Danai Patmaw De Na Pyithutsit Dap Shara Hpe KIA Gasat Zing La Lu Ai Lam N Nga
Danai Lapu Hka Oi Law Shagyit hte Hka lawng Kawng Shawng lam Post dap shara lahkawng hpe Wunpawng Mungdan Shanglawt Hpyen dap KIA PDF pawng hpawm dap ni lai wa sai bat kru ya shani sa htim gap gasat wa ai lam nga ai hpe chye lu ai.
Sa htim gap gasat ai ten, dai dap shara lahkawng na Pyithutsit hpyen hpung ni hpe lu gap jahtaw kau lu wa ai rai tim, Myen Hpyen Nbungli a majaw dai shara hpe n lu zing ai sha bai yen kau da ai nga, dai ginra na mung shawa langai KNG shiga de n dai zawn tsun dan da ai re.
“Kru ya jahpawt n-gun kaba hte sa htim gasat ma ai, Oi-law မောင်းတံဂိတ် hte Hka Lawng Kawng na shawng lam post hpe sa htim ai rai nga ai, nnan gaw masan s anna, dai kaw sin ai Pyithutsit ni yawng hprawng mat sai majaw, lu zing sai nga shiga pru ai rai nga ai, rai tim, Myen ni nbungli hte laja lana bai wa gap na Pyithutsit ni bai htim lung wa ai majaw, yawng bai kalut kau da ra mat ai masa re nga tsun ai,” nga dai ginra na KIA the ni nawn ai Salang langai tsun ai re.
April 18 ya jahpawt hkying 4 chyen ten daram kaw na KIA PDF pawng hpawm dap ni Hpyen n gun kaba hte Lapu Hka Jamaw hte Pat Maw hpe makawp ya nga ai Hkalawng Kawng Post hte Oi-Law Jamaw numshang na shara hpe sa htim gasat ai sha n ga, Jahtuzup Pyithutsit dap shara ni hpe mung Kai Taw Ja Maw kaw na sa gap gasat ai lam galaw wa ai hpe chye lu ai re.
Warazup Pyithutsit dap maga na gaw, KIA ni htim gasat wa ai hpe hkap shingla gasat ai hta, KIA maga sum machyi law nna bai hting nut mat ai hpang,sinat lau 7 hte hpawn masha langai hpe lu rim wa nna, Pyithutsit maga na gaw, marai 2 si nna, marai 3 hkala hkrum wa ai nga, Warazup Pyithutsit Shiga hta tsun da ai hpe mu lu ai re.
Dai Jahpawt Hkying 8 chyen ten daram hta Myen Hpyen n bungli hte bawm 4 lang sa jahkrat bun kau da ai hpang, shana maga hkying 2 aten hta mung Nbungli bawm laja lana bai sa jahkrat bun wa ai hpe chye lu ai.
Dai Jahpawt hta sha, Kaitaw mare kaw na Jahtuzup Pyithutsit dap shara hpe Laknak kaba dep ai shara ni hkan du hkra sa gap bun da ai lam nga ai hpe matut chye lu ai re.
KIA maga, Pyithutsit ni nga ai shara hkan sa gap gasat ai hpang, yawng bai n htang mat ai majaw, gasat zing madu lu ai lam hpa n nga ai lam chye lu ai re.
Danai Pat Maw lam majan masa lam hte seng nna, KIA Shiga magam dap lithkam Dukaba Nhpang Naw Bu hpe san yu ai shaloi ndai zawn matut tsun dan wa ai re.
“Kru ya jahpawt Hka Lawng Kawng Shawng lam post kaji hte dai ginra ja maw hkan na Pyithutsit shara hpe sa htim gasat ai lam gaw nga sam ma ai, rai tim lu zing ai nga gaw hpa nna shi ai. Ya Online n tsa hkan lu zing ai nga tsun ai gaw, dai Hkalawng kawng shawng na post kaji the dai ja maw hkan na dap kaji hpe sa gasat ai hpe tsun ai rai na re,” nga tsun ai re.
Dai ginra de Min Zay Thant woi awn ai Wara Zup Pyithutsit dap ni 2025 December shata kaw Nbungli hte htim gasat shang wa na, Myen Hpyen dap hte Pyithutsit dap ni Pat Maw the Lapu hka a matu ahkyak ai, Hka Lawng Kawngh pe gasat zing madu da ai rai nga ai.
