PDF ni gan tat sum kau ai lam numbraw shara Dap shara hpe bai Gasat Zing la lu

Shwegu Muklum mare numshang lam numbraw 5 shara kaw dap jung shara la nga ai Myen Hpyen dap hpe KIA PDF pawng hpawm hpung ni mani sa htim gasat kau wa lu ai lam chye lu ai.

Shwegu Muklum prushang lam numbraw shara kaw dap jung nga ai, Myen hpyen dap shara hpe KIA PDF ni sa htim gasat ai hta, Mana maga de bai gasat zing madu la lu wa ai nga, ginra masha langai KNG shiga de tsun dan wa ai re.

Shwegu Muklum grup gra yawng kaw PDF ni shara la da sai hpe, Shwegu Myen Hpyen dap na pru wa ai Myen hpyen hpung ni PDF ni nga taw ai lam numbraw dap shara hpe sa htim gasat wa ai majaw, PDF maga gan yen kau da ai hpe, KIA PDF dap ni pawng nna, bat 2 ya shani kaw na bai sa htim gasat ai gaw, Mana maga yawng bai gasat zing la lu sai nga, dai ginra na Hpyen masa yu maram taw ai Salang langai KNG shiga de n dai zawn tsun dan wa ai re.

“Shwegu hpe KIA PDF pawng hpawm ni wang da ai gaw grai na sai gaw, Ya gasat poi byin ai ၅ လမ်းဆုံ nga gaw, Shwegu kaw na Katha Mandalay de yu wa yang, pru wa ai lam numbraw shara rai nga ai, dai shara hpe Shwegu Myen Hpyen Dap na pru wa ai hpyen hpung ni akajawng sa htim gasat ai majaw, anhte maga na ni yen kau ai hpe, n-gun gahkyin na kalang bai htim gasat ai. Majan gaw masum ya byin ai nga, Mani bai yawng lu la sai nga na ai,” nga tsun dan wa ai re.

Myen Hpyen maga na gaw, n dai lanam rai n shang shi ai laman Mali hka lam mayan yawng hpe Up madu lu hkra shakut taw ai majaw, Shwegu maga de mung bai gap gasat hkat wa ai masa re lam hpyen masa yu maram ai ni tsun da ai re.

Myen Hpyen hpung ni Katha kaw Hpyen n gun wa mahkawng nga nna, Indaw de htim na zawn rai nna, Shwegu, Sin Hkan, Manmaw Mali hka lam de bai yawng wa nahpe maja ra ai lam HPyen masa yu maram ai Salang langai KNG de n dai zawn tsun maram da ai re.

“Myen ni ya Katha kaw hpyen n-gun grai bai wa mahkawng taw ai nga, Indaw de htim na zawn zawn galaw dan masu na, Manmaw de man yawng wa chye ai, Ya Myen ni gaw, Manmaw hpe n tat hkra ladat hpan hkum the shakut taw ai re majaw, anhte maga na gaw, grai maja ra ai ga rai nga ai.” Nga tsun maram da ai re.

Htichyaik na htu lung wa ai Myen hpyen hpung ni n dai laman Katha kaw wa du shatup nga nna, Indaw de htim gasat wa na zawn rai hpyen masa shaja hkat taw ai lam chye lu ai.

Hpyen masa naw shaja hkat taw ai ten re majaw, mare de mung shawa ni gadai n wa na matu rawt malan hpung maga tsun sadi jaw da ai rai tim, mung shawa n kau gaw, tinang mare dum n ta de bai n htang wa nga taw sai lam chye lu ai.

Katha Muklum hpe Myen ni yawng bai up madu kau lu sai rai nna, hpye masa ding yang naw matut shaja hkat taw ai lam, ginra magam gun ni tsun ai re.