Wunpawng Mungdan Shanglawt Asuya Uphkang Gaiwang kata na, Ja htu kau ngut sai lamu ga ni hpe, n-ta htingra hku na bai garan jaw taw ai lam, KIO ndau laika kaw na mu lu ai re.
Dai shara ni gaw, KIO Ginjaw Ginra Laiza hte Myitkyina Manmaw lam kaba lapran na, Namsan Yang hte Maisak pa mare ni re lam chye lu ai.
Ya na zawn, Namsan Yang, Maisak Pa kaw lamu ga htingbut htingra garan ya taw ai lam the seng nna, Dukaba Nhpang Naw Bu KNG shiga de n dai zawn tsun sanglang dan wa ai re.
“KIO a policy kaw rawng ai, Ja htu kau ngut ai shara ni hpe bai kaput da ra na ngu ai lam nga ai, ga shadawn gaw, ginra masha ni shan hte na lamu ga dut sha kau na Ja htu kau ngut sai lamu ga gaw, Asuya the seng mat sai, dai majaw gaw, dai zawn Ja htu kau ngut ai shara lamu ga ni hpe bai shara nna, n’ta htingra hku na magam gun ni hpe bai garan ya taw ai lam re,” nga tsun dan ai re.
Ya ten, Namsan Yang hte Maisak Pa na ja htu kau sai lamu ga ni hpe n ta htingra shadawn nna, hta hkrup hku na garan jaw nga ai lam hta, n ta htinggaw 228 hpe garan jaw da y alu sai lam chye lu ai.
Madung hku na jaw garan ya ai chyawm gaw, ya hkyak hkyak rawng na dum n ta n lu ai magam gun ni hpe shawng shara jahkrat ya taw ai lam matut chye lu ai re.
Ya matut nna gaw, nga shara dum n ta htingbut htingra n lu ai mung shawa ni, KIO de tang shana wa ai mung shawa ni hpe matut shadawn masat ya mat na lam chye lu ai.
“Ya Namsan Yang kaw, htingra shadawn masat ya taw ai hta gumhpraw lap mi mung n la ai sha, nga shara lamu ga n lu ai ni hpe masat jahkrat ya ai lam re nga,” Dukaba Naw Bu matut tsun ai re.
Namsan Yang mare gaw, 2011 ning Majan byin ai ten kaw na mung shawa yawng hprawng yen shakram kau da ai mare kahtawng langai rai nga ai.
Mung Shawa ni hprawng yen shakram kau da ai ten, Myen Hpyen dap, Shanglawt Asuya lahkawng maga hte prinem ai Salang ni lapran kaw nga let, Jahtu lauban ni hpe shaga bang nna, Ja htu sha kau ma ai lamu ga ni rai nga ai.
Wunpawng Mungdan Shanglawt Asuya Ginjaw Ginra hte Deng 10 ram pyi n tsan ai Namsan Pa hta ladu lai Ja htu ai lam the seng nna, Shiga dap ni kaw na, KIO Ninggawn Amu Madu hpang de san yu ai shaloi, Ninggawn Amu Madu maga na bai htai ai gaw, “Nam San Yang Mare gaw, Myen Asuya ni Uphkang ai ginra she re majaw, Ja htu ai lam the seng na KIO shang lawm ai lam n nga ai nga na,” tsun lai wa yu ai re.
Namsan Yang mare gaw, 2011 ning Majan byin ai hpang, Mare Hkauna Ja grai htu sha wa ai majaw, Mung shawa ni mare dum n ta wa na lam hkyen shajin wa ai ten, 2018 Ning kaw mare de bai n htang wa ai rai tim, Hpri Nlung htu ai Sengmai mare, Npawn maga majan bai byin wa ai majaw, mung shawa ni kalang bai hprawng yen ai mare buga langai rai nga ai.
Dai hpang 2023 ning KIA the PDF Pawng hpawm dap ni Myitkyina Manmaw lam kaba n tsa na Myen hpyen dap yawng hpe htim gasat shagrawt kau lu ai hpang, Namsan Yang mare masha n kau bai wa nga taw sai re.
