Nmawk ngut ai hpang, majan gaw Manmaw kata de man yawng wa sai re majaw Myen hpyen dap maga na mung, hpyen n-gun law law hte lawk mare kata shinggan ni hkan shara la dap jung nna, laknak kaba ni shadun let, gap bun ai lam ni dingyang galaw nga ai re.
Dai majaw ya ten , Manmaw mare makau grup grup yin yin sinat mahku nsen dingyang ngoi kadu nga ai hte ginra kata na majan masa lam hpe Manmaw ginra Kawa la langai KNG hpe tsun dan ai re.
“Kawngja yang makau na 47 dap hpe ma sa gyam, sa wang gap ai majaw, ndai si nat kaji kaba gaw ndai myo mayan na gaw a yan na ai” nga nna tsun ai re.
Bai, Manmaw kaw nga ai Myen hpyendap gaw Manmaw mare shinggan deng 2 daram sha tsan ai mare kahtawng hkan na, Cahtolik nawku jawng hte KBC nawku jawng wang hkan dap jung na, majan byin ai shara de laknak kaba gap bun nga ai hpe chye lu ai re.
Ya na zawn Manmaw mare hte deng 3-4 daram sha tsan ai kaw hpyen man lahkawng, masum hku majan grau laja wa ai majaw Manmaw ginra masha ni shani shagu hprawng koi yen nga ai masa lam hpe mung Manmaw ginra na rawt malan hpung lit nga ai Salang langai matut tsun dan ai re.
“koi yen mat ai ni gaw grai law sai. ngam nga ai ni mung pru lam hpe matut tam taw ai ngu mu mada ai. ngam nga ai mung shawa ni gaw gun rai manu rawt ai dam hpe hkam sha ra taw ai. Hpyendap maga rim ai lam ni hpe mung ramma ni koi yen ra taw nga ai.” nga nna tsun ai re.
Ya hprawng koi yen nga ai Manmaw ginra masha ni gaw Myen hpyen dap hte ni kahtep ai mare lawk ni, Myen hpyen dap shim lam la dap jung wa ai mare lawk hkan na mung masha ni hte, ja gumhpraw dang di ai ni gaw lani hte lani hprawng pru nga sai hpe tsun dan ai re.
Hprawng koi yen ai lam n nga shi ai mung masha ni gaw , ya na hpyen majan lapran tam lu tam sha n mai mat ai mayak, gunrai manu rawt mat ai mayak hte Ph, Internet mayak hpan hkum hkra mayak hkrum sha nga ai re.
Myen hpyen dap daru magam zing ai masum ning jan laman hta Manmaw ginra gaw Jinghpaw ginra yawng hta hpyen majan law dik htum rai nna, Manmaw, Majan, Nmawk dai ginra na Hpyenyen mung masha ni mung ya ten du hkra hpyen koi yen ai tsin yam naw hkrum sha nga ra ai re.
