Hpakant Mashi Kahtawng Makau Myen Hpyendap Shara Jahkrat Ai Majaw, Mungshawa Ni Hprawng
Hpakant, Mashi kahtawng makau Myen hpyendap dap jung shara jahkrat wa ai majaw,ย ย mungshawa ni hpyen koi yen taw ai lam, ginra masha ni tsun ai.
August shata htumย kaw nna, hpyen n-gun 50 daram nga ai Myen hpyen hpung ni Hpakant mare kaba grupyin hpyen shamu shamawt hpang wa ai re.
Dai hpangย September 4 ya jahpawt Mashi kahtawng, Aung May lawkย makau na kawng langai kaw shara la wa ai re lam, ginra masha langai KNG hpe tsun ai.
โMyen hpyen hpung ni nam lam hku lung wa na kawng kaw shara wa la nga ai shaloi PDFย ย ni mung dai kawngย ย man pa kaw sharaย ย la na gap hkat taw ding yang re, dai majaw mare masha ni hpe hkying 1 garai n du shi yang lawan ladan htawtsit na matuย ย PDF ni tsun wa ai reโ nga nna tsun ai.
Myen hpyendap ni dap jung wa ai maga de majan byin wa ai majaw, mare masha niย Hpakant hpunggyi jawng de hprawng yen nga ma ai re.
โHpyen yen ni gaw ya ya Hpakant myo kata na Ma Nit Ze Ya hpunggyi jawng hte, nkau mi gaw jinghku ni hkan wa koi yen taw ma ai. Daina maga duhkra masha 200 du wa sai nga na aiโ nga nna ginra masha langaiย matut tsun ai re.
Aung Mye lawk gaw nta htinggaw 100 daram nga nna, Mashi Kahtawng lawk hta nnan de da ai lawk kasha re lam chye lu ai.
Hpakant ginra masha ni tsun ai gaw, Hpakant byuha kawng kaw nna majan byin nga ai shara de laknak kaba ni hte gap bun taw nga ai lam, tsun ai.
August 15 ya shaniย Hpakant Lamawng kawng hte Taw Maw dap hpeย ย tat sum kau ai hpang Myen hpyendap gaw August shata 23 ya shani kaw nna, Helicopter hte hpyen n-gun htaw jat bang nga dingyang rai nga ai hpe, matut chye lu ai.
Dai hpang August shata htum maga de hpyen shamu shamawt ai lam galaw hpang wa ai re nga nna, ginra masha ni tsun ai.
2024 ning March shata praw 7 ya shani kaw nna, KIA hte pawnghpawm hpyen hpung ni gaw, Hpakant ginra Gwihka, Sezin, Tamahkan, Namya, Namting ni yawng hpe zing kau lu ai hte maren, August shata hta Lamawng kawngย hte Taw Mawย ย dap ni hpe matut zing da lu ai re.
