai ning gaw mam lu dan n lu dan pyi n chye sai. Lama n lu dan yang gaw, du na shaning hta gaw gara hku lai di ra na re pyi n chye sai” nga tsun ai.

Lung Ja bum lagaw mayan hta hkau na Eka 800 ram nga ai lam matut chye lu ai.

Ya ten n kau lam kaba, mare hte ni ai shara hkan na mam ni hpe gaw lu dan la ai lam ni loi li nga taw sai rai tim, bum lagaw maga de na hkau na mam ni hpe tsep kawp rai n dan la lu shi ai lam matut chye lu ai.

Lai wa sai shaning ni hta mam dan manu lani mi  5,000 ram sha jaw ra ai rai tim, majan n hpan lam ni a majaw, ya ten dai ginra hta lani mi mam dan gun jang manu 8000 hte 10,000 mi lapran jaw ra tim dan na tsang ra taw ai chye lu ai.

Lai wa sai October 22 ya shani kaw na Myen hpyen dap gaw, Lung Ja bum hpe htim gasat hpang wa ai rai nna, dai ni ten du hkra laknak kaba ni jahkring hkring gap shadam bun ai lam ni nga taw ai lam chye lu ai.

Dai zawn laknak kaba gap shadam bun ai lam ni a majaw, mung mare masha ni asak si sum ai lam hte hkala n ba hkrum ai lam ni mung nga wa sai re.

Seng Tawng Myen hpyen Dap Gasat Hkrum nna Hkala ai lam nga

Hpakan Seng Tawng lahta tsang jawng makau hta dap jung nga ai Myen hpyen dap ni hpe Mung Shawa Makawp Maga Dap PDF ni kaw na 79 mm laknak si lahkawng hte sa gap bun ai hta Myen hpyen dap maga de na marai 5 ram hkala hkrum ai lam chye lu ai.

November praw 7 ya shana maga hkying 4 ram aten Hpakant PDF ni sa gap bun ai rai nna, dai hta wa du taw ai Myen hpyen hpung ni marai 5 ram hkala hkrum wa ai re lam, Hpakant ginra masha ni KNG shiga dap de tsun ai.

“Mana maga hkying 5 ram hta sa gap bun kau da ma ai, n sen tsawm ra ja ai, si ai lam nga n nga hpe a chyawm a tsawm tup hkrak n chye lu ai, mana gaw marai 5 si ai zawn zawn nga nna, si gaw n si sam ai, tsi tsi taw ai nga ma ai.” nga tsun dan wa ai.

Dai sa gap hkrum ai Myen hpyen dap kawng hta Myen hpyen n gun 100 jan ram nga nna, gap hkrum ai hpang, dai hpyen dap kawng kawn sinat kaji hte 50 lang jan gap shadam bun wa ai lam chye lu ai.

Lai wa sai November praw 4 ya shana mung, Hpakant Ngapyaw Taw lawk na Myanmar Tsipwa Ye Bank makau hta mung bawm kapaw wa ai rai nna, Balik marai 3 hkala hkrum ai lam nga wa sai re.

Hpakant muklum kata n dai laman Myen hpyen dap a shara ni jahkring hkring gasat hkrum ai lam ni nga taw ai lam sagawn chye lu ai.

Tingkawk hte Nam hpyek lapran Myen Hpyen Hpung ni gasat hkrum

Daihpawt manap Dainai kaw na Jahtu Zup maga de yu wa ai Myen hpyen hpung ni hpe Wunpawng Mungdan Shanglawt Hpyen dap KIA dung 43 ni lam lapran hta hkap gasat dat ai lam chye lu ai.

Danai kaw nna Jahtu Zup maga de dai hpawt manap hkying 6 ram aten lai yu wa ai Myen hpyen hpung n gun 20 hpe KIA kaw nna, Nam Hpyek hte Ting Kawk mare lapran hkap shing la gasat dat ai hpang aten gadun gap gasat hkat wa ai re lam chye lu ai.

Dai zawn hkap shingla gasat dat ai hta Myen hpyen dap maga si hkala hkrum ai lam nga ai rai tim, mabyin masa hpe hkrak n chye lu shi ai.

Dai Myen hpyen hpung ni gaw, Nambyu Nam Hkam mare ni de shamu shamawt hkawm nna, Jahtu zup dap de bai n htang yu wa ai lam hta hkap gasat hkrum ai re lam ginra masha ni tsun ai.

Ya ten Myen hpyen dap ni kaw Hugawng Danai Lido lam kaba maga de hpyen n gun laknak arung arai ni ding yang jat bang taw nga ai lam, mu ai ginra masha ni tsun dan ai.

Ya ten hta Jinghpaw mungdaw shara shagu ni hta Myen hpyen dap the KIA dap lapran hpyen masa shaja hkat taw ai masa rai nna, galoi mung sadi maja let nga na lam KIA ginjaw kaw na Mung mare masha ni hpe tsun sadi jaw da ai re.

Myitkyina Kata Mawdaw Sengke Laja Lana Rim Jep

Myen hpyen dap hte Balik ni pawng hpawm nna, Myitkyina Muklum kata pru shang lam ni hta, Mawdaw Sengke yawng hpe Lai Sin jep ai lam ni galaw taw ai lam chye lu ai.

Dai hpawt manap hkying 9 ram aten kaw na Myitkyina numshang Pang Mati lawk hte Myitkyina Bala Min Htin mahkrai n pu, n tsa hkan laja lana san jep taw ai re lam ginra masha langai KNG de tsun wa ai.

“Myen Hpyen la hta Balik ni tsawm ra law hkra rai na, lai sa lai wa ni yawng hpe hkap jahkring na Lai Sin hkap jep ai, n lawm tim gaw bai lai shangun ai, n kau gaw gumhpraw jaw na bai lu lai wa ai ni mung nga sam ai, ya ten du hkra chyawm mawdaw zing mat wa ya ai nga rai nna shi ai.”

Hkrun lam hkawm mung shawa ni hpe mung, Mung Chying masat san jep ai lam hpe Express Mawdaw kaba ni hta laja lana san jep nna, shan hte n tsen ai ni hpe lam yu hkawm shangun ai lam ni galaw nga ai lam chye lu ai.

Myitkyina Shatapru lawk hta nga ai Duwa Lahkri La Awng mung shi sun kaw na wa ai ten, lam kaw hkap jep hkrum nna, shi hta lawm ai, sun sa nhtu n-ga hpe mung la kau ya ai lam shi Facebook hta tsun da ai.

Myen hpyen dap ni dai zawn, laja lana san jep wa ai lam gaw, rawt malan wuhpung ni kaw na Mawdaw, Sengke ni hte Myen hpyen dap a shara ni hta bawm sa kapaw ai lam ni jahkring hkring galaw ai hpe hkang zing lu na matu myit mada let galaw wa ai re nga, Myitkyina ginra masha ni mu mada ai lam tsun ai.

Myen hpyen dap daru magam zing kau ai hpang, Myitkyina muklum kata Mawdaw Sengke Lai Sin rim san jep wa ai gaw, ndai shawng ning nan lang re lam chye lu ai.

Myen hpyendap ni mung shawa nga ai Mai Ja Yang kata de laknak kaba gap bun

Zin Lum hte Loi Je lapran Yaw Yung Bum hta dung ai Myen hpyen dap ni, dai ni shani ga-ang hkying 1 aten hta, Mai Ja Yang grup yin de lak nak kaba gap bun ai lam chye lu ai.

Yaw Yung Bum hta dung ai Myen hpyen dap ni gaw Mai Ja Yang mare kata de laiknak kaba 6 lang jan gap shadam bun ai nga, Mai Ja Yang ginra masha ni KNG Shiga dap de tsun dan ai re.

Hkying 1 daram hta laknak kaba 2 lang gap bun ai gaw, Mai Ja Yang Dakkasu makau de wa hkrat ai rai nna, hkying 2 jan daram hta kalang bai gap dak ai lanak kaba 3 lang gaw, Lup Wa kawng makau de wa hkrat ai lam chye lu ai.

Ya ten Mai Ja Yang kata na mung shawa ni, jawng ma ni gaw hkrit tsang, maja let nga taw ai lam chye lu ai re.

Wunpawng Mungdan Shanglawt Hpyendap KIA dapba 3 dung 15 ginra rai nga ai Lung Ja bum hpe lai wa sai shata kaw nna Myen hpyendap htim gasat taw ai rai nna, ya bat 2 du ai hpang, mung shawa ni nga ai Mai Ja Yang mare kata de laknak kaba gap bun ai lam rai nga ai.

Lung Ja Bum hta Gung Nsa lawm ai nbungli bawm hte KIA hpe gasat

Nmawk, Lung Ja Bum hpe Myen hpyendap nbung li bawm sa jahkrat bun ai hta Gung nsa lawm ai Bawm ni hte sa jahkrat bun ai nga, shawng lam KIA lit nga salang ni kaw nna chye lu ai re.

Wunpawng Mungdan Shanglawt Hpyendap KIA Dung 15 ginra, Lung Ja bum hta Myen hpyen dap ni lai was ai 24 ya shani nbungli hte wa jahkrat bun ai bawm hta Gung n sa lawm ai lam, shawng lam hpyen magam gun ni tsun ai re.

Gung n sa hpe marawp hkrup ai hte kalang ta kya mat ai majaw, shawng lam hpyen la ni tinang chye ai ladat hte hpa jet hka madit na magap ai hte, Hpa Hka sha, naw hpu sha rai, tinang chye ai ladat ni hte lai di wa ai re lam matut tsun dan wa ai re.

lai wa sai August shata Myo Hla majan hta Myen hpyen dap ni ndai zawn sha n bungli kaw na Gung nsa lawm ai laknak ni hte wa jahkrat bun ai nga, dai ginra na PDF lit nga ai ni kaw na matut chye lu ai.

Myen hpyen dap ni gaw, lai wa sai September shata kaw na Sagaing hte Jinghpaw Mung jarit mayan de hpyen n gun grau jat, n bungli ni hte mung htu shadut htim gasat hpang wa ai gaw, ya ten Nmawk Lung Ja bum hta majan laja lana byin nga ai re.

Manmaw Katha maga de na lung wa ai Myen hpyen n gun 200 jan gaw, lai wa sai October 22 ya shani kaw na Nmawk Lung Ja bum maga de hpyen man 3 garan nna, htu shadut htim gasat taw nga ai re.

Dai zawn Majan laja lana gap gasat hkat taw ai majaw, Wa Wang, Lung Ja, Hkun Ja, Nawng Pau, Hka Nan mare hkan na mung shawa ni Nmawk mare kaba hte Manmaw mare kaba ni de hprawng shingbyi nga ra ai re.

Lung Ja Bum lagaw hta laknak kaba hte gap gasat hkat

N’Mawk Lung Ja Bum de dai hpawt manap kaw nna, Myen hpyen dap hte KIA dap lapran laknak kaba ni hte gap gasat majan bai byin taw ai lam chye lu ai.

Dai hpawt manap hkying 10 ram kaw nna Lung Ja Bum n pu Tsing Du kawng hta shara la nga ai Myen hpyen dap Dapnu 88, Hk M Y 437 dap ni hpe Wunpawng Mungdan Shanglawt Hpyen dap KIA Dung 15 ni kaw nna laknak kaba hpan hkum hte sa htim gap gasat taw ai re lam, shawng lam hpyen shi sawk ni KNG shiga dap hpe tsun dan ai re.

“Ya gaw anhte maga de na dai Lung Ja Bum n pu Tsing Du Kawng hta du nga ai Myen hpyen dap ni hpe laknak kaba hpan hkum hte sa gap bun taw nga ai, ya ten gaw lahkawng maga laknak kaba ni naw gap bun hkat taw ai, lagaw lam dap hte htim gasat ai lam gaw rai n nga shi ai” nga tsun dan ai re.

Dai zawn lahkawng maga majan laja lana gap gasat taw ai lam ni a majaw, dai ginra na mung mare masha ni Mam dan na matu dut dang taw nga ai re.

Mangai mam myin taw nga ai ten, Hka Nan, Lung Ja, Wa Wang mare na mung mare masha ni gaw, mam dan shu la na lam hta yak hkak taw nga ai lam hpe mung mare masha langai KNG shiga dap hpe ya na zawn matut tsun dan wa ai re.

“Hka Nan, Lung Ja, Wa Wang dai mare mayan na mung mare masha ni a hkau na ni de laknak kaba jahkring hkring hkrat ai, n kau hkau na shing nawm hkan wa hkrat ai ni nga ai, dai zawn hkau na pa ni de laknak kaba jahkring hkring wa hkrat ai majaw, asak hte galai na gadai n gwi sa dan ai, dai hpawt manap mung shawa n kau mam sa dan taw ai, laknak kaba ni grai bai ngoi wa ai majaw, yawng bai hprawng n htang ma ai.” nga tsun dan ai re.

Ya ten Myen hpyen dap gaw dai ginra de hpyen n gun kaba hte ding yang htu shadut taw ai rai nna, nbungli, laknak kaba ni hte gap bun taw ai re.

Dai zawn majan kaba laja lana byin wa ai majaw, dai ginra na mung mare masha ni Nmawk mare kaba hte Manmaw mare kaba ni hta sa du hprawng shing byi taw nga ai rai nna, dai hpyen yen ni a matu malu masha garum ningtum lam ni mung ra ahkyak taw nga ai lam chye lu ai.

Myitkyina Pawng Hpawm Rung kaw Bawm Sa hkam ai PDF Kapaw Si

Myitkyina mare kata October 30 ya shana, Myitkyina Pawng Hpawm rung kaba hta bawm kapaw ai mabyin gaw, Bawm sa hkam ai wa nan, dai hkam na shara du ai hte kapaw si mat ai re lam, ginra masha ni kawn chye lu ai.

Myitkyina Muklum kata shamu shamawt taw nga ai Mung Shawa Makawp Maga Dap PDF magam gun wa gaw,  aten masat Bawm (ချိန်ကိုက်မှိုင်း) sa kapaw ai hta, dai rung shara du ai hte kalang ta kapaw mat ai majaw, dai shara hta kalang dat kapaw si mat ai re lam, PDF the ni nawn ai ni kaw na chye lu ai.

Dai Bawm sa hkam ai wa gaw, dai rung kata de, Buga Wan rung hkrang hku shang wa nna, sa hkam kapaw la ai majaw, Buga wan rung magam gun marai 5 hpe Myen hpyen dap ni kaw na rim woi da ai lam, Buga Wan rung magam gun langai KNG shiga dap de tsun ai.

“Bawm kapaw ai makau na Wan rung (ခွဲရုံ) kaw sin yup ai marai masum hpe dai Bawm kapaw ai hpang, rim woi mat ai rai nna, Buga Wan rung n tsa tsang lit nga ai marai lahkawng hpe dai hpawt shaga woi mat wa ai.”

Dai rim woi hkrum ai marai masum gaw, Jinghpaw Mungdaw asuya rung makau hta nga ai Wan garan jaw ya ai Transafomer rung hta sin yup ai marai 3 rai nna, ခွဲရုံ kaw na 1, Buga Wan rung Manager kaba Salang La Awng dai marai 5 hpe rim woi da nna, dai bawm sa kapaw ai wa Buga wan rung magam gun rai n rai, CCTV ni woi jep yu taw ai lam chye lu ai.

Ya ten dai Bawm sa kapaw ai wa gaw, Buga wan rung magam gun n re lam lu jep sagawn da sai rai nna, dai bawm sa kapaw ai wa gara kaw na gadai re ngu hpe a tsawm tup hkrak matut san jep sagawn taw ai lam chye lu ai.

Myitkyina muklum kata n dai zawn Bawm sa hkam nna, tinang hkrai hkra hkala kapaw hkrum ai gaw, n dai shawng ning nan lang re lam chye lu ai.

Wai Maw, N Wan Kawng Myen hpyen dap hte Majan byin

Wai Maw Sadung lam kaba, N Wan Kawng hta dap jung ai Myen hpyen dap ni hpe Wunpawng Mungdan Shanglawt Hpyen dap KIA Dung 3 ni, laknak kaba sa gap bun ai hpang lahkawng maga aten kadun laman gap gasat wa ai lam chye lu ai.

October 31 ya shana maga hkying 1 chyen ram aten N Wan Kawng Myen hpyen dap hpe KIA ni laknak kaba sa gap bun ai hpang, aten kadun gasat hkat wa nna, Myen hpyen dap maga mung laknak kaji kaba ni hte mana du hkra makau grup yin ni de gap shadam bun taw ai lam chye lu ai.

Dai ginra hta lai wa sai bat mi ram kaw na hpyen n gun kaba jat bang da nna, makau grup yin ni hta Myen hpyen dap ni hpyen shamu shamawt lam ni ding yang nga taw ai majaw, Jawng ni hpe mung tau hkrau pat da ai lam, dai ginra hta ang ai Jawng Srn langai KNG de ya na zawn tsun ai.

“N Wan kawng mayan hta lai wa sai bat mi ram kaw na Myen hpyen la ni grai du wa ai, dai zawn Hpyen la ni grai law wa ai majaw, mung shawa ni hkrit na Jawng jau na pat kau sai, dai ni shani ka ang kaw na sinat ngoi wa ai, Nam de na ni shawng sa gap dat sam ai, gap da na bai hting nut mat ai, Myen hpyen dap ni shan hte hkrai sha dai na maga hkying 3 ram du hkra gap shadam taw ai.”

Ya ten Myen hpyen dap hte U Shwe Min woi awn ai Pyi Thu Tsit hpyen hpung ni KIA Dung 3 ginra de kalang bai hpyen n gun kaba hte htu shadut taw ai lam ni nga ai rai nna, Nang Zaw Yang maga de mung hpyen n gun ni bai jat bang taw ai lam matut chye lu ai.

KIA Dung 3 Nang Zaw Yang maga de lai wa sai ten, Myen hpyen dap hte U Shwe Min woi awn ai Pyi Thu tsit hpyen hpung ni majan kaba hpaw wa yu sai rai tim, awng dang ai lam n lu ai hte bai hting nut mat ai lam chye lu ai.